3
Ini Sa Egoh Da Nesalà
1 Na, diyà sa langun uled tanà binaelan i Datù Nemula, sa uled, iya sa épê medalem penemdem denu ukit keakal etaw. Agulé, eg-igsà sa uled diyà sa bayi, guwaen di, “Tuu pa, hinawidan i Nemula kiyu egkaen sumalà dé sa bunga kayu diyà siini hinemulaan?”
2 Agulé, migsagbì sa bayi, guwaen di, “Sumalà dé sa bunga kayu diyà siini hinemulaan, mekaen ké 3 liyu daa sa sebaen kayu teliwadà siini hinemulaan. Iya sa inikagi i Nemula, guwaen di, ‘Yoko egkaen duu owoy yoko ma egsabà duu anì endà mekesugsug yu.’”
4 Agulé, guwaen sa uled, “Endà tuu iya wé. Endà mekesugsug yu. 5 Iya maen di ya hinawidan i Nemula iya wé enù ka netiigan di amuk kaenen yu, iya pelawà mekepenemdem yu owoy lagà yu si Nemula, enù ka meketiig yu sa medoo medaet owoy sa medoo mepion.”
6 Agulé, netuuwan sa bayi enù ka metolol sa egoh-egoh sa kayu diyà sa kehaa di, owoy sa penemdem di mepion kaenen sa bunga di. Owoy netuuwan sa kepenemdem di amuk kumaen. Huenan di, kinuwa di sa bunga di owoy kinaen di. Agulé igbegay di ma diyà sa sawa di, owoy migkaen ma dé. 7 Hê, nekepenemdem da owoy egketiigan da dé sa egoh da egpelawalawa. Huenan di, tinebil da sa medoo daun kayu pigus owoy iglobing da.
Ini Sa Egoh Da Nelenawan
8 Na, egoh di mahapun dé, egdinegen da sa dagì i Datù Nemula eg-ipanawpanaw diyà sa hinemulaan. Hê, sa maama owoy sa sawa di, eglidungan da Datù Nemula i diyà sa kayukayu hinemula. 9 Agulé, eg-umowen i Datù Nemula sa maama, guwaen di, “Kenà ko ya?”
10 Agulé migsagbì Adam i, guwaen di, “Egdinegen ku sa dagì ko eg-ipanawpanaw diyà sa hinemulaan owoy egkelenawan a enù ka egpelawalawa a. Iya maen di ya miglidung a.”
11 Agulé, guwaen i Nemula, “Ngadan sa kenà ko neketiig sa kepelawalawa ko? Enù di ya, kinaen ko sa bunga kayu hinawidan ku?”
12 Hê, migsagbì Adam i, guwaen di, “Sa bayi igbegay ko diyà kenak, binegayan di aken sa bunga siedò kayu. Iya maen di ya kinaen ku.”
13 Agulé, guwaen i Datù Nemula diyà sa bayi, “Ngadan iya wé binaelan ko?” Hê, guwaen sa bayi, “Sa uled, inakalan di aken. Iya maen di ya kinaen ku.”
Ini Sa Metamanan Sa Uled Danà Sa Salà Di
14 Agulé, guwaen i Datù Nemula diyà sa uled, “Diyà sa langun balangan hinagtay owoy diyà sa langun balangan uled tanà, kuna sa pigtamayan ku danà iya wé binaelan ko. Sa getek ko, iya sa iipanaw ko owoy mekekaen ka tanà sa lugay ko mugpà diyà tanà. 15 Sekuntelaen ku kiyu sa bayi owoy sekuntelaen ku sa tugod yu ma. Lupeten di sa ulu ko owoy sagkawen ko sa lisen di.”
Ini Sa Metamanan Sa Bayi Danà Sa Salà Di
16 Agulé, guwaen i Nemula ma diyà sa bayi, “Pedoowen ku sa egkelikutan ko owoy sa mesakit ko amuk umanak ka. Uman ka umanak, mesakitan ka temù. Dodoo, dakel doo sa kekeiyap ko sa sawa ko owoy kagdi sa sumugù keniko takà.”
Ini Sa Metamanan Sa Maama Danà Sa Salà Di
17 Agulé, guwaen i Nemula ma diyà si Adam, “Pigtamayan ku ma kuna enù ka inunutan ko sa inikagi sa sawa ko owoy kinaen ko ma sa kayu hinawidan ku, sa guwaen ku, ‘Yoko egkaen duu.’ Huenan di, pedaetan ku siini tanà danà ko nesalà. Mepasangan ka gumalebek sa kaenen ko taman sa lugay ko eg-ugpà diyà tanà. 18 Iya sa tigtu kumelemu tumunas sa medoo dugiyen owoy sa medoo keluwen. Mekekaen ka ma sa medoo peampay egtunas danà ko mepasangan. 19 Limusengen ka gumalebek diyà tanà anì mekehaa ka sa kaenen yu taman mekepelikù ka dema diyà tanà, enù ka iya sa keduwan ko. Egoh ku migbael keniko, tanà ka. Amuk melugay pa mebaluy ka dema tanà.”
Ini Sa Egoh Da Binegayan Ginis
20 Na, iya sa ngadan igbegay sa maama diyà sa sawa di, si Iba, enù ka kagdi sa inay sa langun etaw diyà tanà.a 21 Agulé, migbael Datù Nemula i kagda ginis kunul hinagtay, owoy igluhub di diyà si Adam owoy diyà si Iba.
Ini Sa Egoh Da Hinemagawan
22 Agulé guwaen i Datù Nemula, “Ini egoh di siini maama lagà dé kenita enù ka neketiig sa medoo mepion owoy sa medoo medaet. Endà dé mebaluy di mekekaen sa kayu mekepelalù etaw anì endà kumelalù di taman endà meelut di.” 23 Huenan di, hinemagawan i Datù Nemula kagda kedu diyà sa hinemulaan diyà tanà Iden anì upionen di polo sa medoo liyu tanà sa keduwan di egoh i Nemula migbael kenagdi. 24 Hê, pinelaun di dé sa maama owoy pineugpaan di sa medoo egsugùsuguen di kedu langit dò sa ilis hinemulaan di denu tebowon agdaw anì bantayan da. Duen ma igtagù di dahiya, sa sundang eglegleg takà egkebelilo anì mealang sa ukitan etaw mangay diyà sa kayu mekepelalù etaw.