2
Ini Sa Kepitu Di Agdaw
1 Na, neubus dé sa langit owoy sa tanà owoy sa langun eghauwen dahiya. 2 Egoh sa keenem di agdaw, inubus i Nemula sa langun galebek di. Migsabuh diyà sa kepitu di agdaw. 3 Agulé, pinedakel i Nemula sa sebaen agdaw sa kepitu di enù ka iya sa agdaw di egsabuh egoh di miggalebek egbael sa langun taman. Guwaen di, “Ini sa tigtu milagà agdaw diyà tanà meadatan etaw.”
4 Na, iya sa ukit-ukit egoh i Nemula egbael sa tanà owoy langit.
Ini Sa Ukit Kebael Di Maama
Na, egoh i Datù Nemula anay migbael sa tanà owoy langit, 5 endà pa duen hinemula diyà sa tanà owoy endà ma egtunas sa medoo balangan pinengalap. Iya maen di ya enù ka endà pa pineudanan i Nemula duu owoy endà pa duen sa maama umupion sa tanà. 6 Dodoo takà eglesut sa wayeg kedu dalem tanà anì egkewayegan sa tanà. 7 Agulé, binaelan i Datù Nemula sa tanà éhê egoh etaw. Gininawaan di sa tosong idung sa binaelan di. Agulé, egginawa sa maama. Nehagtay ma dé enù ka duen sa suguy di.
Ini Sa Denu Sa Tanà Iden
8 Na, binaelan i Datù Nemula ma sa dakel hinemulaan pulung melanih owoy mepion. Iya sa kenà di, diyà sa melabel uwang tanà Iden denu tebowon agdaw. Pineugpà di dahiya sa maama binaelan di. 9 Pinetunas i Datù Nemula sa langun balangan kayu mepion eghauwen etaw owoy mepion egkaenen etaw. Duen ma diyà teliwadà sa hinemulaan sa sebaen kayu mekepelalù etaw owoy sa sebaen ma kayu mekebegay penemdem diyà etaw anì meketiig da sa medoo medaet owoy sa medoo mepion.
10 Na, duen sa lawa't wayeg diyà sa tanà Iden egdelug diyà sa dakel hinemulaan anì egkewayegan. Egoh di eglagbas kedu diyà sa hinemulaan, migsugpang sa wayeg, nebaluy epat sa lawa di. 11 Iya sa ngadan sa sebaen sugpang di, wayeg Pison. Egdelug siini sebaen sugpang di diyà siedò uwang tanà Habila kenà sa medoo bulawan. 12 Mepion sa medoo bulawan di owoy duen ma diyà sa tanà di duwa balangan batu metolol owoy milagà. Iya sa ngadan da, bidéliyu owoy onisi. 13 Iya sa ngadan sa keduwa sugpang di, wayeg Gihon owoy egdelug diyà sa uwang tanà Kusi. 14 Iya sa ngadan sa ketelu sugpang di, wayeg Tigelis. Eglagbas sa wayeg Tigelis diyà sa uwang tanà Asiliya denu tebowon agdaw. Iya sa ngadan sa keepat sugpang di, wayeg Upelatis.
Ini Sa Denu Sa Kayu Hinawidan Di
15 Na, pineugpà i Datù Nemula sa maama diyà sa tanà Iden anì kagdi sa umipat owoy upionen di ma. 16 Eg-ikagiyan i Nemula, guwaen di, “Sumalà dé sa medoo kayu diyà siini hinemulaan, mekaen ko sa bunga da. 17 Dodoo sa sebaen kayu mekebegay penemdem anì meketiig ka sa medoo medaet owoy sa medoo mepion, yaka egkaen duu. Sa agdaw ko dé kumaen, hemilien ko ma sa sugsug ko amuk iya.”
Ini Sa Ukit Kebael Di Bayi
18 Na, guwaen i Datù Nemula, “Endà mepion di amuk lumebù daa ini i maama. Mael a duma di tegetabang kenagdi, sa kenà di metuuwan.” 19 Na, migkuwa Datù Nemula i tukééy tanà anì baluyen di sa langun balangan eg-ipanawpanaw diyà tanà owoy sa langun balangan eglayang diyà awang. Agulé inuwit i Nemula diyà sa maama anì ketiigan di sa medoo ngadan ibegay sa maama diyà kenagda. Sumalà dé sa ngadan igbegay sa maama diyà sa sebaen balangan hinagtay diyà tanà, iya sa ngadan di. 20 Agulé, pinengadanan sa maama sa langun balangan hinagtay owoy sa langun balangan manuk diyà awang owoy sa langun balangan uled tanà. Dodoo, endà duen di dahiya sa duma di tegetabang, sa kenà i Adam metuuwan.
21 Agulé, pinetudug i Datù Nemula temù sa maama. Agulé, egoh di egtudug, kinuwa di sa sebaen tuelan gusuk di owoy sinedeket di dema sa kunul diyà sa kenà di migkuwa. 22 Hê, binaelan i Datù Nemula bayi sa tuelan gusuk kinuwa di diyà sa maama, owoy inuwit di diyà sa maama. 23 Agulé, mikagi Adam i, guwaen di, “Na, ini a pelawà netuuwan enù ka tigtu tuu duma ku. Sa medoo tuelan di kedu diyà sa lawa ku owoy sa ekud di ma. Iya sa ngadan di, bayi, enù ka kedu diyà sa maama.”a
24 Na, iya maen di ya mesalidan sa maama sa emà di owoy sa inay di owoy mekeugpà dé diyà sa sawa di enù ka lagà sebaen etaw da daa.
25 Na, egpelawalawa sa maama owoy sa sawa di, dodoo endà duen kemala da.