ÉKSODO
Ini Sa Igsulat I Mosis Denu Sa Kelegkà Etaw Hudiyu
1
Ini Denu Sa Nebaelan Sa Medoo TegeIslaél Dutu Igiptu Dò
1 Na, ini sa medoo anak i Hakob maama mig-unut kenagdi egoh di mig-edoh dutu Igiptu dò lapeg sa medoo malayan da. 2-4 Ini sa ngadan sa medoo anak di, si Lubin, si Simiyon, si Lebi, si Huda, si Isakal, si Sabulon, si Bénhamin, si Dan, si Naptali, si Gad owoy si Asél. 5 Pitu pulù da langun mig-edoh dutu Igiptu dò, liyu daa si Hosé enù ka tapay dé dutu.
6 Na, egoh di nelugay dé, nematay Hosé i owoy sa langun duma di telahadi egoh iya. 7 Dodoo sa medoo tugod da tegeIslaél, eg-uman da egkedoo. Hê, nebelet da dé siedò tanà kenà da mig-ugpà, enù ka tigtu migkedoo da temù.
8 Na, egoh di nelugay, duen sa sebaen ma datù pinengadanan da Palo sa egsabà sa tanà Igiptu. Endà neketiig di denu si Hosé egoh anay. 9 “Taa yu,” guwaen di diyà sa medoo duma di tegeIgiptu, “tigtu migkedoo dé siini etaw tegeIslaél owoy melikutan ki dé sumabà kenagda. 10 Huenan di, lagbeten ta sa ukit ta pesabuh sa kedoo da. Enù ka amuk gumila sa medoo kuntelà ta diyà kenita, tumampil kéen siini medoo tegeIslaél diyà kenagda. Amuk hediya, mekelaun da kéen kedu diyà sa tanà ta Igiptu.”
11 Huenan di, inudipen sa medoo tegeIgiptu sa medoo tegeIslaél, owoy hinemilì da ma sa medoo mebalaw etaw egbantay kenagda. Egpegesen da kagda egpebael sa mepasang galebek anì mesemek da anì endà dé muman da kumedoo. Pinebael da kagda sa duwa dakel menuwa, Pitom owoy Lamésis, kenà i Palo migtagù sa langun taman di. 12 Dodoo apiya di pa egkepelihay da dé, uman da doo egkedoo sa tegeIslaél owoy egkeseluh da ma dé iya wé tanà Igiptu. Hê, egkelimedangan temù sa tegeIgiptu diyà sa medoo tegeIslaél. 13 Huenan di, tigtu egpelihayen da kagda egpebael sa mepasang galebek. 14 Apiya sa tigtu melikut, ipebael da doo diyà kenagda enù ka egpelihayen da kagda temù, owoy ipebael da ma diyà kenagda sa medoo metegas tanà anì baelan dalesan. Hediya ma, igsugù da ma diyà kenagda sa langun balangan galebek diyà sa tinibah da.
15 Agulé mig-ikagi sa datù tegeIgiptu diyà sa duwa bayi, si Siplah owoy si Puwa, sa tegeesò diyà sa medoo etaw Hibelu.a Guwaen di diyà kenagda, 16 “Na, kiyu i tegeesò, amuk egbuligan yu sa bayi Hibelu eglesutan, amuk maama sa eg-anaken da, imatayi yu. Dodoo amuk bayi, hagtay yu.” 17 Dodoo sa tegeesò si Siplah owoy si Puwa, egpigtuu da diyà si Nemula, huenan di endà migpangunut da diyà sa igsugù sa datù diyà kenagda. Endà eg-imatayan da duu, apiya di pa maama sa inanak da. 18 Agulé igpeangay sa datù dema kagda owoy eg-igsaan di, guwaen di, “Maen di ya endà egpangunutan yu duu sa igsugù ku keniyu owoy eghagtayen yu polo sa medoo maama inanak sa etaw Hibelu?”
19 Migsagbì da, guwaen da, “Siini medoo bayi Hibelu, endà lagà da sa bayi tegeIgiptu. Enù ka mebagel da owoy melemu sa kelesut sa anak da. Huenan di, miglesut dé sa anak da sa egoh ké endà pa egtebow.”
20 Tigtu egkeguwad sa etaw tegeIslaél taman egkedoo da temù. Owoy siedò bayi tegeesò, egtabangan i Nemula kagda. 21 Enù ka danà da egpigtuu diyà kenagdi, egtabangan di kagda anì duen ma sa hagda medoo anak.
22 Agulé migsugù sa datù diyà sa langun etaw di, guwaen di, “Sa langun maama eg-anaken sa tegeIslaél, buungi yu diyà sa lawa't wayeg Nilo. Dodoo amuk bayi sa eg-anaken da, hagtay yu.”