2
Ini Denu Sa Kelesut I Mosis
1 Na, egoh iya, duen sa telesawa etaw Hibelu tugod i Lebi. 2 Mig-obol sa bayi owoy mig-anak maama. Egoh di mighaa tigtu metolol sa batà, iglidung di takà taman telu gebulan. 3 Dodoo egoh di endà dé egkebaluy di duu eglidung sa batà, eg-onomen di sa dakel kampilù owoy eglabulen di gità anì endà meawuhan di wayeg. Agulé egdalemen di sa batà owoy inuwit di diyà sa keluwenluwen diyà sa kilidan wayeg Nilo. 4 Na, sa tebay sa batà, eglidung medapag anì hauwen di sa mebaelan sa hadi di.
5 Na, egoh iya, mig-angay egpedigus sa bayi anak i Palo diyà sa wayeg Nilo owoy eg-unutan ma sa medoo udipen di. Egoh da eg-ipanawpanaw diyà sa ilis wayeg, nehauwan di sa kampilù diyà sa medoo keluwen dahiya. Agulé sinugù di sa sebaen udipen di anì angayen di. 6 Egoh di migkuwa, eg-awangan di owoy iya sa dalem di sa batà maama egsinegaw. Egoh di mighaa, eghiduwan di sa batà owoy guwaen di, “Ini kéen sa anak sa etaw Hibelu.”
7 Agulé miglesut sa kakay sa batà owoy guwaen di diyà sa anak i Palo, “Meiyap ka pa amuk angayen ku sa bayi etaw Hibelu anì pesusuwen ko diyà kenagdi sa batà?”
8 “Hoò,” guwaen sa anak i Palo, “angay ko.” Agulé inangay sa batà sa inay di. 9 Egoh da migtebow, guwaen sa anak i Palo, “Ipat ko siini batà, sukayan ku daa kuna.” Huenan di, egkuwaen doo sa inay di sa hagdi anak owoy eglikù anì ipaten di dema. 10 Agulé egoh sa batà migkedakel dé, inuwit sa inay di diyà siedò anak i Palo. Linomò sa anak i Palo sa batà owoy guwaen di, “Na, danà ku migkuwa kenagdi diyà sa wayeg, si Mosisa sa kepengadan ku kenagdi.”
Ini Sa Egoh I Mosis Migpelaguy Dutu Tanà Midiyan Dò
11 Na sebaen agdaw, egoh i Mosis migkipedu dé, inangay di egtelow sa medoo duma di etaw Hibelu. Hinaa di sa kelikutan da danà sa mepasang galebek da. Hinaa di ma sa duma di etaw Hibelu binalbal sa tegeIgiptu. 12 Egoh di mighaa iya wé, eglangalanga. Hê, endà duen sa liyu etaw hinaa di, huenan di eg-imatayan di iya wé tegeIgiptu owoy iglebeng di diyà sa enay-enay. 13 Agulé egoh di umenaw simag, migpelikù dema Mosis i egtelow sa medoo duma di. Hê, hinaa di sa duwa etaw Hibelu egkeseginalu. Inigsaan di sa egtibabà, guwaen di, “Maen di ya egpelihayen ko siini duma ko, ki anan yu etaw Hibelu?”
14 Migsagbì sa maama, guwaen di, “Keduwan sa egkegaga ko kumukum kenak? Datù ka atu? Imatayan ko ma aken lagà siedò tegeIgiptu inimatayan ko egoh neagdaw?”
Na, egoh i Mosis migdineg iya wé inikagi di, nelenawan enù ka guwaen di diyà sa pedu di, “Ay, miglalag doo sa binaelan ku diyà siedò tegeIgiptu.”
15 Na, egoh i Palo migdineg denu sa binaelan i Mosis, iya sa ungayà di meimatayan Mosis i. Dodoo migpelaguy polo eg-angay dutu tanà Midiyan dò. Egoh di migtebow dutu, migpenuu medapag diyà sa paligì. 16 Agulé migtebow sa pitu bayi anak i Hételob sa tegesimbà dutu Midiyan dò. Eg-angay da egkuwa wayeg anì peinemen da sa medoo hinagtay sa emà da kebilibili owoy kambing. 17 Agulé duen ma sa medoo liyu tegeipat kebilibili migtebow owoy eghemagawan da siedò medoo hinagtay i Hételo. Egoh i Mosis mighaa iya wé, eg-alukan di siedò medoo bayi owoy egbuligan di ma kagda egpeinem sa medoo hinagtay da.
18 Na, egoh da miglikù, eg-igsaan sa emà da kagda, guwaen di, “Maen di ya medelamet yu eglikù ini egoh di?”
19 Migsagbì da, guwaen da, “Mapes ké eglikù enù ka duen sa etaw tegeIgiptu migtabang kenami egoh sa medoo liyu tegeipat hinagtay mighemaga kenami kedu diyà sa paligì. Binuligan di kami egkuwa wayeg owoy pineinem di ma sa medoo kebilibili ta.”
20 “Kenà di dé igoh?” guwaen sa emà da. “Maen di ya sinalidan yu kagdi? Angay yu anì kumaen ma diyà kenita.”
21 Huenan di, egkeiyap ma Mosis i eg-ugpà diyà kenagda. Agulé ipesawa i Hételo diyà si Mosis sa sebaen anak di, si Sipola. 22 Agulé egoh da nesesawa, mig-anak maama Sipola i. Pinengadanan i Mosis sa anak di si Gilsom, owoy guwaen di, “Iya sa kepengadan ku kenagdi enù ka beken a tigtu etaw diyà siini tanà Midiyan.”
23 Na, egoh di nelugay dé, nematay siedò datù diyà sa tanà Igiptu. Dodoo tapay doo egkeudipen sa medoo tegeIslaél dutu. Huenan di, tigtu da egsinegaw owoy takà da egpegeni diyà si Nemula danà sa dakel lihay da. 24 Dinineg i Nemula sa kepegeni da tabang, owoy endà nelipengan di duu sa igpasad di diyà sa medoo tupù da, si Ablaham owoy si Isak owoy si Hakob. 25 Netiigan di ma neudipen sa medoo tegeIslaél dutu Igiptu dò, huenan di eghiduwan di kagda.