3
Ini Sa Egoh I Nemula Migsugù Si Mosis Eg-angay Igiptu Dò
1 Na, sebaen agdaw egoh i Mosis eg-ipat sa medoo kebilibili owoy kambing sa nugangan di si Hételo, sa tegesimbà dutu tanà Midiyan dò, inuwit di sa medoo hinagtay dutu dibaluy sa melabel tanà mediyù dalesan. Nekeuma diyà sa Getan Sinay pinengadanan da ma sa getan i Nemula. 2 Egoh i Mosis diyà sa esudan siedò getan, migtelabuk sa Egsugùsuguen i Nemulaa diyà kenagdi. Dodoo iya daa sa hinaa i Mosis sa legleg apuy diyà sa tukééy kayu. Eg-inengtengen di sa eglegleg dodoo endà ma egkeulow di. 3 “Maen iya wé?” guwaen di. “Pedapag a polo anì hauwen ku siini egkegaipan ku, sa pesuwan di endà meulow sa tukééy kayu.”
4 Dodoo egoh i Mosis egdapag, inumow i Datù Nemula kagdi kedu diyà siedò eglegleg, guwaen di, “O Mosis, Mosis.”
Migsagbì Mosis i, guwaen di, “Kaini a doo.”
5 Guwaen i Nemula, “Yaka dé eg-angay ya egpedapag. Lengà ko sa talumpà ko, enù ka mapulù siini tanà egtigdegan ko danà ku migtenà dahini. 6 Aken si Nemula sa egpigtuuwen sa medoo tupù ko, si Ablaham owoy si Isak owoy si Hakob.” Na, egoh i Mosis migdineg iya wé, egdilungan di sa palas di enù ka egkelimedangan eghaa si Nemula.
7 Agulé mig-ikagi Datù Nemula i diyà kenagdi, guwaen di, “Tigtu hinaa ku dé sa dakel lihay sa medoo etaw ku dutu Igiptu dò. Dinineg ku ma sa kepegeni da tabang diyà kenak danà sa kepelihay sa ulu-ulu da kenagda, owoy tigtu eghiduwan ku kagda. 8 Huenan di, migtenà a anì alukan ku kagda kedu diyà sa egkegaga sa medoo tegeIgiptu. Launen ku kagda kedu diyà siedò tanà owoy uwiten ku ma kagda mangay diyà sa melabel tanà kebaluyan sa langun hinemula. Iya sa tanà kenà da eg-ugpà ini egoh di sa medoo etaw tegeKanan owoy sa etaw Hétiyo owoy sa etaw Amoliya owoy sa etaw Pélisiya owoy sa etaw Hibiyo owoy sa etaw Hébusiyo. 9 Dinineg ku doo sa kepegeni sa medoo etaw ku tabang diyà kenak owoy netiigan ku ma doo sa kepelihay sa medoo tegeIgiptu kenagda. 10 Huenan di, peangayen ku kuna diyà si Palo sa datù tanà Igiptu dò anì uwiten ko kedu dutu sa medoo etaw ku tugod i Islaél.”
11 “Yaka,” guwaen i Mosis egsagbì diyà si Nemula. “Beken aken sa mekeangay diyà sa taengan i Datù Palo anì uwiten ku sa medoo etaw tegeIslaél kedu Igiptu dò.”
12 Guwaen i Nemula, “Yaka egkebukul la, enù ka aken doo sa duma ko. Owoy ini ma sa tandà di aken sa migpeangay keniko. Amuk meuwit ko sa medoo etaw ku kedu Igiptu dò, diyà siini getan doo sa kenà yu sumimbà diyà kenak.”
13 Dodoo mig-ikagi Mosis i diyà si Nemula, guwaen di, “Upama amuk mangay a diyà sa medoo tegeIslaél owoy tulonen ku diyà kenagda aken sa pineangay i Nemula sa egpigtuuwen sa medoo tupù ta, igsaen da kéen ngadan sa migpeangay kenak. Amuk hediya, ngadan sa isagbì ku diyà kenagda?”
14 Guwaen i Nemula, “Aken si Nemula endà duen inedungan owoy endà duen ketamanan. Huenan di, ini sa tulon ko diyà kenagda, guwaen ko, ‘Si Nemula endà duen inedungan owoy endà duen ketamanan sa migpeangay kenak.’” 15 Guwaen ma i Nemula, “Tulon ko ma diyà sa medoo tegeIslaél, guwaen ko, ‘Si Datù Nemulab, sa Nemula egpigtuuwen sa medoo tupù ta, si Ablaham owoy si Isak owoy si Hakob, kagdi sa migpeangay kenak diyà keniyu.’ Tulon ko iya wé diyà kenagda enù ka iya sa kepengadan da kenaken mesetugodtugod taman melugay.
16 “Na, ipanaw ka dé. Amuk tumebow ka dutu, setipon ko sa medoo ulu-ulu etaw tegeIslaél. Tulon ko diyà kenagda, guwaen ko, ‘Si Datù Nemula sa Nemula egpigtuuwen sa medoo tupù ta, si Ablaham owoy si Isak owoy si Hakob, sa migpehaa diyà kenak. Owoy guwaen di hinaa di sa kebael sa medoo tegeIgiptu diyà keniyu. 17 Owoy guwaen di ma ungayà di launen di kiyu kedu diyà Igiptu sa kenà yu egkepelihay. Uwiten di kiyu mangay diyà sa melabel tanà kebaluyan sa langun hinemula, sa tanà kenà da eg-ugpà ini egoh di sa medoo etaw tegeKanan owoy sa etaw Hétiyo owoy sa etaw Amoliya owoy sa etaw Pélisiya owoy sa etaw Hibiyo owoy sa etaw Hébusiyo.’ 18 Iya sa ikagi ko diyà sa medoo ulu-ulu tegeIslaél anì pigtuuwen da kuna.
“Agulé enggat ko sa medoo ulu-ulu tegeIslaél mangay diyà sa datù diyà sa tanà Igiptu. Owoy ikagi ko diyà kenagdi, guwaen ko, ‘Si Datù Nemula, sa Nemula egpigtuuwen ké, sa migpehaa diyà kenami i etaw Hibelu. Huenan di, egpegeniyen ké sa keipanaw ké taman telu agdaw anì mangay ké dutu siedò melabel tanà mediyù dalesan anì mimatay ké hinagtay enù ka iya sa adat kesimbà ké diyà si Datù Nemula sa egpigtuuwen ké.’ 19 Iya sa ikagi ko diyà sa datù tanà Igiptu, dodoo tapay dé netiigan ku endà pandayaen di duu kiyu amuk endà metegel di. 20 Huenan di, ipehaa ku diyà kenagdi sa tunung ku. Pigtamayan ku sa medoo tegeIgiptu danà sa medoo egkegaipan etaw baelan ku diyà kenagda. Amuk meubus iya wé, pandayaen di doo kiyu lumegkà. 21 Owoy ini ma sa baelan ku amuk lumegkang yu, pepionen ku sa pedu sa medoo tegeIgiptu diyà keniyu anì metawag da megay diyà keniyu anì dumuen sa uwiten yu amuk mipanaw yu. 22 Huenan di, mekepegeni sa langun bayi tegeIslaél diyà sa duma da tegeIgiptu nesedapag dalesan owoy diyà sa bayi tegeIgiptu eg-ugpà diyà kenagda. Pegeniyen da sa medoo imu-imu binaelan da bulawan owoy pilak owoy sa medoo ginis ma anì ipekawal yu diyà sa medoo anak yu. Amuk hediya, lagà kedanan yu sa langun taman sa medoo tegeIgiptu.”