4
Ini Sa Egoh I Nemula Migbegay Diyà Si Mosis Sa Egkegaga Di Egbael Panduan
1 Agulé migsagbì Mosis i diyà si Nemula, guwaen di, “Ngadan sa baelan ku amuk endà migtuu sa medoo tegeIslaél diyà kenak, amuk guwaen da endà migpehaa ka diyà kenak?”
2 Agulé guwaen i Datù Nemula diyà kenagdi, “Ngadan iya wé egsabaan ko?”
“Tuked,” guwaen i Mosis.
3 Guwaen i Datù Nemula, “Dugsui ko diyà tanà.”
Hê, egoh i Mosis migdugsù sa tuked, petow dé nebaluy uled. Eg-esud-esud Mosis i enù ka egkelimedangan. 4 Dodoo guwaen i Datù Nemula diyà kenagdi, “Kuwa ko dema, sabai ko sa ikug di.” Huenan di, egoh i Mosis migsabà sa ikug di, nebaluy dema tuked. 5 Agulé guwaen i Nemula, “Éhê iya sa baeli ko anì pigtuuwen da sa egoh ku migpehaa a diyà keniko, aken i Datù Nemula, sa Nemula egpigtuuwen sa medoo tupù da, si Ablaham owoy si Isak owoy si Hakob.”
6 Agulé guwaen i Datù Nemula dema, “Lusud ko sa belad ko diyà sa igkawal ko.” Agulé egoh i Mosis miglusud sa belad di diyà sa igkawal di owoy linaun di dema, migkebulà dé enù ka nebaluy dempid.
7 Hê, mig-ikagi dema Datù Nemula i, guwaen di, “Lusud ko dema sa belad ko.” Hê, migpangunut Mosis i. Egoh di miglaun dema sa belad di, petow dé nekedan sa dempid di.
8 Agulé guwaen i Datù Nemula, “Amuk endà migtuu sa medoo tegeIslaél diyà keniko owoy amuk endà ma metuuwan da diyà siini muna egkegaipan etaw egbaelan ko, migtuu da doo diyà sa keduwa panduan. 9 Dodoo amuk endà pa migtuu da diyà siini duwa panduan owoy amuk endà ma pigtuuwen da duu sa tinulon ko diyà kenagda, kuwa ka sa wayeg kedu diyà sa lawa't wayeg Nilo owoy buwah ko diyà sa netikal tanà anì mebaluy depanug iya wé wayeg.”
10 Agulé guwaen i Mosis dema diyà si Nemula, “O Datù, beken aken hedem sa egsuguen ko, enù ka endà tigtu di metumàmà sa keikagi ku edung egoh anay taman sa egoh ko mig-ikagi diyà kenak ini egoh di. Endà mebehol sa keikagi ku enù ka endà iseg di egkekiwol sa dilà ku.”
11 Dodoo migsagbì Datù Nemula i, guwaen di, “Ngadan di etaw sa migbael sa ebà sa etaw amuk beken aken? Owoy ngadan di etaw ma sa egpebisu etaw ataw ka egpebuneg sa etaw? Owoy ngadan di etaw ma sa egpeilag sa etaw ataw ka egpelangap sa etaw? Aken i Datù Nemula doo sa egpekebael langun iya wé. 12 Na, ipanaw ka dé. Tabangan ku pa kuna anì mepion sa keikagi ko owoy itulù ku ma diyà keniko sa ikagiyen ko.”
13 Dodoo migsagbì Mosis i, guwaen di, “Yaka, o Datù. Tigtu egpegeniyen ku sa liyu etaw polo sa peangayen ko dutu.”
14 Hê, binulitan i Datù Nemula Mosis i. Guwaen di, “Duen sa kakay ko si Alon tugod i Lebi. Netiigan ku metumàmà sa keikagi di. Eg-ipanaw dé eg-angay tumelabuk keniko, owoy tigtu meanggan amuk mesehaa yu. 15 Huenan di, tulon ko diyà kenagdi sa langun inikagi ku diyà keniko owoy anì selepangan di ma diyà sa medoo duma yu. Tabangan ku kiyu sa ikagiyen yu owoy itulù ku ma diyà keniyu sa baelan yu. 16 Lagà sa ebà ko si Alon enù ka kagdi sa mikagi diyà sa medoo etaw, owoy lagà ka Nemula di enù ka kuna sa tumulù kenagdi sa langun ikagiyen di. 17 Uwit ko ma siini tuked ko enù ka iya sa ibael ko panduan egkegaipan etaw.”
Ini Sa Egoh I Mosis Migpelikù Dutu Igiptu Dò
18 Agulé miglikù Mosis i anì umebal diyà sa nugangan di, si Hételo. Egoh di migtebow, guwaen di, “O Momò, ungayà ku pelikù a diyà sa medoo duma ku dutu Igiptu dò anì metiigan ku sa keugpà da.” Agulé hinoò sa nugangan di, guwaen di, “Mebaluy mipanaw ka dé.”
19 Na, egoh i Mosis pelà diyà sa tanà Midiyan, mig-ikagi Datù Nemula i diyà kenagdi, guwaen di, “Pelikù ka dutu Igiptu dò, enù ka nematay dé sa langun etaw egkelukuy mimatay keniko.” 20 Agulé inuwit i Mosis sa sawa di owoy sa duwa anak da owoy pinekudà di kagda diyà sa asnu enù ka mipanaw da mangay Igiptu dò. Inuwit di ma sa tuked di igpeuwit i Nemula diyà kenagdi.
27 Na, egoh da i Mosis endà pa migtebow dutu Igiptu dò, mig-ikagi Datù Nemula i diyà si Alon, guwaen di, “Angay ko siegung Mosis i dutu siedò melabel tanà mediyù dalesan.” Huenan di, siniegung i Alon Mosis i diyà siedò getan pinengadanan da getan i Nemula. Egoh da nesehaa, pinengadekan di. 28 Agulé tinulon i Mosis diyà si Alon sa langun inikagi i Datù Nemula diyà kenagdi, lapeg sa medoo panduan egkegaipan etaw ipebael i Nemula diyà kenagdi. 29 Agulé neseunut da dema eg-angay dutu Igiptu dò anì setiponen da sa langun ulu-ulu tegeIslaél. 30 Egoh da nesetipon, tinulon i Alon diyà kenagda sa langun inikagi i Datù Nemula diyà si Mosis, owoy binaelan i Mosis ma diyà sa taengan da sa medoo panduan egkegaipan etaw. 31 Agulé migpigtuu dé sa medoo tegeIslaél. Egoh da neketiig eghiduwan i Datù Nemula kagda owoy netiigan di ma sa lihay da, egligkued da eg-olò si Nemula.