5
Ini Sa Egoh Da I Mosis Mig-angay Diyà Si Palo
1 Agulé mig-angay Mosis i owoy si Alon diyà si Palo sa datù tegeIgiptu. Egoh da migtebow, guwaen da, “O Datù, ini sa kagi i Datù Nemula, sa Nemula egpigtuuwen sa medoo tegeIslaél, guwaen di, ‘Pandayà ko siini medoo etaw ku mipanaw dutu siedò melabel tanà mediyù dalesan, anì sumimbà da diyà kenak dutu.’”
2 Dodoo migsagbì Palo i, guwaen di, “Ngadan di etaw iya wé Datù Nemula? Ngadan di etaw sa egsugù kenak anì pandayaen ku sa medoo tegeIslaél mipanaw? Endà egkilalaen ku duu iya wé Datù Nemula tinulon yu, owoy endà ma pandayaen ku duu sa medoo tegeIslaél mipanaw.”
3 Agulé guwaen i Mosis owoy si Alon, “Tigtu migpehaa diyà kenami sa Nemula egpigtuuwen ké, kami i medoo Hibelu. Huenan di, pandayà ko kami, hih, mipanaw taman telu agdaw anì mangay ké dutu siedò melabel tanà mediyù dalesan anì mimatay ké hinagtay enù ka iya sa adat kesimbà ké diyà si Datù Nemula sa egpigtuuwen ké. Amuk endà mangay ké dutu, pigtamayan di kami kéen danà sa linadu ataw ka gila.”
4 Dodoo migsagbì sa datù tegeIgiptu diyà si Mosis owoy si Alon, guwaen di, “Maen di ya egbogowen yu sa medoo etaw eggalebek? Pelikù yu dé diyà sa galebek yu. 5 Tigtu subela dé sa kedoo yu etaw Hibelu. Ungayà yu kéen igoh peetuden yu kagda diyà sa galebek da.”
6 Hê, iya ma dé sa agdaw egoh i Datù Palo migsugù diyà sa medoo ulu-ulu tegeIgiptu owoy sa medoo tegebantay sa etaw tegeIslaél. Guwaen di diyà kenagda, 7 “Edung ini egoh di yoko dé egbegayan duu sa medoo tegeIslaél sa legami iamut da diyà sa tanà egpetegasen da anì kagda dé polo sa mangay kumuwa sa legami iamut da. 8 Dodoo hediya mendaa sa kedoo baelan da lagà sa egoh muna. Endà mesiat di apiya sebaen. Egpauk da dé, huenan di egpegeni da diyà kenak anì mangay da sumimbà diyà sa nemula da. 9 Umani yu pa pelikut sa galebek da anì endà dé duen ulas da dumineg sa medoo butbut da i Mosis.”
10 Agulé mig-angay sa medoo ulu-ulu tegeIgiptu owoy sa medoo tegebantay tegeIslaél egtulon diyà sa medoo tegeIslaél. Guwaen da, “Ini sa kagi i Datù Palo, endà dé mebegayan ké kiyu uman sa legami. 11 Kiyu dé polo sa mangay kumuwa sa legami iamut yu diyà sa tanà, sumalà dé sa kenà yu mekehaa. Dodoo sa kedoo metegas tanà egbaelan yu, endà kumulang di apiya sebaen daa.”
12 Agulé nesepalak sa medoo tegeIslaél diyà sa uwang tanà Igiptu, enù ka eglagbeten da sa legami iamut da diyà sa tanà. 13 Tigtu egpegesen sa medoo ulu-ulu kagda egpegalebek, guwaen da, “Téél yu dé. Ubus yu dé sa kedoo egbaelan yu metegas tanà uman agdaw, éhê mendaa sa kedoo binaelan yu egoh muna egoh yu pelà egbegayan legami.” 14 Agulé egtapesen sa medoo ulu-ulu sa medoo pinebantay da tegeIslaél diyà sa medoo eggalebek. Owoy guwaen da, “Maen di ya kulang sa kedoo binaelan yu metegas tanà, enù ka beken éhê sa kedoo di egoh muna?”
15 Agulé mig-angay sa medoo tegebantay diyà si Palo anì tulonen da sa kelikutan da. Guwaen da, “O Datù Palo, maen di ya egbaelan ko ini i diyà kenami, kami i egsugùsuguen ko? 16 Enù ka tinegel da kami takà egpebael sa metegas tanà, apiya di pa endà dé binegayan ké legami. Owoy tinapes da ma kami, apiya di pa beken nami salà, dodoo sa etaw ko polo sa épê salà enù ka endà egbegay da legami diyà kenami.”
17 Migsagbì Datù Palo i, guwaen di, “Tigtu pauken yu etaw. Meked yu dé gumalebek. Huenan di, takà yu egpegeni diyà kenak anì pandayaen ku kiyu mangay mimatay sa hinagtay ibegay yu diyà si Datù Nemula. 18 Na, pelikù yu polo diyà sa galebek yu. Endà duen legami mekebegay diyà keniyu, dodoo nesetepeng doo sa kedoo metegas tanà egbaelan yu éhê mendaa sa kedoo di egoh muna.”
19 Agulé melikutan sa pedu sa tegebantay etaw tegeIslaél egoh da migdineg sa inikagi i Palo, guwaen di nesetepeng doo sa kedoo metegas tanà egbaelan da uman agdaw, lagà mendaa sa egoh muna, apiya di pa endà dé mebegayan da legami. 20 Egoh da migsalid diyà si Palo, hinaa da Mosis i owoy si Alon eg-angat-angat kenagda. 21 Guwaen da diyà kenagda, “Mepigtamayan i Datù Nemula doo kiyu danà sa binaelan yu diyà kenami. Enù ka kiyu sa pesuwan di egkelepuhan i Palo owoy sa medoo salu di kami. Egbaelan yu daa sa pesuwan da mimatay kenami.”
Ini Sa Egoh I Nemula Migpeeles Sa Pasad Di Lumaun Sa Medoo Etaw Di
22 Agulé mig-angay dema Mosis i eg-ikagi diyà si Datù Nemula, guwaen di, “O Datù ku, maen di ya hediya sa kepelihay ko siini medoo etaw ko? Maen di ya pineangay ko aken dini? 23 Enù ka edung sa egoh ké mig-angay diyà si Palo anì tulonen ké diyà kenagdi sa langun inikagi ko, egbaelan di polo sa tigtu medaet diyà siini medoo etaw ko. Owoy endà duen sa binaelan ko anì alukan ko kagda.”