6
1 Agulé mig-ikagi Datù Nemula i diyà si Mosis, guwaen di, “Na, hauwen ko doo sa baelan ku diyà si Palo. Danà sa dakel egkegaga ku, tegelen ku diyà kenagdi pelegkà sa medoo etaw ku. Beken uloy daa sa kepelegkà di kenagda, dodoo hemagawan di polo kagda kedu diyà sa tanà di.”
2 Na, guwaen i Nemula ma diyà si Mosis, “Aken si Datù Nemula. 3 Migpehaa a diyà si Ablaham owoy si Isak owoy si Hakob egoh anay. Tinulon ku diyà kenagda aken si Nemula épê dakel egkegaga. Dodoo endà igpehaa ku duu diyà kenagda sa kenemulawan ku nekeunut diyà sa ngadan ku si Datù Nemula. 4 Igpasad ku ma sa kebegay ku diyà kenagda sa tanà Kanan sa kenà da mig-ugpà egoh iya, apiya di pa beken da tigtu etaw dahiya. 5 Na, dinineg ku ma sa kesinegaw sa medoo tegeIslaél danà da inudipen sa tegeIgiptu, owoy netulengan ku ma sa igpasad ku diyà sa medoo tupù yu egoh anay.
6 “Huenan di, tulon ko diyà sa medoo tegeIslaél sa kagi ku, guwaen ku, ‘Aken si Datù Nemula. Tigtu launen ku kiyu kedu diyà sa kepelihay sa medoo tegeIgiptu keniyu, owoy launen ku ma kiyu kedu diyà sa egoh yu neudipen diyà kenagda. Tigtu pigtamayan ku ma kagda danà sa dakel egkegaga ku owoy alukan ku ma kiyu. 7 Tigtu ipaten ku kiyu i tegeIslaél, enù ka mebaluy dé kiyu sa etaw ku owoy aken sa Nemula egpigtuuwen yu. Amuk hediya, metiigan yu doo aken si Datù Nemula amuk launen ku kiyu kedu diyà sa kepelihay sa medoo tegeIgiptu keniyu. 8 Owoy uwiten ku ma kiyu diyà sa tanà igpasad ku egoh anay ibegay diyà si Ablaham owoy si Isak owoy si Hakob. Tigtu ibegay ku diyà keniyu anì meniyu iya wé tanà. Mebaelan ku iya wé enù ka aken si Datù Nemula.’”
9 Agulé tinulon i Mosis langun iya wé diyà sa medoo tegeIslaél, dodoo endà egpigtuuwen da duu enù ka egkesemek da dé danà di tigtu migkedaet sa lihay da.
10 Agulé mig-ikagi Datù Nemula i diyà si Mosis, guwaen di, 11 “Angay ko dema tulon diyà si Palo sa datù diyà sa tanà Igiptu anì pandayaen di sa medoo tegeIslaél lumegkà kedu diyà sa tanà di.”
12 Dodoo migsagbì Mosis i, guwaen di, “Endà pigtuuwen i Datù Palo duu kéen sa kagi ku. Enù ka amuk endà egpigtuu sa medoo duma ku tegeIslaél, labi pa egpigtuu Palo i, enù ka endà tigtu di metumàmà sa keikagi ku.”