Éksodo 7

Ini Sa Egoh I Nemula Migpepelikù Si Mosis Diyà Si Datù Palo

¹ Agulé mig-ikagi Datù Nemula i diyà si Mosis, guwaen di, “Taa ko, hih. Pelagaen ku kuna Nemula diyà sa kehaa i Palo. Owoy lagà tegesugkow ko sa kakay ko si Alon. ² Tulon ko diyà si Alon sa langun eg-ikagiyen ku diyà keniko. Hê, kagdi dema sa tumulon diyà si Palo anì pandayaen di sa medoo tegeIslaél lumegkà kedu diyà sa tanà di. ³ Dodoo endà mebaluy di diyà kenagdi enù ka petegasen ku sa pedu di. Apiya di pa medoo sa panduan egkegaipan etaw egbaelan ku diyà sa tanà Igiptu, ⁴ tapay doo endà migtuu di diyà keniyu. Huenan di, hauwen da sa kebulit ku egoh ku tigtu migtamay kenagda danà sa egkegaga ku, owoy uwiten ku ma kiyu kedu dutu, kiyu i etaw ku tegeIslaél. ⁵ Agulé metiigan sa medoo tegeIgiptu aken si Datù Nemula amuk hauwen da sa kepigtamay ku kenagda owoy amuk uwiten ku ma kiyu kedu diyà sa tanà da.”

⁶ Na, pinangunutan i Mosis owoy si Alon doo sa langun igsugù i Datù Nemula diyà kenagda. ⁷ Egoh da mig-angay eg-ikagi diyà si Palo, walu pulù gepalay dé sa kelukes i Mosis, owoy walu pulù owoy telu gepalay sa kakay di si Alon.

Ini Sa Egoh Di Nebaluy Uled Sa Tuked I Alon

⁸ Na, ini ma sa kagi i Datù Nemula diyà si Mosis owoy si Alon, ⁹ guwaen di, “Amuk isugù i Palo diyà keniyu anì baelan yu sa panduan sa tandà di kiyu sa pineangay ku, sugui ko diyà si Alon anì idugsù di sa tuked di diyà sa taengan i Palo anì mebaluy uled.”

¹⁰ Huenan di, mig-angay da Mosis i diyà si Datù Palo owoy binaelan da sa igsugù i Datù Nemula diyà kenagda. Agulé igdugsù i Alon sa tuked di diyà sa taengan i Palo owoy sa medoo salu di. Hê, nebaluy dé uled. ¹¹ Agulé igpeangay i Palo sa medoo milantek etaw tegeIgiptu owoy sa medoo tegebael balitmata. Egbaelan da ma sa lagà mendaa binaelan i Alon danà sa balakat da. ¹² Sigbaenbaenay da egdugsù sa hagda ma tuked owoy nebaluy ma uled. Dodoo inamah sa tuked i Alon sa langun tuked da nebaluy uled. ¹³ Dodoo apiya di pa hinaa i Palo iya wé, egketegas doo sa pedu di owoy endà ma egpigtuu di diyà sa inikagi da i Mosis, lagà mendaa sa tinulon i Datù Nemula.

Ini Sa Egoh Di Nebaluy Depanug Sa Langun Lawa't Wayeg Diyà Igiptu

¹⁴ Agulé guwaen i Datù Nemula diyà si Mosis, “Tigtu metegas pelà sa ulu i Palo, owoy endà pa egpandayaen di duu kiyu i etaw ku lumegkà. ¹⁵ Huenan di, amuk sumimag, angay ko telabuk si Datù Palo amuk mangay wayeg dò owoy uwit ko ma siedò tuked yu atung egkebaluy uled. Angati ko diyà sa ilis sa wayeg Nilo. ¹⁶ Ikagi ko diyà kenagdi, guwaen ko, ‘Si Datù Nemula sa egpigtuuwen ké, kami i etaw Hibelu, kagdi sa migpeangay kenak diyà keniko. Ini sa kagi di diyà keniko, guwaen di, peipanaw ko dé gaa sa medoo etaw di tegeIslaél anì mangay da sumimbà diyà kenagdi dutu siedò melabel tanà mediyù dalesan. Dodoo taman ini egoh di, endà egpigtuuwen ko duu sa kagi di. ¹⁷ Huenan di, ini ma sa kagi i Datù Nemula. Duen gaa sa baelan di ini egoh di anì metiigan ko kagdi si Datù Nemula. Itapes ku siini tuked egsabaan ku diyà sa wayeg Nilo anì mebaluy depanug siini wayeg. ¹⁸ Mematay sa langun sedà di, owoy memahù ma sa wayeg. Huenan di, endà mekeinem sa medoo tegeIgiptu sa wayeg di.’”

¹⁹ Agulé guwaen i Datù Nemula diyà si Mosis, “Sugui ko diyà si Alon anì soyolen di sa tuked di diyà sa lawa't wayeg Nilo. Hediya ma sa baelan di diyà sa selatal sa medoo liyu lawa't wayeg anì mebaluy depanug sa langun wayeg diyà sa tanà Igiptu, iling ka sa wayeg egdelug ataw ka sa nesetebugtebug ataw ka sa kinuwa dé etaw. Apiya sa wayeg dalem sa buyung da owoy diyà sa liyu taguan, anan da ma mebaluy depanug.”

²⁰ Agulé pinangunutan i Mosis owoy si Alon doo sa langun igsugù i Datù Nemula. Egsoyolen i Alon sa tuked di diyà sa taengan i Datù Palo owoy sa medoo salu di, owoy tinapes di ma sa wayeg Nilo. Hê, petow dé nebaluy depanug sa langun wayeg di. ²¹ Nematay sa langun sedà owoy tigtu migkemahù ma sa wayeg. Huenan di sa medoo tegeIgiptu, endà dé egkeinem da duu. Hê, nebaluy dé depanug sa langun wayeg diyà sa tanà Igiptu.

²² Dodoo hediya ma sa binaelan sa medoo tegebael balitmata diyà Igiptu, enù ka binaluy da ma depanug sa wayeg danà sa balakat da. Huenan di, egketegas sa pedu i Palo owoy endà ma egpigtuuwen di duu sa kagi da i Mosis, lagà mendaa sa tinulon i Datù Nemula. ²³ Agulé eglikù polo Datù Palo i, owoy endà egsagipaen di duu iya wé hinaa di. ²⁴ Na, ini sa egbaelan sa medoo tegeIgiptu, egkalì da diyà sa ilis sa wayeg Nilo anì duen sa kenà da kumuwa wayeg, enù ka endà dé egkeinem da duu sa wayeg diyà sa lawa't wayeg Nilo.

Ini Sa Egoh Di Migsubela Sa Bakbak Diyà Sa Tanà Igiptu

²⁵ Na, pitu dé agdaw migtalà egoh i Datù Nemula migbaluy depanug sa lawa't wayeg Nilo.