8
1 Agulé mig-ikagi dema Datù Nemula i diyà si Mosis, guwaen di, “Angay ka dema tulon diyà si Datù Palo, guwaen ko diyà kenagdi, ‘Ini sa kagi i Datù Nemula, peipanaw ko gaa sa medoo etaw di anì mangay da sumimbà diyà kenagdi. 2 Dodoo amuk endà lengaan ko duu kagda, beleten di gaa sa medoo bakbak sa langun tanà ko. 3 Pedoowen di gaa kagda temù diyà sa lawa't wayeg Nilo, huenan di gumaun da mangay diyà sa dalesan ko. Endà duen sa tayu kenà endà duen bakbak sa dalem dalesan ko ataw ka sa tudugan ko, enù ka anan dé bakbak. Hediya ma diyà sa medoo dalesan sa medoo salu ko owoy sa langun dalesan sa etaw tegeIgiptu. Lawayen ma bakbak sa apuyanan yu owoy sa bilu kenà yu egpelenuk epan. 4 Lumaway da ma diyà keniko owoy diyà sa medoo salu ko owoy diyà sa langun etaw tegeIgiptu.’”
5 Agulé mig-ikagi Datù Nemula i diyà si Mosis, guwaen di, “Tulon ko diyà si Alon anì soyolen di sa tuked di denu sa medoo lawa't wayeg owoy linaw anì gumaun sa medoo bakbak diyà sa langun tanà Igiptu.”
6 Agulé sinoyol i Alon sa tuked di selatal sa langun wayeg diyà Igiptu. Hê, miggaun sa medoo bakbak, taman nebelet bakbak sa langun tanà Igiptu. 7 Dodoo sa medoo tegebael balitmata, hediya ma sa egbaelan da, egpegaunen da ma sa medoo bakbak danà sa balakat da.
8 Agulé igpeangay i Datù Palo Mosis i owoy si Alon. Egoh da migtebow, guwaen di diyà kenagda, “Simbai yu diyà si Datù Nemula anì kedanan di diyà kenami siini medoo bakbak. Amuk mekedan, pandayaen ku dé sa medoo etaw yu mipanaw anì mangay da mimatay sa hinagtay ibegay da diyà si Datù Nemula.”
9 Migsagbì Mosis i diyà si Palo, guwaen di, “Ikagi ko daa diyà kenak nengan sa gai egoh ku sumimbà denu keniko owoy denu sa medoo salu ko owoy sa medoo etaw ko anì mekedan siini medoo bakbak diyà keniyu owoy diyà sa dalesan yu ma, liyu daa sa nesamà dutu siedò wayeg Nilo.”
10 “Simag,” guwaen i Palo.
“Enù,” guwaen i Mosis, “baelan ku sa inikagi ko anì metiigan ko endà duen sa liyu nemula neketepeng si Datù Nemula sa egpigtuuwen ké. 11 Simag mekedan sa langun bakbak diyà sa dalesan ko lapeg diyà sa dalesan sa medoo salu ko owoy diyà sa medoo dalesan sa etaw ko ma, liyu daa sa mesamà dutu siedò wayeg Nilo.”
12 Agulé egoh da i Mosis migsalid diyà si Palo, egsimbà Mosis i diyà si Datù Nemula anì kedanan di sa medoo bakbak pineangay di diyà si Palo. 13 Binaelan i Datù Nemula doo sa pinegeni i Mosis. Hê, nematay sa langun bakbak diyà sa medoo dalesan etaw Igiptu owoy diyà sa duwangen da owoy diyà sa tinibah da ma. 14 Dinugkow da siedò medoo bakbak nematay, owoy migkemahù sa uwang tanà Igiptu. 15 Dodoo egoh i Palo mighaa nekedan dé iya wé kelikutan da, migketegas dema sa pedu di owoy endà dema egpigtuu di diyà si Mosis owoy si Alon, lagà mendaa sa inikagi i Datù Nemula.
Ini Sa Egoh Sa Medoo Beneboh Migseluh Diyà Sa Tanà Igiptu
16 Agulé mig-ikagi dema Datù Nemula i diyà si Mosis, guwaen di, “Sugui ko diyà si Alon anì ibalbal di sa tuked di diyà sa tanà, anì mebaluy beneboh sa kepung diyà sa langun tanà Igiptu.” 17 Agulé egoh i Alon migpeayaw sa tuked di, binalbal di sa tanà, hê nebaluy dé beneboh sa langun kepung diyà sa tanà Igiptu. Huenan di, sa langun etaw owoy hinagtay ma, anan dé egbenebohen sa lawa da. 18 Egtukaw da ma egbael hedem sa medoo tegebael balitmata danà sa balakat da, dodoo endà egkegaga da duu egbaluy beneboh sa kepung. Tigtu egkepasangan sa langun etaw owoy sa medoo hinagtay da ma danà sa medoo beneboh.
19 Agulé mig-ikagi sa medoo tegebael balitmata diyà si Palo, guwaen da, “Endà duen sa mekebael éhê ini i amuk beken si Nemula daa.” Dodoo tapay doo metegas sa pedu i Palo, huenan di endà ma egpigtuuwen di duu, lagà mendaa sa inikagi i Datù Nemula.
Ini Sa Egoh Sa Medoo Langaw Migseluh Diyà Sa Tanà Igiptu
20 Agulé mig-ikagi Datù Nemula i diyà si Mosis, guwaen di, “Lapus ka enaw simag anì telabuken ko dema Palo i amuk mangay wayeg dò. Tulon ko diyà kenagdi siini kagi ku, guwaen ko, ‘Ini sa kagi i Datù Nemula, peipanaw ko gaa sa medoo etaw di anì mangay da sumimbà diyà kenagdi. 21 Dodoo amuk endà lengaan ko duu kagda, peangayen di gaa sa langaw tigtu medoo diyà keniko lapeg diyà sa medoo salu ko owoy diyà sa langun etaw ko ma. Meseluh langaw sa medoo dalesan sa tegeIgiptu owoy sa langun kenà da eg-utuh. 22 Dodoo amuk meuma iya wé, tigesa gaa sa baelan di diyà sa uwang tanà Gosen kenà da eg-ugpà sa medoo etaw di. Endà dumuen sa langaw dutu, apiya sebaen, anì metiigan ko gaa kagdi si Datù Nemula sa egsabà ma siini tanà ko. 23 Sengayen di gaa sa mebaelan sa medoo etaw di owoy sa medoo etaw ko ma. Na, simag gaa sa egoh di mael siini egkegaipan etaw.’”
24 Agulé igpetuu i Datù Nemula dé sa inikagi di. Petow dé migtebow sa tigtu medoo langaw owoy eg-awuh da diyà sa dalesan i Palo owoy diyà sa medoo dalesan sa salu di. Medoo sa nedaetan diyà sa tanà Igiptu danà sa medoo langaw.
25 Agulé igpeangay i Datù Palo Mosis i owoy si Alon. Egoh da migtebow, guwaen di diyà kenagda, “Angay yu imatay sa hinagtay ibegay yu diyà sa Nemula yu, dodoo dahini daa diyà sa tanà Igiptu.”
26 Dodoo migsagbì Mosis i, guwaen di, “Endà mebaluy di amuk dahini diyà Igiptu sa kenà ké mimatay sa hinagtay ibegay ké diyà si Datù Nemula sa egpigtuuwen ké, enù ka tigtu melihi diyà sa medoo tegeIgiptu sa balangan hinagtay sumbalien ké. Amuk dahini sa kenà ké egbael sa melihi diyà sa kehaa da, buungen da kami batu anì mematay ké. 27 Huenan di, mekeipanaw ké taman telu agdaw anì mangay ké dutu siedò melabel tanà mediyù dalesan enù ka dutu sa kenà ké mimatay sa ibegay ké diyà si Datù Nemula sa egpigtuuwen ké, enù ka iya sa igsugù di diyà kenami.”
28 Agulé guwaen i Palo, “Mebaluy doo peipanawen ku kiyu mangay dutu siedò melabel tanà mediyù dalesan anì mimatay yu sa hinagtay ibegay yu diyà si Datù Nemula sa egpigtuuwen yu, asal endà tigtu yu pediyù temù. Na, simbai yu aken.”
29 Migsagbì Mosis i, guwaen di, “Amuk salidan ku kuna, sumimbà a diyà si Datù Nemula anì mekedan simag sa langun langaw diyà keniko lapeg diyà sa medoo salu ko owoy diyà sa medoo etaw ko ma. Dodoo yaka dema eg-uman eg-akal kenami danà ko eghawid kenami eg-angay eg-imatay sa hinagtay ibegay ké diyà si Datù Nemula.”
30 Na, egoh da migsalid diyà si Palo, egsimbà dema Mosis i diyà si Datù Nemula. 31 Binaelan i Datù Nemula dema sa pinegeni i Mosis. Hê, nekedan dé sa langun langaw diyà si Palo owoy diyà sa medoo salu di owoy diyà sa medoo etaw di ma. Endà duen sa nesamà, apiya sebaen. 32 Dodoo migketegas dema sa pedu i Palo, owoy endà egpandayaen di duu sa medoo tegeIslaél mipanaw.