9
Ini Sa Egoh Di Nematay Sa Medoo Hinagtay Diyà Sa Tanà Igiptu
1 Agulé mig-ikagi Datù Nemula i diyà si Mosis, guwaen di, “Angay ka dema tulon diyà si Datù Palo, guwaen ko diyà kenagdi, ‘Ini sa inikagi i Datù Nemula sa egpigtuuwen sa medoo etaw Hibelu. Peipanaw ko gaa sa medoo etaw di mangay sumimbà diyà kenagdi. 2 Dodoo amuk endà dema lengaan ko duu kagda mipanaw owoy eg-umanen ko kagda eghawid, 3 pigtamayan di dema gaa kiyu. Peangayen di gaa sa tigtu mepasang linadu diyà sa langun hinagtay yu, iling ka kudà ataw ka asnu ataw ka kamiliyu ataw ka sapì ataw ka kebilibili ataw ka kambing. 4 Dodoo sengayen di gaa sa mebaelan sa medoo hinagtay yu owoy sa medoo hinagtay sa tegeIslaél. Endà duen sebaen hinagtay da mematay.’” 5 Na, tapay dé inatasan i Datù Nemula, guwaen di, “Simag sa egoh ku mael ini i diyà sa uwang tanà Igiptu.”
6 Agulé egoh di umenaw simag, igpetuu i Datù Nemula dé sa tinulon di. Hê, petow dé negelà nematay sa hinagtay sa etaw tegeIgiptu. Dodoo apiya sebaen, endà duen nematay diyà sa medoo hinagtay sa tegeIslaél. 7 Agulé sinugù i Datù Palo sa etaw di anì telowen da sa medoo hinagtay sa tegeIslaél. Tuu ma doo, endà duen sa hinagtay da nematay, apiya sebaen. Dodoo apiya di pa hediya sa nebaelan, tapay doo metegas sa pedu i Palo, owoy endà ma egpandayaen di duu sa medoo tegeIslaél mipanaw.
Ini Sa Egoh Di Nekeseluh Sa Buladut Diyà Sa Medoo TegeIgiptu
8 Agulé mig-ikagi dema Datù Nemula i diyà si Mosis owoy si Alon, guwaen di, “Ekup yu sa abuh diyà sa dakel apuyanan, owoy si Mosis sa sumawel diyà awang diyà sa taengan i Palo. 9 Mebaluy melalimet kepung iya wé abuh anì mekeseluh diyà sa langun tanà Igiptu, anì dumuen sa buladut diyà sa langun etaw lapeg sa medoo hinagtay da ma.”
10 Huenan di, migkuwa da medoo abuh diyà sa dakel apuyanan owoy mig-angay da diyà si Datù Palo. Egoh da migtebow, igsawel i Mosis sa abuh diyà awang. Hê, migduen sa medoo buladut diyà sa langun etaw tegeIgiptu owoy diyà sa langun hinagtay da ma. 11 Apiya sa medoo tegebael balitmata, endà ma dé egpekeangay da egtaeng diyà si Mosis enù ka anan da épê buladut lagà mendaa sa langun etaw tegeIgiptu. 12 Dodoo pinetegas i Datù Nemula doo tapay sa pedu i Palo anì endà egsagipaen di duu sa inikagi da i Mosis, lagà mendaa sa inikagi i Datù Nemula diyà si Mosis.
Ini Sa Egoh Sa Bunga't Udan Migdagpak Diyà Sa Tanà Igiptu
13 Agulé mig-ikagi dema Datù Nemula i diyà si Mosis, guwaen di, “Lapus ka enaw simag, telabuk ko dema Palo ya owoy tulon ko diyà kenagdi siini kagi ku, aken i Datù Nemula sa egpigtuuwen sa medoo Hibelu. Guwaen ko, ‘Pandayà ko dé gaa sa medoo etaw i Nemula anì mangay da sumimbà diyà kenagdi. 14 Dodoo amuk endà dema pandayaen ko duu kagda, tigtu pigtamayan di gaa kuna lapeg sa medoo salu ko owoy sa langun etaw ko tegeIgiptu. Baelan di gaa iya wé anì metiigan ko endà duen sa liyu épê egkegaga diyà siini sinukub langit meketepeng diyà kenagdi. 15 Enù ka amuk peangayen di gaa sa dakel linadu mekepatay diyà keniyu, meimet yu dé hedem mematay. 16 Dodoo endà pelà baelan di duu iya wé, enù ka ungayà di gaa polo kuna pelà sa datù diyà Igiptu anì mehaa ko sa dakel egkegaga di egoh di migtamay keniyu owoy anì lumalag ma diyà sa langun etaw diyà siini sinukub langit. 17 Dodoo tapay ka doo pelawà egpebagelbagel, huenan di endà egpeipanawen ko duu sa medoo etaw di. 18 Huenan di, simag lapus peudanen i Nemula sa meleges bunga't udan mekeiling batu diyà sa uwang tanà Igiptu. Edung egoh anay taman ini egoh di, endà pa duen sa hinaa diyà Igiptu éhê siini meleges bunga't udan. 19 Huenan di, sugui ko anì ipehelung da sa medoo hinagtay yu, enù ka sa langun endà nekepehelung, iling ka etaw ataw ka hinagtay, anan da mematay amuk mesugat da siini bunga't udan.’”
20 Na, egpesu sa duma salu i Palo danà da migdineg sa kagi i Datù Nemula tinulon i Mosis. Huenan di, migpetéél da eg-angay egpehelung sa medoo udipen da owoy sa medoo hinagtay da ma. 21 Dodoo sa medoo duma salu di, endà sinagipà da duu iya wé kagi i Datù Nemula, huenan di egpandayaen da sa medoo udipen da owoy sa medoo hinagtay da diyà sa liyu.
22 Agulé guwaen i Datù Nemula diyà si Mosis, “Begeng ko sa belad ko petodoi ko diyà langit anì menabù sa bunga't udan diyà sa medoo etaw owoy diyà sa medoo hinagtay da owoy diyà sa langun hinemula da diyà sa uwang tanà Igiptu.” 23 Agulé sinoyol i Mosis sa tuked di. Hê, migsilà owoy migpeletê ma danà i Datù Nemula, owoy mig-udan ma dé sa metegas bunga't udan diyà sa uwang tanà Igiptu. 24 Tigtu meleges iya wé bunga't udan, owoy nekebensek ma sa silà. Endà pa duen sa meleges udan hinaa éhê iya wé edung sa egoh sa tanà Igiptu migduen. 25 Na, sa langun etaw ataw ka hinagtay endà nekehelung diyà sa tanà Igiptu, anan da dé nematay danà da nesugat sa bunga't udan. Medoo ma sa nedaetan, enù ka sumalà dé sa nesugat di, anan da nedaetan, iling ka hinemula ataw ka kayu. 26 Iya daa sa endà neumawan bunga't udan sa uwang tanà Gosen kenà sa medoo tegeIslaél eg-ugpà.
27 Agulé igpeangay i Palo Mosis i owoy si Alon. Guwaen di diyà kenagda, “Nesalà a dé ini egoh di. Tigtu metudà sa binaelan i Datù Nemula, dodoo kami i etaw tegeIgiptu sa épê salà. 28 Huenan di, simbai yu diyà si Datù Nemula anì kumedit siini meleges bunga't udan owoy anì sumabuh ma sa kepeletê di, enù ka endà dé egpekegaga ké. Peipanawen ku dé kiyu anì endà dé mekeugpà yu dahini.”
29 Migsagbì Mosis i, guwaen di, “Amuk sumalid a diyà siini menuwa yu, begengen ku sa belad ku amuk sumimbà a diyà si Datù Nemula anì sumabuh sa peletê owoy kumedit ma siini bunga't udan, anì metiigan ko si Datù Nemula daa sa egsabà sa langun uwang tanà. 30 Dodoo netiigan ku doo kuna owoy sa medoo salu ko, endà pelà eg-adatan yu duu Datù Nemula i.”
31 Na, danà iya wé bunga't udan, tigtu nedaetan sa langun hinemula da lino owoy sebada, enù ka netipon diatas dé sa sebada owoy egbulok dé sa lino. 32 Dodoo endà nedaetan sa hinemula da teligo owoy espeltaa enù ka hudihudi da egkelegà.
33 Na, egoh i Mosis migsalid diyà si Palo, miglaun kedu diyà sa menuwa. Agulé binegeng di sa belad di egsimbà diyà si Datù Nemula. Hê, migsabuh sa peletê owoy migkedit ma sa bunga't udan owoy sa udan ma. 34 Dodoo egoh i Palo mighaa migkedit sa bunga't udan owoy migsabuh ma dé sa peletê, migbael dema salà. Migketegas dema sa pedu da lapeg sa medoo salu di. 35 Huenan di, endà lengaan di duu sa medoo tegeIslaél mipanaw, lagà mendaa sa kagi i Datù Nemula igsugkow i Mosis.