10
Ini Sa Egoh Sa Medoo Kasuk Migseluh Diyà Sa Tanà Igiptu
1 Agulé mig-ikagi dema Datù Nemula i diyà si Mosis. Guwaen di, “Angay ka dema diyà si Palo, enù ka pinetegas ku sa pedu di owoy sa pedu sa medoo salu di anì mebaelan ku diyà kenagda siini medoo panduan egkegaipan etaw. 2 Iya sa baelan ku anì tulonen yu diyà sa medoo tugod yu sa egoh ku migpelihay sa medoo tegeIgiptu egoh ku migbael diyà kenagda siini medoo panduan egkegaipan etaw, owoy anì meketiig yu langun aken si Datù Nemula.”
3 Huenan di, mig-angay dema Mosis i owoy si Alon diyà si Palo. Guwaen da diyà kenagdi, “Ini sa kagi i Datù Nemula sa egpigtuuwen ké, kami i etaw Hibelu. Nengan pa gaa sa egoh ko petukééy diyà kenagdi? Pandayà ko dé gaa sa medoo etaw di mipanaw anì sumimbà da diyà kenagdi. 4 Dodoo amuk endà pelà pandayaen ko duu kagda, peangayen di gaa sa kasuk tigtu medoo diyà sa tanà yu simag. 5 Tigtu medoo da temù, huenan di amuk tumenà da, endà hauwen sa tanà. Kaenen da sa langun hinemula yu endà nedaetan di danà siedò bunga't udan, owoy kaenen da ma sa medoo daun kayu. 6 Meseluh kasuk sa dalesan ko owoy sa medoo dalesan salu ko owoy sa langun dalesan sa tegeIgiptu. Edung egoh anay taman ini egoh di, endà nehaa di sa medoo tupù yu sa medoo kasuk éhê ini i mehaa yu.” Iya sa tinulon da i Mosis diyà si Palo, agulé sinalidan da dé.
7 Agulé mig-ikagi sa medoo salu i Palo diyà kenagdi, guwaen da, “Ngadan taman sa lugay ta mebogo danà siini etaw? Huenan di, peipanaw ko dé sa medoo tegeIslaél mangay sumimbà diyà si Datù Nemula sa egpigtuuwen da. Enù di ya, endà pa egketiigan ko duu atu nedaetan dé sa langun tanà Igiptu?”
8 Huenan di, pinepelikù i Palo dema Mosis i owoy si Alon. Egoh da migtebow, guwaen di diyà kenagda, “Ipanaw yu dé, angay yu simbà diyà si Datù Nemula sa egpigtuuwen yu. Dodoo ngadan tayu di etaw sa mangay sumimbà?”
9 Migsagbì Mosis i, guwaen di, “Langun ké doo sa mangay sumimbà, sa medoo batà owoy lukes etaw, bayi owoy maama, lapeg sa medoo hinagtay ké ma, enù ka mangay ké mista diyà si Datù Nemula.”
10 Mig-ikagi Palo i, guwaen di, “Na, metabangan doo i Datù Nemula kiyu amuk pandayaen ku kiyu langun mipanaw. Dodoo endà eglengaan ku duu kiyu amuk uwiten yu sa sawa yu owoy sa medoo anak yu, enù ka netiigan ku duen sa ungayà yu endà mepion di. 11 Iya daa sa peipanawen ku sa medoo maama. Angay yu dé simbà diyà si Datù Nemula amuk iya sa ungayà yu.” Na, egoh di mig-ikagi iya wé, hinemagawan di Mosis i owoy si Alon kedu diyà sa taengan di.
12 Agulé mig-ikagi dema Datù Nemula i diyà si Mosis, guwaen di, “Begeng ko dé sa belad ko anì tumebow sa tigtu medoo kasuk diyà sa uwang tanà Igiptu, anì kaenen da sa langun hinemula sa endà nedaetan di danà sa bunga't udan.”
13 Huenan di, sinoyol i Mosis sa tuked di. Agulé pinekelamag i Datù Nemula kedu diyà sa tebowon agdaw. Neelut agdaw owoy neelut sigep sa kekelamag di dutu Igiptu dò. Hê, egoh di umenaw simag, migpeunut sa tigtu medoo kasuk diyà sa kelamag. 14 Tigtu medoo da temù migtenà diyà sa uwang tanà Igiptu. Edung egoh anay taman meuma sa sabuhanan agdaw, endà dé duen sa hauwen ta éhê iya wé kedoo kasuk. 15 Egoh da migtenà, migkeitem sa tanà danà sa kedoo da. Agulé kinaen da sa langun hinemula endà nedaetan di danà sa bunga't udan, lapeg sa langun bunga kayu ma. Endà duen sebaen mehilaw daun nesamà diyà sa langun tanà Igiptu.
16 Agulé medelamet igpeangay i Palo dema Mosis i owoy si Alon. Egoh da migtebow, guwaen di, “Nesalà a dema diyà si Datù Nemula sa egpigtuuwen yu owoy diyà keniyu ma. 17 Na, peuloyi yu dema aken, owoy simbà yu ma diyà si Datù Nemula anì kedanan di diyà kenak siini tigtu dakel lihay.”
18 Agulé sinalidan da i Mosis Palo i owoy migsimbà diyà si Datù Nemula. 19 Hê, pineleges i Nemula dema sa kelamag kedu diyà sa eledan agdaw. Nelayap siedò langun kasuk nekeangay dutu siedò dagat pinengadanan da Melalegà Dagat. Endà dé duen sa kasuk nesamà diyà sa uwang tanà Igiptu. 20 Dodoo pinetegas i Datù Nemula dema sa pedu i Palo, huenan di endà doo lengaan di duu sa medoo tegeIslaél mipanaw.
Ini Sa Egoh Di Migdeleman Sa Tanà Igiptu
21 Agulé mig-ikagi dema Datù Nemula i diyà si Mosis, guwaen di, “Begeng ko sa belad ko petodoi ko diyà langit anì tigtu dumeleman sa uwang tanà Igiptu.” 22 Huenan di, egoh i Mosis migbegeng sa belad di, tigtu migdeleman sa uwang tanà Igiptu taman telu agdaw. 23 Endà egkesehaa sa medoo tegeIgiptu, owoy taman telu agdaw ma sa lugay da endà eglaun diyà sa dalesan da. Dodoo meilag doo sa kenà sa medoo tegeIslaél eg-ugpà.
24 Agulé igpeangay i Palo dema Mosis i, owoy guwaen di, “Angay yu dé simbà diyà si Datù Nemula. Uwit yu ma dé sa sawa yu owoy sa medoo anak yu ma. Dodoo iya daa sa tangtang yu sa medoo hinagtay yu.”
25 Dodoo migsagbì Mosis i, guwaen di, “Peuwiti ko ma dé kenami sa medoo hinagtay ké, enù ka iya sa ulowen ké sa ibegay ké diyà si Datù Nemula amuk sumimbà ké. 26 Huenan di, uwiten ké ma doo sa langun hinagtay ké. Endà duen sebaen tangtangen ké. Enù ka amuk sumimbà ké, hemilien ké sa ibegay ké diyà si Datù Nemula, dodoo endà pelà netiigan ké duu ngadan tayu sa kenà di metuuwan taman endà mekeuma ké dutu.”
27 Dodoo danà i Datù Nemula migpetegas sa pedu i Palo, huenan di endà doo egpeipanawen di duu sa medoo tegeIslaél. 28 Agulé inikagiyan i Palo Mosis i, guwaen di, “Yoko dé egdahiya ya, owoy yoko ma dé egpelikù ya diyà kenak. Amuk hauwen ku dema kiyu dahini, iya ma dé sa agdaw egoh yu mematay.”
29 Guwaen i Mosis, “Meketuu doo sa ungayà ko. Endà dé pehaa a diyà keniko uman taman melugay.”