11
Ini Sa Egoh I Mosis Migtulon Sa Mebaelan Sa Langun Lebì Lawa Diyà Tanà Igiptu
1 Na, mig-ikagi Datù Nemula i diyà si Mosis, guwaen di, “Duen sa sebaen ma lihay peangayen ku diyà si Palo owoy diyà sa langun etaw tegeIgiptu. Amuk meubus iya wé, peipanawen di dé kiyu. Dodoo beken daa sa kepeipanaw di keniyu, hemagawan di pa kiyu langun. 2 Huenan di, ikagi ko diyà sa langun tegeIslaél, maama owoy bayi, anì mangay da diyà sa medoo duma da nesedapag dalesan tegeIgiptu anì pegeniyen da sa medoo imu-imu binaelan da bulawan owoy pilak.” 3 Na, pinepion i Datù Nemula sa pedu sa medoo tegeIgiptu diyà sa medoo tegeIslaél. Owoy eg-adatan ma sa langun tegeIgiptu lapeg sa medoo salu i Palo Mosis i.
4 Na, egoh i Mosis endà pa migsalid diyà si Palo, guwaen di diyà kenagdi, “Ini ma sa inikagi i Datù Nemula. Amuk buyu dé teliwadà sigep, mipanawpanaw gaa diyà sa uwang tanà Igiptu. 5 Owoy mematay sa langun maama lebì lawa diyà sa uwang tanà Igiptu, umedung diyà sa lebì lawa anak i Palo sa sumetugdug hedem kumedatù taman sa lebì lawa anak sa bayi udipen tegegiling owoy sa langun anay anak sa medoo hinagtay yu, anan da doo mematay. 6 Dumuen sa tigtu metaled dumelawit diyà sa uwang tanà Igiptu. Edung egoh anay taman melugay, endà dé duen sa dinegen metaled kedelawit éhê iya wé. 7 Dodoo diyà sa kenà sa medoo tegeIslaél, endà duen sa egdagì, apiya sa kegebu tuyang egdinegen da. Amuk hediya, metiigan ko doo tigesa sa egbaelan i Datù Nemula diyà sa medoo tegeIslaél owoy diyà sa medoo tegeIgiptu.” 8 Eg-uman Mosis i eg-ikagi, guwaen di, “Na, siini medoo salu ko, mangay da doo diyà kenak owoy lumigkued da diyà sa taengan ku enù ka isugù da sa kelegkà ké, lapeg sa langun etaw ku. Amuk hediya, iya dé sa egoh ké lumegkà diyà keniyu.” Agulé tigtu egbulit Mosis i egsalid diyà si Palo.
9 Na, iya sa inikagi i Datù Nemula diyà si Mosis, guwaen di, “Endà doo egdinegdinegen i Palo duu sa inikagi ko anì mebaelan ku uman sa medoo egkegaipan etaw diyà sa tanà Igiptu.” 10 Huenan di, apiya di pa binaelan i Mosis owoy si Alon sa medoo egkegaipan etaw diyà sa taengan i Palo, endà doo eglengaan di duu sa medoo tegeIslaél lumegkà kedu diyà sa tanà di, enù ka pinetegas i Datù Nemula sa pedu di.