12
Ini Sa Ukit Kebael Da Sa Pista Kinetalà Sa Kepigtamay I Nemula
1 Na, mig-ikagi Datù Nemula i diyà si Mosis owoy si Alon diyà sa tanà Igiptu. 2 Guwaen di, “Siini bulan, ini dé sa muna bulan diyà sa palay yu. 3 Tului yu ini i diyà sa langun tegeIslaél. Amuk meuma sa kesepulù di agdaw diyà siini muna bulan, hemilien sa ulu-ulu diyà sa uman sebaen malayan sa nati kebilibili ataw ka nati kambing, anì iya sa dulisan da. 4 Dodoo amuk duen sa malayan endà iseg da medoo owoy endà tolol da duu meimet sa sebaen kebilibili, mebaluy seamutay da kumaen sa sebaen ma malayan anì meimet da sa sebaen nati kebilibili inilegà da. Peatu-atuwi ko kenagda sa kedoo da kumaen sa uman sebaen nati kebilibili anì meimet da. 5 Na, sa hinagtay hemilien yu, sa maama daa owoy segepalay dé miglesut, owoy sa tigtu mepion endà duen kulang diyà sa lawa di. Mebaluy ma doo humemilì yu diyà sa kebilibili ataw ka sa kambing. 6 Pepion yu ipat taman meuma sa kesepulù di owoy epat agdaw diyà siini bulan. Agulé amuk buyu dé sumalep sa agdaw diyà sa kesepulù di owoy epat agdaw, sumbalien dé sa medoo tegeIslaél sa hinagtay hinemilì da. 7 Amuk sinumbalì da dé, kumuwa da sa depanug owoy idulét da diyà sa lekeatas sa selat owoy diyà sa duwa kilidan di, sumalà dé sa dalesan kenà da mael sa pista. 8 Tuegen da daa sa kaleni di owoy kaenen da ma dé diyà iya wé sigep. Ini ma sa kaenen da sa tinabel mepait owoy sa epan endà duen ipelenuk di. 9 Yoko egkaen duu sa kaleni endà nelegà di, owoy yoko ma egtabel duu. Tueg yu daa sa langun lawa di, lapeg sa dalem getek di. 10 Yoko ma egsamà duu taman umenaw simag. Amuk duen sa nesamà yu egkaen, ulow yu dé. 11 Ini ma sa adat amuk kumaen yu. Petéél yu sa kekaen yu, owoy kawal yu ma sa ginis yu eg-ipanaw, owoy talumpà yu ma owoy sabai yu ma sa tuked yu. Ini sa kepengadan siini pista, sa Pista Kinetalà Sa Kepigtamay i Nemula.”
12 Guwaen i Nemula, “Amuk meuma iya wé sigep, mipanawpanaw a diyà sa uwang tanà Igiptu. Imatayan ku sa langun maama lebì lawa diyà kenagda, iling ka etaw ataw ka hinagtay, owoy pigtamayan ku ma sa langun egpenemulawen da diyà Igiptu, enù ka aken si Datù Nemula. 13 Amuk duen hauwen ku depanug igdulét yu diyà sa selat sa dalesan yu, tumalà a daa diyà keniyu. Enù ka sa depanug, iya sa tandà sa dalesan yu, huenan di talaen ku kiyu anì endà mekelapeg yu diyà sa kepigtamay ku sa medoo tegeIgiptu.
14 “Edung ini egoh di, pistawi yu siini agdaw uman palay anì metulengan yu aken i Datù Nemula owoy sa binaelan ku egoh ku migtalà diyà keniyu. Uman palay baeli yu siini pista taman melugay.”
Ini Sa Igtulù Di Denu Sa Pista Egoh Da Egkaen Sa Epan Endà Duen Ipelenuk Di
15 Na, guwaen ma i Nemula, “Amuk umenaw simag sa egoh yu neubus migtueg sa nati kebilibili, iya daa sa kaen yu taman pitu agdaw sa epan endà duen igpelenuk di. Huenan di, amuk meuma sa muna agdaw di, kedani yu dé sa langun ipelenuk epan diyà sa dalesan yu. Enù ka sumalà dé sa etaw kumaen sa epan duen igpelenuk di taman siini pitu agdaw, kagdi dé lagà sa etaw beken tugod i Islaél. 16 Amuk sa muna agdaw diyà siini pista owoy sa kepitu di agdaw ma, setiponoy yu langun anì sumimbà yu diyà kenak. Yoko eggalebek ka diyà siini medoo agdaw, liyu daa sa keilegà yu sa medoo kaenen yu. 17 Edung ini egoh di taman melugay, baeli yu dé siini pista sa egoh yu egkaen sa epan endà duen ipelunuk di anì metulengan yu ini sa agdaw egoh ku miglaun keniyu kedu diyà sa tanà Igiptu.”
Ini Sa Egoh I Nemula Migtalà Sa Dalesan Dinulétén Depanug Kebilibili
21 Agulé sinetipon i Mosis sa medoo ulu-ulu tegeIslaél owoy inikagiyan di kagda, guwaen di, “Ini sa baeli yu, angay yu hemilì sa medoo hinagtay, iling ka nati kebilibili ataw ka nati kambing, owoy sumumbalì sa uman sebaen malayan anì kumaen da enù ka pistawan da sa Kinetalà Sa Kepigtamay i Nemula. 22 Amuk sumbalien yu dé, toyo yu sa depanug di diyà sa bilu. Agulé begkes yu sa medoo tukééy panga sa hinemula hisop owoy damui yu diyà sa depanug diyà sa bilu, agulé duléti yu diyà sa lekeatas selat owoy diyà sa duwa kilidan di ma. Yoko eglaun na diyà sa dalesan yu taman sumimag. 23 Enù ka amuk mipanawpanaw Datù Nemula i diyà sa uwang tanà Igiptu anì imatayan di sa langun lebì lawa diyà kenagda, hauwen di doo sa depanug igdulét yu diyà sa selat, huenan di talaen di sa medoo dalesan yu. Hawidan di sa egsugùsuguen di tegeimatay umawuh diyà sa dalesan yu.”
24 Guwaen i Mosis, “Na, kiyu owoy sa medoo tugod yu, pangunuti yu dé siini igtulù taman melugay. 25 Amuk tumebow yu diyà sa tanà igpasad i Datù Nemula ibegay diyà keniyu, baeli yu takà siini kepista uman palay. 26 Amuk igsaan sa anak yu kiyu sa pesuwan yu egbael iya wé, 27 tuloni yu kagda, guwaen yu, Siini kebilibili egsumbalien ta diyà sa Pista Sa Kinetalà Sa Kepigtamay i Nemula, iya sa ibegay ta amuk sumimbà ki diyà si Datù Nemula. Enù ka tinalà di sa medoo dalesan sa tegeIslaél dutu Igiptu dò egoh di mig-imatay sa medoo lebì lawa sa tegeIgiptu.”
Na, egoh i Mosis mig-ikagi iya wé, egligkued sa medoo tegeIslaél enù ka eg-oloen da Datù Nemula i. 28 Agulé egoh da miglikù, pinangunutan da iya wé igsugù i Datù Nemula igsugkow da i Mosis diyà kenagda.
Ini Sa Egoh Da Nematay Sa Medoo Lebì Lawa Diyà Sa Tanà Igiptu
29 Na, egoh di teliwadà sigep dé, inimatayan i Datù Nemula sa langun maama lebì lawa diyà sa tanà Igiptu, edung diyà sa lebì lawa anak i Palo sa sumetugdug hedem kumedatù taman sa lebì lawa anak sa etaw nebilanggu owoy sa langun anay anak sa medoo hinagtay da ma, anan da nematay. 30 Egoh iya wé sigep, mig-enaw Palo i owoy sa medoo salu di owoy sa langun etaw tegeIgiptu. Tigtu metaled sa kedelawit da diyà sa uwang tanà Igiptu, enù ka sa langun dalesan duen sa minematay.
31 Hê, egoh iya wé sigep, igpeangay i Palo Mosis i owoy si Alon. Egoh da migtebow, guwaen di, “Ipanaw yu dé, kiyu i medoo tegeIslaél. Legkà yu dé diyà sa tanà ké. Angay yu simbà diyà si Datù Nemula, enù ka iya sa pinegeni yu. 32 Owoy uwit yu ma sa langun hinagtay yu. Na, ipanaw yu dé. Owoy simbai yu ma aken i anì metabangan a i Nemula.”
Ini Sa Egoh Sa Medoo TegeIslaél Miglegkà Diyà Sa Tanà Igiptu
33 Agulé, linakawan sa medoo tegeIgiptu egpeipanaw sa medoo tegeIslaél anì pedelamet da dé lumegkà diyà sa tanà Igiptu. Guwaen da, “Amuk endà mapes yu mekelegkà, meimet ké mematay.” 34 Huenan di, egpesiyapat sa medoo tegeIslaél egtipoh sa medoo langun taman da. Dinalem da sa egbaelan da epan endà pa duen ipelenuk di diyà sa taguan epan, owoy binekut da ma ginis owoy tiniang da egoh da eg-ipanaw. 35 Pinangunutan sa medoo tegeIslaél sa igtulù i Mosis diyà kenagda enù ka migpegeni da diyà sa medoo tegeIgiptu sa medoo imu-imu binaelan da bulawan owoy pilak owoy sa medoo ginis ma. 36 Pinepion i Datù Nemula sa pedu sa medoo tegeIgiptu diyà sa medoo tegeIslaél, huenan di igbegay da doo sumalà dé sa egpegeniyen da. Huenan di, lagà kinedanan da sa medoo langun taman sa tegeIgiptu.
37 Agulé, miglegkà sa medoo tegeIslaél diyà sa menuwa Lamésis eg-angay diyà sa menuwa Sukot. Medoo da temù eg-ipanaw, enù ka sa kedoo maama daa duen kéen enem pulù lagsà, liyu pa sa medoo bayi owoy batà. 38 Owoy beken iya daa, enù ka duen ma sa medoo etaw beken tegeIslaél eg-unut diyà kenagda, owoy eg-uwiten da ma sa tigtu medoo hinagtay da.
39 Agulé egoh da mig-etud anì kumaen da, dinangay da sa kebael da epan endà duen ipelenuk di sa inuwit da kedu Igiptu dò. Endà dé neamutan da duu sa ipelenuk epan enù ka nebugbug da danà da hinemagawan kedu Igiptu dò, owoy endà ma neketapay da sa legà da enù ka endà duen ulas da.
40 Na, epat gatus owoy telu pulù gepalay sa lugay sa medoo tegeIslaél mig-ugpà diyà sa tanà Igiptu. 41 Agulé egoh di neuma sa epat gatus telu pulù gepalay, iya ma dé sa agdaw egoh sa langun etaw i Datù Nemula miglegkà diyà tanà Igiptu. 42 Sigep sa egoh i Datù Nemula migtulik kenagda egoh da mig-ipanaw eglegkà kedu Igiptu dò. Huenan di, uman palay taman melugay amuk meuma dema iya wé sigep, iya sa egoh sa medoo tegeIslaél egbael pista anì oloen da Datù Nemula i danà di miglaun kenagda kedu Igiptu dò.
Ini Sa Igtulù Denu Sa Pista Kinetalà Sa Kepigtamay I Nemula
43 Agulé mig-ikagi Datù Nemula i diyà si Mosis owoy si Alon, guwaen di, “Ini sa medoo uledin ku denu sa Pista Sa Kinetalà Sa Kepigtamay i Nemula. Endà mebaluy di amuk kumaen sa etaw beken tegeIslaél siini pista. 44 Dodoo amuk duen sa udipen bineli yu, mebaluy doo kumaen da siini pista amuk nekelaingan da ipat, enù ka lagà da dé diyà sa malayan yu. 45 Dodoo amuk beken tigtu etaw diyà sa tanà yu ataw ka sa egpegalebeken yu daa, endà mebaluy di kumaen siini pista. 46 Owoy amuk meuma sa egoh yu kumaen siini pista, diatas yu daa diyà sa dalesan kenà yu egtapay sa kaleni. Yoko eg-uwit duu diyà awang, apiya segepisang daa, owoy yoko ma egtepù duu sa tuelan di, apiya sebaen daa. 47 Langun yu etaw tegeIslaél sa kumaen siini pista. 48 Dodoo amuk duen sa etaw beken tegeIslaél mig-angay eg-ugpà diyà sa tanà yu owoy ungayà di mekelapeg ma diyà siini Pista Kinetalà Sa Kepigtamay i Nemula, mebaluy doo amuk pekelaingen yu muna sa ipat sa langun maama diyà sa dalesan di. Enù ka amuk nekelaingan da ipat, lagà da dé sa etaw tegeIslaél. Dodoo endà mebaluy di kumaen sa etaw amuk endà nekelaingan di ipat. 49 Mekelapeg sa langun etaw diyà siini uledin, iling ka sa etaw tegeIslaél ataw ka sa etaw beken tegeIslaél mig-angay daa eg-ugpà diyà sa tanà yu.”