13
13:1-16 Na, igtulù i Mosis si Datù Nemula sa épê sa langun maama lebì lawa, iling ka etaw ataw ka hinagtay. Amuk sa hinagtay melanih diyà sa kehaa i Nemula, imatayan da sa anay anak di enù ka ibegay da diyà si Nemula. Dodoo amuk sa hinagtay endà melanih di diyà sa kehaa i Nemula, sambian da sa nati kebilibili anì imatayan da. Dodoo amuk etaw, mekesalig da polo diyà si Nemula anì meipat da sa langun uledin di.
Igtulù i Mosis ma sa denu sa Pista egoh da egkaen sa epan endà duen ipelenuk di.
Duen Sa Gaeb Owoy Apuy Eghuna Diyà Sa Medoo TegeIslaél Eg-ipanaw
17,18 Na, egoh i Datù Palo migpeipanaw sa medoo tegeIslaél, endà pineukit i Nemula duu kagda diyà sa kalasada diyà sa tanà tegePilistiya apiya di pa iya sa pantek ukitan da. Enù ka netiigan i Nemula amuk duen etaw gumila kenagda egoh da eg-ipanaw mehalì kéen sa pedu da owoy pelikù da dutu Igiptu dò, apiya di pa inuwit da ma sa hagda kinemkem. Huenan di, pineukit i Nemula polo kagda diyà sa melabel tanà mediyù dalesan eg-angay diyà sa dagat pinengadanan da Melalegà Dagat.
19 Na, egoh da miglegkà kedu diyà Igiptu, inuwit i Mosis ma sa medoo tuelan sa tupù da si Hosé, enù ka pinepasad i Hosé sa medoo tegeIslaél egoh anay. Egoh i Hosé nehagtay pelà, igsasà di diyà sa medoo duma di tegeIslaél, guwaen di, “Netiigan ku tabangan i Nemula doo kiyu anì mekelegkà yu dini owoy amuk meuma iya wé agdaw, uwit yu ma sa tuelan ku kedu dini.”a
20 Na, egoh sa medoo tegeIslaél miglegkang diyà sa menuwa Sukot, mig-esud da diyà Itam diyà sa kilidan sa melabel tanà mediyù dalesan. 21 Amuk agdaw, eghuna Datù Nemula i diyà kenagda migpeiling palas beletukoy enù ka egtulù kenagda sa ukitan da. Owoy amuk sigep, eghuna diyà kenagda sa éhê palas beletukoy eglegleg anì melegdawan da. Huenan di, mekeipanaw da doo agdaw owoy sigep. 22 Takà eghuna iya wé beletukoy diyà sa medoo tegeIslaél amuk agdaw, owoy duen ma iya wé éhê apuy amuk sigep.