14
Ini Sa Egoh Sa Medoo TegeIgiptu Miglohot Sa Medoo TegeIslaél
1 Agulé mig-ikagi dema Datù Nemula i diyà si Mosis, 2 guwaen di, “Tuloni ko sa medoo tegeIslaél anì pelikù da mangay denu sa menuwa Pihahilot sa teliwadaan sa menuwa Migdol owoy sa Melalegà Dagat. Esud yu dutu siedò kilidan dagat medapag diyà sa menuwa Baal-sipon. 3 Iya sa baelan yu anì penemdemen i Palo endà mekegaga yu melaguy kedu diyà Igiptu enù ka mealang yu mukit diyà sa melabel tanà mediyù dalesan. 4 Petegasen ku dema sa pedu di anì lohoten di kiyu. Amuk hediya, atuwan ku dé kagdi lapeg sa medoo sundalu di anì metiigan sa langun tegeIgiptu aken si Datù Nemula owoy anì meolò a.” Hê, pinangunutan sa medoo tegeIslaél iya wé inikagi i Nemula igsugkow i Mosis.
5 Na, egoh i Datù Palo tinulonon da migpelaguy dé sa medoo tegeIslaél, nesenulê sa penemdem di owoy sa penemdem sa medoo salu di ma. Guwaen da, “Endà mepion ini i binaelan ta. Maen di ya pinelegkà ta sa medoo tegeIslaél? Ngadan polo sa etaw udipenen ta atu?” 6 Huenan di, igsugù i Palo sa kalitun di atung gamiten di amuk gumila owoy uwiten di ma sa medoo sundalu di. 7 Inuwit di sa langun kalitun tegeIgiptu atung gamiten da amuk eggila, lapeg sa enem gatus tigtu mepion. Diyà sa uman sebaen kalitun, duen sa duwa sundalu owoy sa pangulu da.a 8 Pinetegas i Datù Nemula dema sa pedu i Palo anì lohoten di sa medoo tegeIslaél miglegkà. Na, tigtu egkeanggan sa pedu sa medoo tegeIslaél egoh da eg-ipanaw. 9 Na, sa medoo tegeIgiptu, sa medoo sundalu i Palo eg-edà kalitun anì gumila da owoy sa medoo egkudà ma, eglohoten da sa medoo tegeIslaél owoy neuma da kagda diyà sa kenà da eg-esud diyà sa kilidan dagat, medapag diyà sa menuwa Pihahilot diyà sa dibaluy sa menuwa Baal-sipon.
10 Hê, tigtu nelimedangan sa medoo tegeIslaél egoh da mighaa sa medoo tegeIgiptu eglohot medapag dé diyà kenagda. Eg-umow da tabang diyà si Datù Nemula. 11 Owoy egselselen da ma Mosis i, guwaen da, “Ngahàngahà ka. Enù di ya, endà duen sa kenà ta ilebeng dutu Igiptu dò, atu? Maen di ya inuwit ko kami diyà siini melabel tanà mediyù dalesan anì mematay ké dini? Taa ko. Amuk endà tinegel ko kami egpelegkà diyà Igiptu, endà mebaelan éhê ini i hedem diyà kenami. 12 Netulengan ko pa sa inikagi ké diyà keniko dutu Igiptu dò anì endà tegelen ko duu kami pelegkà? Pemaen ko dé kami hedem egkeudipen diyà sa medoo tegeIgiptu, enù ka uman pa mepion sa egoh ké neudipen daa diyà sa egoh ké meimatayan diyà siini melabel tanà mediyù dalesan.”
13 Migsagbì Mosis i diyà kenagda, guwaen di, “Yoko egkelimedangan na. Petanà yu polo sa pedu yu. Angati yu sa kealuk i Datù Nemula keniyu ini egoh di. Endà dé hauwen yu duu uman siedò medoo tegeIgiptu. 14 Si Datù Nemula polo sa gumila diyà kenagda, beken kiyu. Endà duen sa niyu egbaelan.”
15 Agulé mig-ikagi Datù Nemula i diyà si Mosis, guwaen di, “Maen di ya eg-umow yu tabang diyà kenak? Tuloni ko siini medoo etaw anì muman da mipanaw. 16 Soyol ko sa tuked ko lekeatas sa kagpa't wayeg anì mesekawang sa dagat anì metikal sa ukitan yu matas mangay tanà dutu dò. 17,18 Petegasen ku dema uman sa pedu sa medoo tegeIgiptu anì lohoten da kiyu. Amuk hediya, tabanan ku Palo i owoy sa langun sundalu di lapeg sa medoo kalitun eggamiten da amuk gumila da, anì metiigan sa langun tegeIgiptu aken si Datù Nemula owoy anì meolò a ma danà ku tumaban kenagda.”
19 Na, sa egsugùsuguen i Nemula takà eghuna diyà sa medoo tegeIslaél egoh da eg-ipanaw, mighalì mig-angay diyà sa iyugan da. Hediya ma mighalì ma siedò éhê beletukoy mig-angay diyà sa iyugan da. 20 Nebaluy iya sa alang diyà sa teliwadaan sa medoo tegeIgiptu owoy sa medoo tegeIslaél. Neelut sigep, takà eglegdaw iya wé éhê apuy diyà sa kenà sa medoo tegeIslaél, dodoo tigtu egdeleman diyà sa kenà sa medoo tegeIgiptu. Huenan di, endà egkesedapag sa medoo tegeIgiptu owoy sa medoo tegeIslaél.
21 Agulé sinoyol i Mosis sa tuked di lekeatas sa kagpa't wayeg. Hê, neelut sigep pineleges i Datù Nemula sa kelamag kedu diyà sa tebowon agdaw. Huenan di, nesekawang sa wayeg anì dumuen sa netikal ukitan da diyà sa teliwadà di. 22 Agulé egbatas sa langun tegeIslaél mangay tanà dutu dò. Netikal sa kenà da eg-ukit diyà sa teliwadà dagat, owoy nekeiling delama sa wayeg dagat denu kuwanan da owoy denu bibang da ma.
23 Hê, eglohot ma sa medoo tegeIgiptu eg-ukit diyà siedò netikal nesekawangan dagat, lapeg sa langun etaw i Palo egkudà owoy sa medoo sundalu di eg-edà kalitun. 24 Dodoo si Datù Nemula diyà sa beletukoy éhê legleg apuy, eghauwen di doo sa medoo eglohot egoh di buyu sumimag. Huenan di, tigtu egbogowen di sa medoo sundalu tegeIgiptu. 25 Nekelebeng sa lisen sa medoo kalitun da owoy nekedan ma sa duma lisen di, huenan di egkelikutan da dé eglohot. Guwaen da, “Pelikù ki polo. Pediyù ki diyà sa medoo tegeIslaél, enù ka iya polo sa egkebalà ta si Datù Nemula sa egtabang kenagda.”
26 Agulé mig-ikagi Datù Nemula i diyà si Mosis, guwaen di, “Soyol ko dema sa tuked ko diyà sa kagpa't dagat anì mesedelagkup sa wayeg anì melened sa medoo tegeIgiptu, lapeg sa medoo kalitun da ma.” 27 Agulé sinoyol i Mosis sa tuked di. Hê, egoh di umenaw simag, nesedelagkup dé sa dagat. Egpelaguy doo hedem sa medoo tegeIgiptu, dodoo sinedelagkup i Datù Nemula sa wayeg nesekawang, huenan di nelened da dé langun. 28 Na, egoh sa wayeg nesedelagkup, nelimunan wayeg sa langun sundalu i Palo miglohot sa medoo tegeIslaél diyà sa dagat, lapeg sa medoo kalitun gamiten da amuk gumila da. Nelened da langun, endà duen sebaen nesamà.
29 Dodoo sa medoo tegeIslaél, dutu da dé tanà dutu dò enù ka mig-ukit da diyà sa netikal tanà diyà sa teliwadà nesekawangan dagat, owoy nekeiling delama sa wayeg denu bibang da owoy denu kuwanan da ma. 30 Iya dé sa agdaw kealuk i Datù Nemula sa medoo tegeIslaél kedu diyà sa egkegaga sa medoo tegeIgiptu, owoy hinaa sa medoo tegeIslaél sa medoo tegeIgiptu nematay dé diyà sa kilidan dagat. 31 Na, danà sa medoo tegeIslaél mighaa sa dakel egkegaga i Datù Nemula egoh di migtaban diyà sa medoo tegeIgiptu, huenan di eg-adatan da dé kagdi i. Owoy egpigtuuwen da ma kagdi i owoy sa sinaligan di, si Mosis.