15
Ini Sa Duyuy I Mosis
1 Agulé, migduyuy Mosis i owoy sa medoo duma di tegeIslaél enù ka eg-oloen da Datù Nemula i. Éhê ini sa duyuy da, guwaen da,
“Tigtu egduyuyen ku Datù Nemula i, enù ka eglowon sa egkegaga di egtaban diyà sa kuntelà di.
Igbuung di dé diyà dagat sa medoo kudà owoy sa medoo sundalu ma.
2 Épê dakel egkegaga Datù Nemula i sa egduyuyen ku.
Enù ka kagdi sa mig-aluk kenak kedu diyà sa medoo kuntelà ku.
Kagdi sa Nemula egpigtuuwen ku, owoy tigtu oloen ku kagdi ya.
Kagdi ma sa Nemula egpigtuuwen sa medoo tupù ku, owoy doyonen ku sa dakel egkegaga di.”
Ini Sa Egoh Da Migselsel Si Mosis Enù Ka Mepait Sa Wayeg
22 Agulé, inuwit i Mosis sa medoo tegeIslaél kedu diyà sa Melalegà Dagat owoy mig-angay da diyà sa melabel tanà mediyù dalesan pinengadanan da Tanà Sul. Telu agdaw sa lugay da eg-ipanaw, dodoo endà duen wayeg hinaa da. 23 Agulé migtebow da diyà sa tebulan Malah. Mepait sa selepangan iya wé ngadan Malah, enù ka tigtu mepait iya wé wayeg, huenan di endà egkeinem da duu. 24 Egselselen sa medoo tegeIslaél dema Mosis i, guwaen da, “Enù di ya, ngadan sa meinem ta ini egoh di?”
25 Agulé migsimbà Mosis i egpegeni tabang diyà si Datù Nemula. Hê, igpehaa i Datù Nemula diyà kenagdi sa panga kayu. Egoh di migkuwa, igdugsù di diyà sa wayeg. Hê, nekedan dé sa kepait di.
Na, egoh da dahiya pelà, binegayan i Datù Nemula kagda sa uledin, owoy egtepengan di ma kagda. 26 Guwaen di, “Amuk pedakelan pedu yu sa kepangunut yu kenak anì ilingan yu sa metiengaw adat kenà ku metuuwan, owoy amuk pangunutan yu ma sa langun uledin ku owoy sa uyot ku ma, endà peukiten ku duu diyà keniyu sa medoo linadu pineangay ku diyà sa medoo tegeIgiptu. Enù ka aken si Datù Nemula sa mulung keniyu.”
27 Agulé egoh da miglegkà dahiya, mig-angay da diyà sa sugud Ilim kenà sa sepulù owoy duwa tebulan owoy sa pitu pulù gepesu lepò. Mig-esud da dahiya diyà sa kilidan wayeg.