16
Ini Sa Egoh I Nemula Migbegay Kaenen Diyà Sa Medoo TegeIslaél
1 Agulé miglegkà sa langun tegeIslaél diyà Ilim owoy eg-ipanaw da dema. Na, egoh di neuma sa kesepulù di owoy lima agdaw diyà sa keduwa bulan edung sa egoh da miglegkà diyà Igiptu, migtebow da diyà sa melabel tanà mediyù dalesan pinengadanan da Sin, sa neseteliwadaan Ilim owoy Getan Sinay. 2 Egoh da dé dutu siedò melabel tanà mediyù dalesan, egselselen da dema Mosis i owoy si Alon. 3 Guwaen da, “Mepion pa hedem amuk inimatayan i Datù Nemula dé kami dutu Igiptu dò. Enù ka egoh ké pelà dutu, nekekaen ké pa sa medoo kaleni owoy sa medoo balangan kaenen taman sa egkeiyapan ké egkaen. Dodoo diyà siini melabel tanà mediyù dalesan sa kenà yu mig-uwit kenami, mematay ki langun danà bitil.”
4 Agulé mig-ikagi Datù Nemula i diyà si Mosis, guwaen di, “Na, tuntunen ku sa kaenen diyà keniyu kedu langit dò. Uman magtu kesimag, pelaun ko sa langun etaw diyà sa kemalig da anì kuwaen da sa kaenen da nekeenget taman segeagdaw. Enù ka egtepengan ku daa kagda amuk tigtu tuu sa kepangunut da diyà sa igsugù ku. 5 Amuk meuma sa keenem di agdaw, siglapegen da sa kekuwa da anì mekeenget kaenen da taman duwa agdaw, owoy tapayen da ma umilegà sa kinuwa da.”
6 Huenan di, mig-ikagi Mosis i owoy si Alon diyà sa langun tegeIslaél, guwaen da, “Amuk buyu sumalep sa agdaw kani, metiigan yu doo si Datù Nemula sa mig-uwit keniyu kedu Igiptu dò. 7 Owoy amuk sumimag, hauwen yu ma sa senang di, enù ka dinineg di doo sa keselsel yu kenagdi. Iya sa guwaen ké enù ka kagdi polo sa egselselen yu, beken kami daa, enù ka egbaelan ké daa sa uyot di.” 8 Agulé guwaen i Mosis dema, “Si Datù Nemula sa megay diyà keniyu sa kaleni kaenen yu kani mahapun owoy sa kaenen yu amuk magtu kesimag taman sa egkeiyapan yu egkaen. Enù ka dinineg di doo sa keselsel yu kenagdi. Beken duu kami sa egselselen yu, dodoo si Datù Nemula polo.”
9 Agulé guwaen i Mosis diyà si Alon, “Ikagi ko diyà sa langun tegeIslaél anì mangay da diyà sa taengan i Datù Nemula, enù ka dinineg di sa keselsel da.”
10 Na, egoh i Alon eg-ikagi pelà diyà sa medoo tegeIslaél, mig-isalu da langun denu sa melabel tanà mediyù dalesan. Hê, petow dé hinaa da sa senang i Datù Nemula diyà siedò beletukoy. 11 Agulé mig-ikagi Datù Nemula i diyà si Mosis, guwaen di, 12 “Dinineg ku doo sa keselsel sa medoo tegeIslaél. Na, tuloni ko kagda begayan ku kagda kaleni amuk buyu sumalep sa agdaw owoy sa kaenen da ma amuk umenaw simag taman sa egkeiyapan da egkaen, anì metiigan da aken si Datù Nemula sa egpigtuuwen da.”
13 Na, egoh di sumalep sa agdaw, migtenà sa segelugba pugù. Medoo da temù migtenà diyà sa kenà sa medoo tegeIslaél mig-esud. Owoy egoh di umenaw simag, duen sa medoo aglù nekeulingut diyà sa medoo kemalig da. 14 Egoh di netikal iya wé aglù, duen sa hinaa da diyà tanà sa éhê palas betê palay menipis owoy mebulà ma. 15 Egoh sa medoo tegeIslaél mighaa iya wé, endà netiigan da duu, huenan di, egseigsaay da, guwaen da, “Ngadan ini i?”
Mig-ikagi Mosis i diyà kenagda, guwaen di, “Ini sa kaenen igbegay i Datù Nemula diyà kenita. 16 Owoy ini sa uledin i Datù Nemula denu ini i. Kumuwa daa sa uman sebaen etaw sa nekeenget kaenen di diyà sa segeagdaw. Enem katasa daa sa enget kaenen sa uman sebaen etaw diyà sa kemalig di.”
17 Hê, pinangunutan sa medoo tegeIslaél sa tinulon i Mosis. Duen etaw migkuwa medoo owoy duen ma migkuwa diisek daa. 18 Dodoo egoh da migtasa sa kinuwa da, amuk duen sa migkuwa medoo, endà ma subela di. Owoy sa etaw migkuwa diisek daa, endà ma kulang di. Tigtu nekeenget diyà kenagda sa nekuwa da.
19 Agulé mig-ikagi dema Mosis i diyà kenagda, guwaen di, “Yoko egsamà duu taman sumimag.” 20 Dodoo duen etaw diyà kenagda endà egpigtuu da diyà sa inikagi i Mosis, enù ka sinamà da doo sa duma kaenen da. Dodoo egoh di umenaw simag, migsapat dé sa sinamà da owoy newali ma dé. Huenan di, binulitan i Mosis kagda.
21 Uman magtu kesimag egkuwaen sa medoo etaw sa taman egkeiyapan da egkaen. Agulé amuk meedup dé sa agdaw, metunag dé sa nesamà diyà tanà. 22 Egoh di neuma sa keenem di agdaw, siniglapeg da sa kekuwa da. Sepulù owoy duwa katasa sa kinuwa sa uman sebaen etaw. Agulé mig-angay sa medoo ulu-ulu tegeIslaél diyà si Mosis owoy egtulonen da iya wé diyà kenagdi. 23 Hê, sinelepang i Mosis diyà kenagda, guwaen di, “Ini sa uledin igsugù i Datù Nemula. Etud yu langun simag enù ka iya sa Agdaw Keetud, sa mapulù agdaw diyà sa kehaa i Nemula. Huenan di, ilegà yu dé ini egoh di sumalà dé sa egkeiyapan yu egkaen, iling ka bugbugen yu ataw ka dangayen yu. Amuk duen sa nesamà yu, tagui yu anì iya sa kaenen yu simag.”
24 Agulé pinangunutan da sa inikagi i Mosis, owoy sinamà da sa kaenen da simag. Endà newali sa kaenen sinamà da owoy endà ma migsapat di. 25 Mig-ikagi dema Mosis i diyà kenagda, guwaen di, “Kaen yu dé iya wé ini egoh di, enù ka ini sa Agdaw Keetud, sa mapulù agdaw diyà sa kehaa i Datù Nemula. Endà duen sa kaenen mehaa yu diyà tanà ini egoh di. 26 Taman enem agdaw daa sa keangay yu kumuwa kaenen uman magtu kesimag. Dodoo amuk meuma sa kepitu di agdaw, sa Agdaw Keetud, endà duen sa kaenen hauwen yu diyà tanà.”
27 Dodoo duen etaw diyà kenagda endà egpangunut da diyà sa inikagi i Mosis. Apiya di pa sa kepitu di agdaw, eg-angay da doo egkuwa kaenen, dodoo endà duen sa eghauwen da. 28 Agulé mig-ikagi Datù Nemula i diyà si Mosis, guwaen di, “Ngadan taman sa endà kepangunut yu diyà sa medoo igsugù ku? 29 Petulengtuleng yu aken si Datù Nemula sa migbegay diyà keniyu sa Agdaw Keetud. Huenan di, amuk meuma sa keenem di agdaw, begayan ku kiyu sa mekeenget kaenen yu taman duwa agdaw. Owoy amuk meuma sa kepitu di agdaw, ugpà yu daa diyà sa kemalig yu. Yoko eglaun na.” 30 Na, edung egoh iya, eg-etud dé sa medoo tegeIslaél amuk sa kepitu di agdaw.
31 Na, manaa sa kepengadan sa medoo tegeIslaél iya wé kaenen kinuwa da. Lagà sa diisek betê palay gineléh, mebulà owoy meemis ma sa nanam di lagà sa biskuwit inamutan teneb. 32 Agulé mig-ikagi Mosis i diyà kenagda, guwaen di, “Ini ma sa igsugù i Datù Nemula. Kuwa yu sa enem katasa sa kaenen mana owoy pepion yu sa ketagù yu anì hauwen sa medoo tugod yu siini kaenen igbegay di diyà keniyu egoh yu diyà sa melabel tanà mediyù dalesan egoh di mig-uwit keniyu kedu Igiptu dò.”
33 Agulé guwaen i Mosis diyà si Alon, “Kuwa ko sa buyung owoy dalem ko sa enem katasa siini kaenen mana. Tenai ko ma diyà sa taengan i Datù Nemula dutu siedò kenà ta egsimbà, anì hauwen sa medoo tugod ta mekesetugdug kenita sa kaenen mana.”
34 Agulé, pinangunutan i Alon sa igsugù i Datù Nemula diyà si Mosis. Igtenà di sa tinaguan di mana diyà sa taengan sa Baul Tandà Sa Igpasad i Nemula, anì melalù sa keipat da. 35 Na, mana sa egkaenen sa medoo tegeIslaél taman epat pulù gepalay, owoy taman sa egoh da nekeuma diyà sa tanà Kanan sa kenà da mig-ugpà.