17
Ini Sa Egoh Di Duen Wayeg Eglesut Diyà Sa Batu
1 Agulé miglegkà dema sa medoo tegeIslaél diyà siedò melabel tanà Sin mediyù dalesan, enù ka egsehalìhalì da diyà sa egpeangayan i Datù Nemula kenagda. Hê, mig-esud da diyà sa tanà Lépidim, dodoo endà duen wayeg dahiya. 2 Huenan di, egselselen da dema Mosis i, guwaen da, “Begayi ko kami sa inemen ké.”
Migsagbì Mosis i, guwaen di, “Maen di ya egselselen yu aken? Enù di ya, egtepengan yu Datù Nemula i?”
3 Dodoo tigtu eglupahan sa medoo tegeIslaél, huenan di egtemuen da egselsel Mosis i. Guwaen da, “Maen di ya inuwit ko kami kedu Igiptu dò, anì mematay ké langun danà ké endà egpekeinem, lapeg sa medoo anak ké owoy sa medoo hinagtay ké ma?”
4 Huenan di, migsimbà Mosis i egpegeni tabang diyà si Datù Nemula, guwaen di, “Ngadan sa egkebaelan ku igoh diyà siini medoo etaw? Buyuwen da dé aken egbuung batu anì mematay a.”
5 Migsagbì Datù Nemula i, guwaen di, “Peunut ko keniko sa duma ulu-ulu tegeIslaél, owoy huna yu diyà sa langun etaw. Uwit ko ma sa tuked ko sa igtapes ko diyà sa wayeg Nilo. Na, ipanaw yu dé. 6 Angatan ku kiyu dutu siedò dakel batu diyà sa Getan Sinay. Amuk tumebow yu, tapes ko tuked sa batu anì lumesut sa wayeg anì inemen sa langun etaw.” Agulé binaelan i Mosis iya wé diyà sa taengan sa medoo ulu-ulu tegeIslaél. 7 Na, Masa owoy Méliba sa kepengadan da iya wé kenà da, enù ka egselselen sa medoo tegeIslaél Mosis i dahiya owoy egtepengan da ma Datù Nemula i. Guwaen da, “Enù di ya, eg-ipaten i Datù Nemula pa kita ataw ka endà?”
Ini Sa Egoh Da Egsegilaway Sa Medoo TegeIslaél Owoy Sa Medoo TegeAmalék
8 Na, egoh sa medoo tegeIslaél pelà diyà sa tanà Lépidim, pinengayaw sa medoo tegeAmalék kagda. 9 Agulé mig-ikagi Mosis i diyà sa salu di, si Hosuwa. Guwaen di, “Hemilì ko diyà sa medoo duma ta maama sa enggaten ko mangay gumila diyà sa medoo tegeAmalék. Owoy aken, simag mangay a tumigdeg diyà sa kogol getan anì sugpayalen ku kiyu owoy sabaan ku ma sa tuked igpeuwit i Nemula takà diyà kenak.”
10 Agulé pinangunutan i Hosuwa sa igsugù i Mosis, owoy mig-angay eggila diyà sa medoo tegeAmalék. Mig-angay Mosis i owoy si Alon owoy si Hul diyà sa kogol getan. 11 Na, amuk egpetigdegen i Mosis sa belad di, tumaban sa medoo tegeIslaél, dodoo amuk lugkenen di sa belad di, tumaban polo sa medoo tegeAmalék. 12 Dodoo danà di egkelugay sa kesegilaway da, egkegis sa belad i Mosis. Huenan di, migkuwa batu Alon i owoy si Hul, agulé pineugsad da Mosis i dahiya. Owoy migtigdeg da ma egsabà sa belad di, sebaen denu kuwanan owoy sebaen denu bibang di, anì endà melugken di duu taman umeled sa agdaw. 13 Huenan di, tigtu negelà sa medoo tegeAmalék danà da i Hosuwa.
14 Agulé mig-ikagi Datù Nemula i diyà si Mosis, guwaen di, “Sulati ko ini i anì endà melipengan yu duu sa egoh yu migtaban sa medoo tegeAmalék. Owoy tuloni ko ma Hosuwa i kedanan ku sa medoo tegeAmalék diyà siini sinukub langit.”
15 Na, binaelan i Mosis dahiya sa atung kenà da eg-ulow sa ibegay da diyà si Nemula. Pinengadanan di iya wé “Si Datù Nemula sa lagà bandila ku enù ka kagdi sa Pangulu ku.” 16 Owoy guwaen i Mosis diyà sa medoo duma di, “Pinetigdegan ku belad ku Datù Nemula i, huenan di kagdi dé sa umatu diyà sa medoo tegeAmalék taman melugay.”