18
18:1-12 Na, dinineg i Hételo sa langun binaelan i Nemula diyà sa awas di si Mosis owoy denu sa kepelegkà i Nemula sa medoo tegeIslaél kedu Igiptu dò. Agulé mig-angay eglengen diyà si Mosis owoy pinelikù di ma Sipola i sawa i Mosis owoy sa duwa bébê di anak da i Mosis. Enù ka egoh da i Mosis diyà sa melabel tanà mediyù dalesan, mig-angay da Sipola i eglengen diyà si Hételo emà di. Agulé neanggan Mosis i egoh di mighaa sa nugangan di si Hételo sa atung tegesimbà dutu tanà Midiyan dò.
Ini Sa Egoh Da Miggelal Sa Medoo Kaunutan
13 Na, egoh di umenaw simag, migpenuu dema Mosis i anì antangen di sa medoo tegeIslaél egsesigbolowoy. Iya sa egbaelan di edung magtu kesimag taman sumigep enù ka medoo sa etaw egpeantang. 14 Agulé egoh i Hételo nugangan di mighaa sa kedoo egbaelan i Mosis, guwaen di diyà kenagdi, “Ngadan ini i egbaelan ko diyà siini medoo etaw? Maen di ya kuna daa sa tegeantang dahini diyà siini medoo etaw eg-angat-angat egpeantang edung magtu kesimag taman sumigep?”
15 Migsagbì Mosis i, guwaen di, “Iya sa egkebaelan ku enù ka eg-angay da petabang diyà kenak anì metiigan da sa uyot i Nemula. 16 Amuk egsesigbolowoy sa etaw, mangay da peantang diyà kenak. Agulé egtulonen ku diyà kenagda sa tayu di sa épê ketuu owoy egselepangen ku ma diyà kenagda sa medoo uledin i Nemula.”
17 Agulé mig-ikagi Hételo i, guwaen di, “Endà mepion di iya wé egbaelan ko, 18 enù ka egkeliteg ka owoy egkepuleg ma siini medoo etaw egpeantang. Nekelowon siini galebek ko diyà sa egkegaga ko amuk kuna daa sa tegeantang. 19 Na, dinegdineg ko siini eg-ikagiyen ku mepion hedem amuk pangunutan ko, enù ka netiigan ku metabangan i Nemula kuna. Na, mepion doo amuk kuna sa umantang sa medoo etaw diyà si Nemula, enù ka kuna sa meketulon diyà kenagdi sa medoo egsesigbolowen da. 20 Owoy kuna ma sa tumulù kenagda sa langun igsugù i Nemula owoy sa adat da kenà di metuuwan, enù ka egselepangen ko diyà kenagda sa mepion baelan da. 21 Dodoo ini ma sa baeli ko, hemilì ko sa medoo etaw diyà sa langun tegeIslaél anì tabangan da kuna. Iya sa etaw hemilì ko sa mepion adat owoy sa mekegaga umantang owoy sa tigtu miadat diyà si Nemula owoy sa egkesaligan ma. Endà mebaluy di amuk dakel sa pedu di diyà sa pantiyali. Amuk gelalen ko dé kagda kaunutan, duen sa umipat sengibu etaw, duen umipat magatus, owoy duen ma lima pulù, owoy duen ma sepulù. 22 Mebaluy dé kagda sa umantang diyà sa medoo etaw taman melugay. Na, amuk duen sa melikut eg-antangen, mepion amuk uwiten da doo diyà keniko. Dodoo sa medoo melemu, megaga da doo umantang. Agulé kumelemu sa galebek ko enù ka egtabangan da kuna eg-antang. 23 Amuk baelan ko ini i owoy amuk metuuwan ma Nemula i, endà tigtu ka mepasangan. Owoy lumikù ma siini medoo etaw amuk ubus da dé inantang.”
24 Na, egoh i Mosis migdineg sa inikagi sa nugangan di, pinangunutan di sa langun igtulù di. 25 Hinemilì di sa medoo maama tegeIslaél mepion adat owoy sa mekegaga umantang. Agulé ginelal di kaunutan. Duen sa umipat sengibu etaw, duen magatus, owoy duen ma lima pulù owoy duen ma sepulù. 26 Kagda dé sa tegeantang diyà sa medoo etaw. Amuk melikut sa egsesigbolowen etaw, eg-uwiten da dema diyà si Mosis, dodoo amuk melemu daa sa egsesigbolowen da, kagda dé sa umantang.
27 Agulé mig-ebal Hételo i diyà si Mosis enù ka lumikù diyà sa hagdi tanà.