19
Ini Sa Egoh I Datù Nemula Mig-ikagi Diyà Sa Medoo TegeIslaél Diyà Sa Getan Sinay
1,2 Na, miglegkà dema sa medoo tegeIslaél diyà Lépidim, owoy mig-angay da diyà sa melabel tanà mediyù dalesan diyà Sinay. Egoh da migtebow dahiya, iya sa muna agdaw diyà sa ketelu di gebulan edung sa egoh da miglegkà diyà Igiptu. Agulé eg-esud da diyà sa esudan sa Getan Sinay.
3 Agulé migtekedeg Mosis i diyà sa getan anì mikagi diyà si Nemula. Hê, mig-umow Datù Nemula i kedu diyà sa tuduk Sinay, guwaen di, “Ini sa ikagi ko diyà sa medoo tegeIslaél, sa medoo tugod i Hakob. 4 Guwaen ko diyà kenagda, ‘Ini sa kagi i Datù Nemula, guwaen di hinaa yu doo sa binaelan ku diyà sa medoo tegeIgiptu, owoy inuwit ku ma kiyu dahini. Eg-ipaten ku kiyu lagà sa banug eg-uwit sa pispis di diyà sa pakpak di. 5 Na, amuk tigtu yu mangunut diyà kenak owoy amuk endà melipengan yu duu sa pasad ku diyà keniyu, mebaluy doo kiyu sa mapulù etaw hinemilì ku. Apiya di pa naken sa langun balangan etaw diyà tanà, hinemilì ku doo kiyu 6 anì kiyu lagà sa medoo atung tegesimbà enù ka takà yu egpangunut diyà kenak. Owoy mebaluy ma kiyu sa metiengaw etaw egsabaan ku.’ Na, iya sa ikagi ko diyà sa medoo tegeIslaél.”
7 Huenan di, miglungel dema Mosis i, owoy egsetiponen di sa medoo ulu-ulu tegeIslaél. Egoh da nesetipon, tinulon di diyà kenagda sa langun igpeikagi i Datù Nemula diyà kenagdi. 8 Agulé egoh da migdineg iya wé, neseselengan da migsagbì, guwaen da, “Pangunutan ké doo sa langun igsugù i Datù Nemula.” Agulé migpelikù dema Mosis i diyà si Nemula anì tulonen di sa inikagi sa medoo etaw.
9 Agulé guwaen i Datù Nemula diyà si Mosis, “Peunut a diyà sa mekepal gaeb amuk mangay a mikagi diyà keniko anì medineg sa medoo etaw sa egoh ku sumetawit keniko, anì kumeeles sa kesalig da diyà keniko taman melugay.”
Agulé tinulon i Mosis diyà si Datù Nemula sa inikagi sa medoo etaw.
10 Mig-ikagi dema Datù Nemula i diyà si Mosis, guwaen di, “Pelikù ka dé. Tuloni ko sa medoo etaw anì tapayen da dé kagda pelanih ini egoh di owoy simag ma owoy anì pìpìan da ma sa ginis da enù ka sumimbà da diyà kenak. 11 Agulé amuk meuma sa ketelu di agdaw, meketapay da dé, enù ka iya sa egoh ku tumenà diyà siini Getan Sinay anì hauwen sa medoo etaw aken i Datù Nemula. 12 Huenan di, baeli ko sa elet ipeulingut diyà siini getan owoy hawidi ko kagda anì endà tipayen da duu owoy anì endà tumekedeg da owoy endà ma utuhan da duu, enù ka meimatayan doo sumalà dé sa etaw tumipay. 13 Amuk duen sa tumipay, panà yu daa ataw ka buungen yu daa batu anì mematay, enù ka melihi amuk egsabaan yu. Amuk duen sa tumipay, iling ka etaw ataw ka hinagtay, meimatayan da doo. Na, amuk dinegen yu sa dagì tegbuli, angay yu setiponoy langun diyà sa esudan siini getan.”
14,15 Agulé miglungel dema Mosis i kedu diyà sa getan, owoy egtulonon di sa medoo etaw, guwaen di, “Amuk meuma sa ketelu di agdaw, tumenà Datù Nemula i. Huenan di, tapayen ta pelanih sa lawa ta owoy pìpìan ta ma sa ginis ta enù ka sumimbà ki diyà kenagdi. Owoy endà ma mebaluy di amuk meseuma da lawa sa etaw telesawa sa linuwan ta eg-angat-angat si Nemula.”
16 Na, egoh di neuma sa magtu kesimag ketelu di agdaw, egsilà owoy egpeletê diyà siedò getan, owoy duen ma sa mekepal gaeb diyà sa pulu tuduk, owoy duen ma sa dagì tegbuli tigtu metaled dinineg da. Huenan di, eglukub sa langun etaw danà da nelimedangan. 17 Agulé inuwit i Mosis sa langun etaw eg-angay diyà sa esudan siedò getan anì telabuken da Nemula i. 18 Éhê egoh eg-ebel sa Getan Sinay, enù ka migtenà Datù Nemula i nekeiling palas apuy. Migtiboloy sa ebel lagà sa ebel sa dakel apuy, huenan di tigtu eglukub ma sa medoo etaw danà da egkelimedangan.a 19 Owoy egkeumanan ma sa ketaled sa dagì tegbuli. Mig-ikagi Mosis i, agulé sinagbian i Nemula sa éhê kagi kilat.
19:20-25 Mig-ikagi dema Datù Nemula i diyà si Mosis anì hawidan di sa medoo etaw anì endà tipayen da duu siedò elet nekeulingut diyà sa getan kenà i Nemula migtenà.