20
Ini Sa Egoh I Nemula Migbegay Sa Sepulù Uledin Diyà Si Mosis
1 Na, mig-ikagi Nemula i owoy ini sa kagi di, 2 guwaen di, “Aken si Datù Nemula sa egpigtuuwen yu, owoy aken sa mig-uwit keniyu kedu Igiptu dò kenà yu neudipen.
3 “Huenan di, yoko egpenemula duu sa liyu, aken daa sa penemula yu.
4 “Yoko egbael duu sa inetaw penemulawen yu sa éhê palas sa eghauwen yu dutu langit dò ataw ka dahini diyà tanà ataw ka sa medoo diyà wayeg. 5 Yoko egligkued da diyà sa taengan da owoy yoko ma egsimbà ya diyà kenagda, enù ka aken si Datù Nemula sa egpigtuuwen yu. Tigtu a endà meiyap amuk duen sa liyu egpenemulawen yu. Huenan di, tigtu pigtamayan ku sa etaw eg-iniyug diyà kenak, lapeg sa anak da taman sa bébê siku da. 6 Dodoo sa medoo etaw eghidu kenak owoy egpangunut ma diyà sa langun uledin ku, ipehaa ku doo diyà kenagda owoy diyà sa medoo tugod da sa dakel kehidu ku kenagda taman melugay.
7 “Yoko eg-usal duu sa ngadan ku diyà sa medoo medaet ungayà yu, enù ka tigtu pigtamayan ku doo sa etaw eg-ikagi daa uloy sa ngadan ku, aken i Datù Nemula sa egpigtuuwen yu.
8 “Yoko egkelipeng duu eg-adatan sa Agdaw Keetud, enù ka iya sa baed ku. 9 Mebaelan yu doo sa galebek yu taman enem agdaw. 10 Dodoo sa kepitu di agdaw, iya sa Agdaw Keetud sa ibegay yu diyà kenak baed ku, aken i Datù Nemula. Amuk meuma dé sa kepitu di agdaw, yoko eglampang duu danà yu eggalebek, hediya ma sa anak yu owoy sa egsuguen yu owoy sa hinagtay yu owoy sa etaw beken tigtu duma yu ma eg-ugpà diyà sa menuwa yu. 11 Enù ka aken si Datù Nemula sa migpeduen sa langit owoy tanà owoy dagat lapeg sa langun eghauwen dalem taman enem agdaw daa. Agulé mig-etud a diyà sa kepitu di agdaw enù ka neubus dé sa langun. Huenan di, pinilagà ku siini agdaw enù ka tigtu mapulù diyà sa kehaa ku.
12 “Adati yu sa emà yu owoy sa inay yu, anì melalù yu mugpà diyà sa tanà ibegay ku diyà keniyu.
13 “Yoko eg-imatay ya etaw.
14 “Yoko egbigà ya.
15 “Yoko egpenakaw wa.
16 “Yoko egbutbut ta egtipu sa duma yu.
17 “Yoko egkesina ya, owoy yoko egkeilayam duu sa langun taman sa duma yu, upama sa dalesan di ataw ka sa sawa di ataw ka sa udipen di ataw ka sa hinagtay di ataw ka sumalà dé sa hagdi langun taman.”
Ini Sa Egoh Da Tigtu Nelimedangan Sa Medoo TegeIslaél
18 Na, egoh sa medoo tegeIslaél migdineg sa kilat owoy sa dagì tegbuli, owoy egoh da mighaa sa silà owoy sa mekepal ebel diyà sa getan, tigtu nelimedangan da, huenan di eglukub da owoy egpediyùdiyù da egtigdeg. 19 Agulé migpegeni da diyà si Mosis, guwaen da, “Amuk kuna dé sa mikagi diyà kenami, pangunutan ké doo, dodoo yaka dé egpeikagi duu Nemula i diyà kenami anì endà mematay ké.”
20 Agulé mig-ikagi Mosis i diyà kenagda, guwaen di, “Yoko egkelimedangan na. Egtepengan i Nemula daa kiyu anì tigtu adatan yu owoy anì endà mekebael yu salà diyà kenagdi.”
21 Hê, mig-angay Mosis i egpedapag diyà sa mekepal gaeb sa kenà i Nemula migpeunut. Dodoo sa medoo etaw, tapay da doo egpediyùdiyù eg-ugpà diyà sa esudan getan.
20:22-23:33 Na, igbegay i Nemula sa medoo uledin di diyà si Mosis anì pangunutan sa medoo tegeIslaél. Duen uledin denu sa mepion keugpà da owoy duen ma sa denu adat kesimbà da diyà si Datù Nemula. Owoy igpasad i Nemula ma sa ketabang di kenagda anì mekeuma da diyà sa tanà ibegay di diyà kenagda.