24
Ini Sa Egoh Sa Medoo Etaw Netuuwan Diyà Sa Pasad I Nemula Diyà Kenagda
1 Agulé mig-ikagi Datù Nemula i diyà si Mosis, guwaen di, “Tekedeg ka dema angay diyà sa kenà ku. Uwit ko ma Alon i owoy sa duwa anak di, si Nadab owoy si Abihu, owoy sa pitu pulù kaunutan sa medoo tegeIslaél. Owoy amuk mediyùdiyù yu pelawà, simbà yu diyà kenak. 2 Kuna daa sa mekeangay dumapag diyà kenak, beken sa medoo duma ko. Endà ma mebaluy di peunut da tumekedeg sa medoo tegeIslaél.”
3 Agulé migpelikù Mosis i owoy egtulonen di diyà sa medoo tegeIslaél sa langun uledin igsugù i Datù Nemula. Neseselengan da egsagbì, guwaen da, “Mangunut ké doo diyà sa langun igsugù i Datù Nemula.” 4 Agulé igsulat i Mosis sa langun igsugù i Datù Nemula.
Na, egoh di umenaw simag, miglapus Mosis i mig-angay diyà sa esudan sa getan owoy binaelan di sa atung kenà da eg-ulow sa ibegay da diyà si Nemula. Pinetigdeg di ma sa sepulù owoy duwa batu anì tandaan di sa sepulù owoy duwa geumpung tugod i Islaél. 5 Agulé sinugù di sa medoo batàbatà maama anì mangay da umulow sa medoo hinagtay inimatayan da ibegay da diyà si Datù Nemula. Sinumbalì da ma sa medoo tudu sapì sa ibegay da diyà si Nemula, agulé kinaen sa medoo etaw anì tandaan da sa kesepasaday da si Nemula. 6 Agulé binaed i Mosis sa depanug sa medoo hinagtay inimatayan da. Tinoyo di pelanggana sa sebaed, owoy igsawel di sa sebaed diyà sa atung kenà da eg-ulow sa ibegay da diyà si Nemula. 7 Agulé kinuwa di ma siedò igsulat di sa pasad i Datù Nemula diyà kenagda, owoy binasa di diyà sa medoo etaw. Hê, migsagbì da langun, guwaen da, “Tigtu mangunut ké diyà sa langun uledin igsugù i Datù Nemula.”
8 Agulé kinuwa i Mosis sa depanug dalem sa pelanggana, owoy pinebegisbisan di sa medoo etaw. Guwaen di, “Siini depanug, ini sa tandà sa kepasad yu mangunut diyà sa langun uledin igsugù i Datù Nemula diyà keniyu.”
Ini Sa Egoh I Mosis Migtekedeg Dema Diyà Sa Getan Sinay
12 Agulé mig-ikagi Datù Nemula i diyà si Mosis, guwaen di, “Tekedeg ka dema diyà siini getan. Ligò ko eg-ugpà dahini, ibegay ku diyà keniko sa dakel melugpayang batu sinulatan ku sa medoo uledin ku anì itulù ko diyà sa medoo etaw.”
13,14 Huenan di, mig-ikagi Mosis i diyà sa medoo kaunutan tegeIslaél, guwaen di, “Angat yu daa dahini taman sa egoh ké mekelikù dema. Kaini si Alon owoy si Hul. Amuk duen etaw egkesesigbolow, angay yu diyà kenagda peantang.” Agulé inuwit i Mosis Hosuwa i salu di owoy migtekedeg da diyà sa getan kenà i Nemula.
15 Na, egoh i Mosis migtekedeg diyà sa Getan Sinay, nelimunan dema gaeb sa pulu tuduk. 16,17 Owoy migtenà sa senang i Datù Nemula diyà sa tuduk. Egoh sa medoo tegeIslaél mighaa iya wé, lagà dakel apuy sa senang i Nemula diyà sa pulu tuduk. Taman enem agdaw nelimunan gaeb iya wé tuduk. Agulé egoh di neuma sa kepitu di agdaw, inumow i Datù Nemula kedu diyà sa teliwadà gaeb Mosis i. 18 Na, egoh i Mosis migtekedeg, migpelahuk diyà sa gaeb. Epat pulù agdaw lapeg sigep sa lugay di eg-ugpà dahiya.