25
1 Agulé mig-ikagi Datù Nemula i diyà si Mosis, guwaen di, 2 “Ikagiyi ko sa medoo tegeIslaél anì megay da diyà kenak, owoy kuna sa sumakem sumalà dé sa nehemilì sa pedu da ibegay.
8 “Owoy pebaeli ko ma diyà kenagda sa dakel kemalig ku. Tigtu mapulù iya wé kemalig, enù ka iya lagà sa kenà ku umugpà anì takà a umunut-unut diyà keniyu. 9 Amuk baelan yu sa kemalig ku owoy sa langun tigol di dalem, ilingi yu daa sa ukit-ukit ipetiig ku diyà keniko.”
25:10-31:17 Na, egoh i Mosis eg-ugpà pelà diyà sa getan taman epat pulù agdaw, igtulù i Datù Nemula diyà kenagdi sa ukit kebael da sa kemalig i Nemula. Tinulon di diyà si Mosis anì eghemilien di sa medoo etaw diyà sa medoo tegeIslaél anì baelan da sa kemalig owoy sa medoo tigol di dalem. Kunul hinagtay sa iatep da sa kemalig owoy sa ikelatkat da ma.
Na, dalem sa kemalig, duen sa ginis ihabeng diyà sa teliwadà luwang di anì mebaluy duwa sa bilik di. Na, sa bilik di denu selat, pinengadanan da sa Mapulù Bilik i Nemula. Duen dahiya sa lamisan sinukuban bulawan kenà da egtenà sa epan ibegay da diyà si Nemula. Duen ma sa duwa metaes kayu di atung kenà da egsabà amuk eg-uwiten da. Igtagù da ma diyà siini bilik sa taguan sulù épê pitu panga. Na sa pitu panga di, anan épê sulù, owoy bulawan sa binaelan da sa taguan sulù. Igsugù i Nemula ma anì meelutan sigep sa keulow da lana olibu diyà sa sulù.
Na, pinengadanan da sa keduwa di bilik di sa Tigtu Mapulù Bilik i Nemula. Iya sa kenà di igtagù sa Baul Tandà Sa Igpasad i Nemula sinukuban bulawan. Na, duen ma sa duwa metaes kayu atung kenà da egsabà amuk eg-uwiten da sa Baul, owoy dinalem da ma sa kaenen mana owoy sa melugpayang batu sinulatan sa uledin i Nemula.
Na, diyà duwangen sa kemalig, duen sa binaelan da sa atung kenà da eg-ulow sa ibegay da diyà si Nemula. Sinukuban galang sa atung kenà da eg-ulow. Duen ma sa duwa metaes kayu di atung kenà da egsabà amuk eg-uwiten da. Duen ma diyà sa duwangen di sa dakel pelanggana binaelan da galang sa atung kenà sa tegesimbà egpegusê.
Na, sa medoo langun taman diyà sa kemalig binaelan da, inilingan da sa medoo igsugù i Nemula diyà si Mosis. Duen ma sa binaelan da anì melemu sa keuwit da sa kemalig owoy sa langun taman di amuk meuma sa kehalì da.
Igtulù i Nemula ma diyà si Mosis sa kebael da sa ginis sa medoo atung tegesimbà, owoy igtulù di ma sa ukit sa kegelal i Mosis si Alon owoy sa anak di anì kagda sa atung egbael sa galebek sa tegesimbà.