10
Neamu Sa Binaelan Sa Duwa Anak I Alon Diyà Sa Dakel Kemalig
1 Na, sebaen agdaw ini sa binaelan sa duwa maama anak i Alon, si Nadab owoy si Abihu. Migkuwa da sigbaenay sa atung taguan apuy owoy dinaleman da sa apuy, agulé eg-ulowen da sa mepion ngadeg diyà sa taengan i Datù Nemula. Dodoo endà egketuuwan Nemula i diyà sa binaelan da enù ka endà igsugù di duu. 2 Huenan di, petow dé migsiglob sa apuy danà i Datù Nemula, hê nematay da diyà sa taengan di. 3 Agulé mig-ikagi Mosis i diyà si Alon, guwaen di, “Ini sa selepangan sa inikagi i Datù Nemula, guwaen di,
Meadatan a doo sa langun etaw eg-angay diyà kenak
enù ka tigtu a metiengaw,
owoy meolò a ma sa langun etaw.”
Dodoo endà mekesagbì Alon i.
4 Agulé inumow i Mosis Misaél i owoy si Ilsapan, sa duwa anak i Usiyél momò da i Alon. Egoh da migtebow, guwaen di diyà kenagda, “Angay yu kuwa sa duwa anak sa duma telahadi yu nematay diyà siini mapulù simbaan ta, owoy uwit yu diyà sa dibaluy sa kenà ta mig-esud.” 5 Huenan di, kinuwa da sa nematay tapay doo migginis sa ginis tegesimbà owoy inuwit da diyà dibaluy sa kenà da mig-esud, enù ka iya sa igsugù i Mosis diyà kenagda.