34
Ini Sa Egoh I Nemula Migsulat Dema Sa Uledin Di Diyà Sa Melugpayang Batu
1 Na, mig-ikagi dema Datù Nemula i diyà si Mosis, guwaen di, “Baeli ko sa duwa melugpayang batu lagà mendaa sa muna batu, enù ka isulat ku dema diyà kenagda sa uledin ku sa igsulat ku diyà sa muna batu pinesà ko. 2 Tapay ko dé baeli ini egoh di, enù ka simag tekedeg ka dema diyà sa Getan Sinay anì telabuken ko aken dutu siedò pulu tuduk. 3 Yaka eg-uwit ta sa duma ko, owoy hahaa ko anì endà umutuh sa etaw diyà siedò getan. Apiya sa medoo hinagtay yu, yoko egpetabtab duu diyà sa esudan sa getan.”
4 Huenan di, binaelan i Mosis sa duwa melugpayang batu lagà mendaa sa muna. Egoh di umenaw simag, miglapus egtekedeg diyà sa Getan Sinay owoy inuwit di sa duwa melugpayang batu, enù ka iya sa igsugù i Datù Nemula diyà kenagdi. 5 Agulé migtenà Datù Nemula i egpeunutan gaeb diyà sa pulu tuduk. Migtigdeg medapag diyà si Mosis owoy inikagi di ma sa mapulù ngadan di, si Datù Nemula.a 6 Migtalà diyà sa taengan i Mosis, owoy pinetaled di sa kagi di, guwaen di, “Aken si Datù Nemula, sa tigtu mehidu owoy tegetabang. Endà melemu a mulit. Endà egkehalì sa dakel kehidu ku owoy kesaligan a ma. 7 Petuuwen ku doo sa igpasad ku kehidu taman sengibu getugod, owoy ipeuloy ku sa medaet egbaelan da owoy sa salà da ma. Dodoo sa etaw egkeiyap egbael salà, pigtamayan ku doo kagda owoy sa tugod da taman sa bébê siku da.”
8 Agulé petow dé migligkued Mosis i owoy migsimbà, 9 guwaen di, “O Datù Nemula, amuk tigtu ka egketuuwan diyà kenak, egpegeniyen ku diyà keniko sa keunut-unut ko diyà kenami. Metegas ulu siini medoo etaw, dodoo peuloyi ko sa medaet egbaelan ké owoy sa salà ké, owoy pelagà ko ma kami sa tigtu etaw ko.”
34:10-26 Na, binaelan i Nemula dema sa pasad di diyà sa medoo etaw di owoy igtulù di ma sa medoo uledin anì kumepion sa keugpà da diyà sa tanà angayan da owoy anì kumepion ma sa adat kesimbà da diyà si Datù Nemula.
27 Na, egoh i Datù Nemula ubus mig-ikagi iya wé, guwaen di dema diyà si Mosis, “Sulati ko siini medoo kagi ku, enù ka ini sa nesepasadan ta. Amuk pangunutan yu, niyu doo sa langun igpasad ku ibegay diyà keniko owoy diyà sa medoo tegeIslaél.” 28 Na, epat pulù agdaw lapeg sigep dema sa lugay i Mosis diyà sa kenà i Datù Nemula diyà sa getan. Egoh di dutu, endà egkaen di owoy endà ma eg-inem di. Igsulat di diyà sa melugpayang batu sa kagi i Nemula nesepasadan da. Iya sa Sepulù Uledin di.
Ini Sa Egoh Sa Palas I Mosis Migsenang
29 Na, egoh i Mosis eglungel kedu diyà sa Getan Sinay, inuwit di sa duwa melugpayang batu sinulatan sa sepulù uledin i Nemula. Migsenang sa palas di danà da egseolomoy si Datù Nemula, dodoo endà netiigan di duu. 30 Agulé egoh i Alon owoy sa medoo tegeIslaél mighaa sa palas i Mosis egsenang, egpesu da egpedapag diyà kenagdi. 31 Dodoo inumow i Mosis kagda. Huenan di migpelikù Alon i owoy sa medoo kaunutan tegeIslaél eg-angay diyà kenagdi, owoy inikagiyan i Mosis kagda. 32 Agulé egoh di neubus sa keseolomoy da, mig-angay ma dé egpedapag sa langun tegeIslaél diyà kenagdi. Hê, tinulon i Mosis diyà kenagda sa langun uledin igpetiig i Datù Nemula diyà kenagdi dutu Getan Sinay dò.
33 Na, egoh i Mosis neubus migtulon sa kagi i Nemula diyà kenagda, linimunan di sa palas di. 34 Dodoo uman umangay Mosis i diyà sa kemalig kenà i Datù Nemula anì mikagi diyà kenagdi, egkedanan di dema sa iglimun di diyà sa palas di. Owoy amuk lumaun, egtulonen di dema diyà sa medoo duma di tegeIslaél sumalà dé sa igpeikagi i Datù Nemula diyà kenagdi. 35 Hê, hinaa da egsenang dema sa palas di. Huenan di, eglimunan di sa palas di taman endà meuma sa egoh di mangay dema mikagi diyà si Datù Nemula.
35:1-40:33 Na, egselepangen i Nemula sa ukit kebael da sa Dakel Kemalig kenà sa medoo tegeIslaél egsimbà diyà si Datù Nemula. Inilingan da sa igtulù i Nemula diyà si Mosis diyà sa Getan Sinay. Inuwit sa medoo etaw sa igbegay da diyà si Nemula anì dumuen sa medoo langun taman anì egbaelan da sa Dakel Kemalig owoy sa medoo tigol di owoy sa mapulù ginis sa medoo tegesimbà. Migsubela sa igbegay da. Duen ma medoo maama owoy bayi hinemilì i Nemula anì tigtu metiigan da sa kebael da sa igpetiig i Nemula diyà si Mosis.