40
Ini Sa Egoh Di Migtenà Sa Senang I Datù Nemula Diyà Sa Kemalig Simbaan Da
34 Na, egoh da neubus migbael sa Dakel Kemalig simbaan da, migtenà dahiya sa beletukoy mighuna diyà sa medoo tegeIslaél egoh da eg-ipanaw. Owoy takà ma egkelegdawan sa kemalig danà sa senang i Datù Nemula. 35 Huenan di, endà egpekeludep Mosis i diyà sa Dakel Kemalig enù ka eg-ugpà dahiya sa gaeb owoy nebensek senang i Datù Nemula sa luwang kemalig.
36 Na, ini sa ukit keipanaw sa medoo tegeIslaél. Uman egpesoyol sa beletukoy migtenà diyà sa Dakel Kemalig, mipanaw da dema. 37 Dodoo amuk endà egpesoyol di, endà pelà mipanaw da. Eg-angat-angatan da sa egoh sa beletukoy egpesoyol, hê iya da pelawà mipanaw. 38 Huenan di, edung egoh iya taman sa lugay da eghalìhalì diyà sa melabel tanà mediyù dalesan, tapay doo eghauwen da iya wé beletukoy inugpaan i Nemula. Amuk agdaw, eg-ugpà diyà sa Dakel Kemalig; dodoo amuk sigep, lagà apuy sa palas di enù ka iya sa tandà i Datù Nemula eg-unut-unut diyà kenagda.