33
33:1-11 Na, sinugù i Datù Nemula sa medoo tegeIslaél anì lumegkà da diyà sa Getan Sinay. Edung egoh iya, takà eg-ikagi Datù Nemula i diyà si Mosis diyà sa kemalig eg-uwit-uwiten da sumalà dé sa angayan da.
Ini Sa Egoh I Nemula Migpasad Sa Ketabang Di Sa Medoo Etaw Di
12 Na, mig-ikagi dema Mosis i diyà si Datù Nemula, guwaen di, “Tuu sa inikagi ko aken sa umuwit siini medoo etaw kedu diyà Igiptu taman mekeuma ké diyà sa tanà igpasad ko ibegay diyà kenami. Dodoo endà pa tinulon ko duu diyà kenak ngadan tayu di etaw sa salu ku peunuten ko diyà kenak. Ini ma sa inikagi ko egkilalaen ko aken owoy egketuuwan ka ma diyà kenak. 13 Na, amuk tuu ka egketuuwan diyà kenak, tului ko atu sa penemdem ko diyà kenak anì metiigan ku ma sa uyot ko anì muman a mael sa kenà ko metuuwan. Owoy ketulengi ko ma sa egoh ko mighemilì siini medoo tegeIslaél anì kagda sa etaw ko.”
14 Migsagbì Datù Nemula i, guwaen di, “Munut-unut a doo diyà keniyu, owoy tabangan ku ma kiyu anì tumaban yu diyà sa medoo kuntelà yu owoy anì kumelanih ma sa keugpà yu diyà sa tanà angayan yu.”
15 Agulé guwaen i Mosis, “Mepion amuk hediya, enù ka amuk endà munut-unut ka diyà kenami, yaka ma egpelegkà kenami dahini. 16 Enù ka amuk endà munut-unut ka diyà kenami, endà metiigan sa medoo liyu balangan etaw duu sa egoh ko netuuwan diyà kenak owoy diyà siini medoo etaw ko ma. Dodoo amuk munut-unut ka diyà kenami, tigtu metumàmaan da sa egoh ko mighemilì kenami diyà sa medoo liyu etaw diyà siini sinukub langit.”
17 Agulé guwaen i Datù Nemula, “Baelan ku doo sa pinegeni ko, enù ka egketuuwan a diyà keniko owoy netiigan ku ma sa pedu ko.”
18 Guwaen i Mosis, “Amuk hediya, mebaluy pa atu ipehaa ko diyà kenak sa senang ko?”
19 Migsagbì Nemula i, guwaen di, “Tumalà a diyà sa taengan ko anì hauwen ko sa senang ku, owoy tulonen ku ma diyà keniko sa mapulù ngadan ku, aken i Datù Nemula. Aken sa humemilì sa etaw hiduwan ku, owoy aken ma sa humemilì sa etaw tabangan ku. 20 Dodoo endà mehaa ko duu sa palas ku, enù ka endà mehagtay di sa etaw humaa kenak. 21 Dodoo duen sa batu medapag diyà kenak sa kenà ko meketigdeg. 22 Amuk tumalà sa senang ku, iawuh ku kuna diyà sa elà sa batu, owoy limunan ku kuna sa kagpa belad ku taman endà tumalà a. 23 Amuk migtalà a dé, awangan ku kuna anì hauwen ko sa iyug ku, dodoo endà daa hauwen ko duu sa palas ku.”