Éksodo 32

Ini Sa Egoh Sa Medoo TegeIslaél Migpenemula Sa Binaelan Da Éhê Palas Sapì

¹ Na, danà i Mosis nelugay diyà sa getan, nesetipon sa medoo tegeIslaél diyà si Alon owoy guwaen da, “Baeli ko sa penemulawen ké anì dumuen sa umuwit kenita, enù ka endà netiigan ta duu sa nebaelan i Mosis sa mig-uwit kenita kedu Igiptu dò.”

² Migsagbì Alon i, guwaen di, “Amuk hediya, lengà yu sa medoo bulawan igtunggal sa sawa yu owoy sa medoo anak yu ma, owoy uwit yu diyà kenak.” ³ Huenan di, linengà sa langun etaw sa tunggal da bulawan owoy ighated da diyà si Alon. ⁴ Egoh i Alon migkuwa sa medoo bulawan da, tinunag di owoy igdusdus di diyà sa limbagan enù ka egbaelan di sa éhê palas sa manepeng nati sapì maama. Agulé mig-ikagi sa medoo etaw, guwaen da, “Ini dé sa penemulawen ta, kita i tegeIslaél, enù ka ini sa nemula ta mig-uwit kenita kedu Igiptu dò.”

⁵ Na, egoh i Alon neketiig sa penemdem da, binaelan di diyà sa taengan sa inetaw éhê palas sapì sa atung kenà da eg-ulow sa ibegay da diyà si Nemula. Agulé inikagiyan di sa medoo etaw, guwaen di, “Simag baelan ta sa pista keolò ta si Datù Nemula.” ⁶ Agulé egoh di umenaw simag, miglapus da egbegay sa medoo hinagtay sumbalien da anì ulowen da diyà siedò atung kenà da eg-ulow sa ibegay da, owoy duen ma sa duma hinagtay egsumbalien da owoy egkaenen da ma anì tandaan da sa kepigtuu da diyà sa inetaw egpenemulawen da. Egpenuu da egkaen owoy meibeg da eg-inem sa mekehilu, agulé egkeanggan da egbael sa medoo balangan medaet.

⁷ Agulé, mig-ikagi Datù Nemula i diyà si Mosis, guwaen di, “Pelikù ka dé diyà sa medoo duma ko tegeIslaél sa inuwit ko kedu Igiptu dò, enù ka ini egoh di migkedaet sa egbaelan da. ⁸ Apiya di pa endà nelugay di, migsekê da dé diyà sa medoo uledin ku diyà kenagda. Binaelan da sa inetaw bulawan éhê palas sa maama nati sapì owoy iya sa egpenemulawen da. Iya ma dé sa kenà da egbegay sa medoo igpeuloy da. Owoy ini ma sa kagi da, guwaen da, ‘Ini sa penemulawen ta, kita i tegeIslaél, enù ka ini sa nemula ta mig-uwit kenita kedu Igiptu dò.’ ⁹ Na, netiigan ku doo sa pedu siedò medoo etaw owoy sa ketegas ulu da ma. ¹⁰ Huenan di, yaka eghawid kenak enù ka tigtu egbulitan ku kagda, owoy pigtamayan ku kagda imet. Dodoo kuna, pedoowen ku sa tugod ko anì mebaluy da dakel segenuwa.”

¹¹ Dodoo migpehiduhidu Mosis i diyà si Datù Nemula sa egpigtuuwen di. Guwaen di, “O Datù Nemula, yaka egbael duu iya wé. Yaka egbulitan duu sa medoo etaw ko inuwit ko kedu Igiptu dò danà sa medoo panduan binaelan ko danà sa dakel egkegaga ko. ¹² Enù ka amuk imatayan ko kagda ini egoh di, mekeikagi sa medoo tegeIgiptu, guwaen da dò, endà mepion sa uyot i Nemula, enù ka inuwit di sa medoo tegeIslaél kedu diyà sa tanà ta anì imatayan di kagda imet dutu siedò getan. Huenan di, egpegeni a diyà keniko anì endà ipetuu ko duu sa kebulit ko kenagda anì endà ma meketuu siini penemdem ko peangay sa dakel kepigtamay ko diyà sa medoo etaw ko. ¹³ Ketulengi ko sa medoo etaw ko si Ablaham owoy si Isak owoy si Hakob, enù ka migpasad ka diyà kenagda anì pedoowen ko sa tugod da anì lagà da sa kedoo bituen diyà langit, owoy igpasad ko ma ibegay ko diyà kenagda sa tanà Kanan anì mehagda taman melugay.” ¹⁴ Huenan di, nesenulê Datù Nemula i owoy endà igpetuu di duu sa penemdem di migtamay sa medoo etaw di.

¹⁵ Agulé migpelikù eglungel Mosis i, owoy inuwit di siedò duwa melugpayang batu sa sinedibaluy egsulatan sa uledin i Nemula. ¹⁶ Na, si Nemula sa migbael sa melugpayang batu owoy kagdi ma sa migsulat sa uledin di dahiya.

¹⁷ Na, egoh i Hosuwa migdineg sa lukiyang sa medoo etaw, mig-ikagi diyà si Mosis, guwaen di, “Hediya ka duen gila diyà sa kenà sa medoo duma ta.”

¹⁸ Dodoo migsagbì Mosis i, guwaen di, “Sa metaled dagì egdinegen ko, beken hediya sa keumow sa etaw migtaban owoy beken ma sa keumow sa etaw tinabanan, dodoo dagì duyuy polo sa kedineg ku.”

¹⁹ Agulé egoh da i Mosis medapag dé diyà sa kenà da nesetipon, hinaa di sa binaelan da inetaw éhê palas sa maama nati sapì, owoy hinaa di ma sa medoo etaw egdelayaw. Hê, tigtu egbulit, huenan di igdugsù di diyà sa esudan getan siedò melugpayang batu sinulatan sa uledin i Nemula. Hê, minepesà sa melugpayang batu. ²⁰ Agulé kinuwa i Mosis sa inetaw éhê palas maama nati sapì binaelan da owoy inulow di diyà sa apuy owoy linupet di nekeiling bukbuk. Agulé igbuhbuh di diyà sa wayeg anì ipeinem di diyà sa medoo tegeIslaél.

²¹ Agulé inigsaan di Alon i, guwaen di, “Ngadan sa binaelan siini medoo etaw diyà keniko? Maen di ya egpandayaen ko kagda egbael siini dakel salà?”

²² Migsagbì Alon i, guwaen di, “O Datù, yaka egbulit kenak, enù ka netiigan ko doo sa pedu siini medoo etaw owoy sa ungayà da egbael medaet. ²³ Huenan di, guwaen da diyà kenak, Baeli ko sa nemula ké anì dumuen sa umuwit kenita, enù ka endà egketiigan ta duu sa nebaelan i Mosis sa mig-uwit kenita kedu Igiptu dò. ²⁴ Agulé guwaen ku diyà kenagda amuk duen etaw épê sa imu-imu bulawan, lengaen da owoy uwiten da ma diyà kenak. Egoh ku migkuwa iya wé, igdugsù ku diyà sa apuy. Hê, nebaluy dé polo inetaw éhê palas nati sapì.”

²⁵ Na, netiigan i Mosis egpengahàngahà sa medoo etaw enù ka endà nekegaga Alon i eghawid kenagda. Huenan di, mebaluy pelononon sa medoo kuntelà da kagda. ²⁶ Agulé mig-angay Mosis i diyà sa bengawan sa kenà da eg-ugpà, owoy mig-umow, guwaen di, “Angay yu diyà kenak, kiyu i langun etaw egpangunut diyà si Datù Nemula.” Agulé migpedapag diyà kenagdi sa langun tugod i Lebi.

²⁷ Agulé mig-ikagi Mosis i diyà kenagda, guwaen di, “Ini sa kagi i Datù Nemula sa egpigtuuwen ta, kita i tegeIslaél. Seliketi yu sa sundang yu. Seluh yu timbul diyà siini kenà ta eg-ugpà taman mekeuma yu dibaluy dò. Imatayi yu sa medoo duma yu tegeIslaél, apiya di pa sa duma yu telahadi ataw ka sa loyuk yu ataw ka sa duma yu neseduwangen dalesan.” ²⁸ Hê, pinangunutan sa medoo tugod i Lebi sa igsugù i Mosis. Nekeuma telu ngibu sa kedoo etaw inimatayan da egoh iya wé agdaw. ²⁹ Agulé guwaen i Mosis, “Na, tigtu egtandaan yu dé sa kepangunut yu diyà sa uyot i Datù Nemula, enù ka apiya sa anak yu ataw ka sa duma yu telahadi, inimatayan yu doo enù ka iya sa igsugù i Nemula. Huenan di, tabangan i Datù Nemula kiyu ini egoh di.”

³⁰ Na, egoh di umenaw simag, mig-ikagi Mosis i diyà sa medoo tegeIslaél, guwaen di, “Tigtu dakel sa salà binaelan yu. Dodoo tumekedeg a dema mangay diyà sa kenà i Datù Nemula dutu siedò getan anì pegeniyen ku sa kepeuloy di hedem sa salà yu.”

³¹ Agulé migtekedeg dema Mosis i diyà sa getan. Egoh di migtebow diyà sa kenà i Datù Nemula, guwaen di, “Tigtu dakel sa salà binaelan siini medoo etaw, enù ka binaelan da sa inetaw bulawan owoy pinenemula da ma. ³² Gasama iya, tigtu egpegeniyen ku diyà keniko anì ipeuloy ko sa salà da, amuk mebaluy. Dodoo amuk endà ipeuloy ko duu, kedani ko sa ngadan ku diyà sa libelu kenà ko egsulat sa ngadan sa medoo etaw ko.”

³³ Migsagbì Datù Nemula i, guwaen di, “Sumalà dé sa etaw nesalà diyà kenak, iya sa kedanan ku ngadan diyà sa libelu ku. ³⁴ Na, uwit ko sa medoo tegeIslaél mangay dutu siedò tinulon ku diyà keniko, owoy iya sa humuna diyà keniyu sa egsugùsuguen ku. Dodoo meuma kani sa agdaw egoh ku migtamay siini medoo tegeIslaél danà sa salà da.”

³⁵ Hê, neuma dé sa kepigtamay di kenagda, enù ka pinelinadu i Datù Nemula sa medoo etaw danà da migpenemula sa inetaw éhê palas nati sapì sa igpebael da diyà si Alon.