Aroné Arolok-duːnam
3
Ngok ajonkídínga, lutérso, nolu méːpolang kapilaːné nolu Ruːtumké taniːyé. Ngo poːpé okko émna atkaːji édémíng lékoda adlíkkupé ngo méːdírmang, kapilaːné édé nolukképé aidag. 2 Édé ikikídíːdém totsulang, séːkobulu aiman agerém igoːdang, bulu nolum gatpuksumopé méːdag. 3 Émpigeːla édé ngolu séːkobulu aro aropé gatpuksutag, kapilaːné ngolu Ruːnémé bík Yaloké tornamki kumdag odokké Kiristo Jisukolo pugdasudag. Ngolu okkom itang odok tayéːlo ngolu méːtinsumang. 4 Aropé ludung, ngo édémpiné agerkídíːdok tayéːlo méːtinsulaːdag. Nolukkolok séːkai akoné okkom itagji odok tayéːlo méːtinsulaːmílo, ngokké édémyang bojéyangko méːtinsulaːnan légangé dung. 5 Ngok loːnítko idodo ngom gatpuktag. Ngo Israel réngamnok taniːyé, ngom Benjamin opínno otag. Ngo nérkígné Ibri taniːko. Ngo Parosikai, édémpila Musiːké Luroːdok adnamkídíːdém pésola ibomdungngai. 6 Ngo kínggípé asin-díglaːyém kumgomsin ipusireka. Luroːdo okkom attagji édé appíːdém Ruːnémé méːyumsumonam légaːpé ngo idungngai. 7 Émpigeːla okko arrékadagji émna ngo méːdagan édébulu Kiristokkolo arékamang émna ngom léngkanbito. 8 Kiristo Jisu ngok Ruːtummé kinnamdémyang arékayaːné okkosin kamang. Ngo appíngém mépagam odokké édémbulum yaːné attar kísapé sappakto. Ngok laginamdé Kiristobí atéroːdé 9 odokké ngo bíkkolo dung émnamdém kinní:to. Musiːké luroːdok lulígnamkídíːdém ibomna Ruːnéké kanggaːlo ngo arolok-duːné taniːpé ilaːtomang. Ngo Kiristomé méngkésunamé Ruːnébí ngom arolok-duːnépé sabbitag. 10 Ngok laginam appíːdé Kiristomélang sikolokké bík turkunamdok tornamdém kinní:namdé. Bík duːg donamdémpéla sibinamdémpé ngoːsin sibilíːdag, 11 édémpimílo, kappouji ngoːsin sikolokké lékod-turkunammém paːmínyé.Ipé-méːnamdoːpé Gíyarnam
12 Ngok ipé-méːnamdém paːtobo émna ngo lusumang odokké ngo suːpésin píːramna dung. Émpigeːla ngo édém ngok aíké paːnam légaːpé ngalatsula dugla dung, kapilaːné Kiristo Jisubí ngom bík aíképé imoto. 13 Ajonkídínga, ngo odoːpé gípíːtagbo émna méːsumang. Émgom okko lamkupé dungkaːji édém ngo mitpan, odokké okko kanggaːpé duːji édém paːpé émna ngo ngalatsula dung. 14 Amandém paːnam légaːpé, ngo ipé-méːnamdoːpé yíg émdopé dugla dung, okodé Kiristo Jisukokki tayéng-amoːtoːpé Ruːnék gognamé.
15 Ngolu appíngé séːkobulu yalolo méːjubdagboːji ngolukké séː lékoné méːlotsé kapa:yé. Émpigeːla nolukkolok séːkai akonké anguné méːlodé kamílo, édém Ruːnébí nolum naréngoːpé kinmoyé. 16 Émpigeːla okkom ngolu paːtagboːji édém ngolu ibomtíla duːpaːyé.
17 Ajonkídínga, ngom ka:yisutílang. Ngolu nolukképé okkom kaːyisudopé mébitang édém kabodopé ibomnékídíːdok kaːyisulang. 18 Ngo poːpébo nolum séː agomsém lumolumola lubika, odokké suːpag ngo miksidíla ludung, bojérungkopé taniːyé dung séːkobulu Kiristoké kurusdok mirukísapé turradung. 19 Bulu uiːamobo singabyé, kapilaːné bulu buluk akiém kumsudag odokké okkom bulu anyisupénamméji édém bulu pugdasunadag. Odokké bulu séː moːpísok attaroːngém ménggoːdag. 20 Émpigeːla ngolu tayéng-amoːtok taniːyé, odokké ngolu ngolum Moturbinémé, Ruːtum Jisu Kiristomé tayéng-amoːtokké gídokupé tojunna toyaːla dung. 21 Bí ngoluk sipéné siperené adin-amírsém angumola bík aíké unjígné adin-amírdémpé imoyé, édé tornamíːdokki bí appíngém bík kéígammolaːdag.