Polké Luyír
4
Odok-légaːpé, ngok ajonkídínga, Ruːtumkolo arola duːyarrang. Ngo nolum aipé-méːdag odokké ngo nolum kaːlíːla dung; nolu ngok méːpodéːlang ngok dumlubdé.2 Iudia noːlang Sintike, noyi Ruːtumké taniːyé, ngo noyim kumdanna ludung akoné akonké lédílo lukerkaːmínsunamdém méːtobong. 3 Odokké ngok aroné ajona, ngo nomsin ludung, no séː mimé annyisém kaːdumsupoːto. Bínyi ngok lédílo odokké Kilemenkélang akon asakké lédílo tatpon lutaddém lugoːbiko agerro lékkopé gerjonsuka.
4 Ruːtumkolo loːdísém méːpola duːlang; lékoda ngo ludung, méːpola duːlang.
5 Noluk ajjisunamdém appíngém kaːpaːmolang. Ruːtumbí gígordokubo. 6 Atí légaːpé méːdíryok; émpigeːla appíng légaːpé kumnang. Noluk laginamém Ruːnémé lubisulang, odokké bík ibinam appíːdok légaːpé bím aipai bilang. 7 Odo okodé appíng méngkinnamdok tayéyaːdagji; Ruːnéké ansíːdé; noluk asinémna noluk méːloddém Kiristo Jisukolo dagribomna duːbiyé.
8 Ajonkídínga, lutérso, okko arroji, okko ménggésunaméji, okko kabodagji, okko nérkígdagji, okko kaːyumnéji, okko ainé-aminkadoji odokké okko luyitsunamém paːdoji édémbulu ménggoːlang. 9 Nolu ngokkolok okkoméi kaːyírsutang, toríksutang, tattang odokké ngokkolo kaːtang; édé appíːdém ibomnang. Odo ansíngém biné Ruːnébí noluk lédílo duːmínyé.
Amandok Légaːpé Aipai Binam
10 Ngo Ruːtumkolo kínggípé méːpodung kapilaːné nolu ngok légaːpé léddarso lékoda méːbidungku. Aroruːpé, nolu poːpélokkéboi ngok légaːpé méːbidaggai, émpigeːla édém léngkannan ayírko nolu paːtomang. 11 Odokké ngo édém méːyaméːsapé méːla lumang, kapilaːné ngokké okko duːji odok tayéːlo méːtísula duːnamdém ngo duːyírsutag. 12 Píːramdé okkon odokké laginammémyang kayanamdé okkon, édém ngo kindag. Ngo akibiːdogom, kénolduːdogom, kasekayegom kamanggom, appíng ayírro méːtísula duːjoːnamdok kinpíːmaːnamdém ngo kinto. 13 Séːkobí ngom tornamém bidagji bíkkoki ngo appíngém ilaːdag.
14 Émpigeːla nolu airuːpé aidagai, ngok ngasodla duːdodo nolu ngom kaːdumsoka. 15 Pilipidok ajonkídínga, nolu kinbínna kindag édílo ngo Mesodoniaːdo tatpon lutaddém luabiton odo kapé idagaːji. Ngo Mesodoniaːdokké gípakkunam lédupé, nollongai séːkobulu ngom murkongém bidumsula édém paːlatkunékídíːdé. Kumgo aːkosin ngom bidumsumangai. 16 Ngo Tisolonikaːdo duːdodosin nolu ngok lagidodo bimobimola ngom bidumsutagai. 17 Ngo nolukkolok oːkaiko paːpé émna lumang, émpigeːla binamdok paːlatkunam peyumdém nolu paːtoka émnapag ngo méːdag. 18 Ngo appíngém paːbíndanna paːlattakubo, paːpénamdémyaːsin bojéyangko paːttaku. Ngom appíngém bitag, Epaporditaské lédílo noluk mélígbikunam amandém ngo suːpag pangaːtag. Édébulu Ruːnékoloːpé tosagnam nampon-tosagnam kísadag, tosaglígnam okodém Ruːnébí toríksula édé bím méːyumsumodag. 19 Odokké ngok Ruːnébí bík kasekayela kanamdo noluk laginam appíngém Kiristo Jisukolo píːsídopé bikaːlangka. 20 Ngoluk Ruːné Abumé loːdílongkípé luyitsukaːlangǃ Amen.
Bitérnam Asin-aséng
21 Kiristo Jisuké légaːpé Ruːnék taniːpé iné appíngém ngok asin-aséngém bilang. Ngok lédílo sidok duːné méngkésunékídíːdé buluk asin-aséngém nolukkoloːpé séglígdung. 22 Langunam appíng taniyé nolukkoloːpé asin-aséngém séglígdung, anguruːpé Kaisorké okum-érangém kaːsíbinékídíːdoːpé.
23 Ruːtum Jisu Kiristoké aséngé noluk appíngkolo dungkaːlangka.