Ipisia Taniːkídíːdoːpé Polké Adnam Doːjíg
Lugot
Ipisiaːkídí:do:pé Polké doːjíksok méːbinamdé, méngadanna "Runék ipé-méːnamdém, tayéng-amoːtogla moːpísok duːné ruːnam appíngém lékkomopé, buluk mittuk kísapé Kiristobí ibidopé émna attag"(1ː10). Jisu Kiristokolo réngamsok appíng tani opíné lékola Ruːnéké édé ipé-méːnamdém ileddopé Ruːnék taniːkídíːdoːpésin séː doːjíksé kumpaːlígnamko.
Doːjíksém adangkodo, adnébí lékonam doːyíːdém atsarbiyaːtag. Bí édém sémpé adnam tayéːlo atsarbitag kapé Abu Ruːnébí bík taniːkídíːdém balenton, kapé bulum méːyinsubitang, odokké buluk paːblokkém kapé bík Aoːdokki motubiton, odokké kapé Ruːnék bottéruːpé pesubinamdé arorungé émna Angunné Yaloki togésubitag. Odok lédupé bí ponékídíːdém, Kiristokolo buluk lékonamdém aro aropé buluk duːnamdagnamdo kaːpaːpé lagidag émna kumpaːlígdung.
Kiristoké lédílo Ruːnék taniːkídíːdok lékonamdém bojéko luyisunamki lubitagː kumgodé adin-amírkísado; Kiristobí tukkudé; odokké okumkísado, Kiristobí tígotpoːnam ílíːdé; yamnékísado, Kiristobí milboːdé. Appíngém Kiristoké ayaːlo, bík sibinamno, bík méːyinsubinamno, bík aséːlo odokké bík narénamno kaːpaːdag.
Tarungkídíng
Lugotpoːnam (1.1-2)
Kiristobíːla Kumgodé (1.3-3.21)
Kiristokolo Anu Turnam (4.1-6.20)
Attér (6.21-24)