Ipisia Taniːkídíːdoːpé Polké Adnam Doːjíg
1
Séː doːjíksé Polkolokké, séːkom Ruːnéké méngkampé Jisu Kiristoké mélígnamkopé idopé goktang,Ipisiaːdok duːné Ruːnék taniːkídíng séːkobulu Jisu Kiristokolo aroladu:ji bulukkoloːpé adlígdung.
2 Ngoluk Ruːné Abubíːla Ruːtum Jisubí nolum aséngémnaː asin-ansíngém bika:langka.
Kiristokolo Yalolok Peyumbinam
3 Kajé ngolu Ruːnémélaː ngoluk Ruːtum Jisu Kiristoké Abumé aipai bilaiǃ Séːko ngolum tayéng dungkokídíːdo yalolok appíng peyum binamém Kiristokolo bitag. 4 Kapéné bík kanggaːlo angunna duːdopéːla lugépénamé kamaːdopé idopé moːpísém ruːma:dapé bí ngolum bíkkolo balentag.
Ayaːlo 5 Ruːnébí Jisu Kiristokokki ngolum bík omma:pé idopé émna poːpéloːbo ruːsékto-odokké sidé bík méːyumsunaméla méːnamé. 6 Kajé ngolu Ruːnémé bík unjígné aséːdok légaːpé luyitsulai, okodém bí bík méːbomsunam Aoːkolo ngolum arrém laːma:pé bitag. 7 Kapéné Jisuké iːdokki ngolum répíttak, édé ngoluk paːbém méːyinsubinammé. Ruːnéké aséːdé éddík bottédang, 8 bík appíng méːjo:loːla kinnamno,
okodém bí ngolum bisebiyéla bitagǃ 9 okkom Ru:nébí méːladungngan édém ibitag, odokké kinpíːmaːnam bík ipé-méːnamdém okodém Kiristokokki gerretpé émna méːséktag édém ngolum kinmoto. 10 Édé ipé-méːnamdém okodém Ruːnébí odok ayírardo gerredyé, tayéng-amoːtok duːnémna moːpísok duːnékídíːdém, Kiristokolo appíngém lékomoyé.
11 Appíng agerém Ruːnéké ipé-mé:namdémpéla bík ruːsékkampé gerdag; odokké Ruːnéké aíké légaːpé Kiristoké lédílo lékola bík taniːpé idopé bí ngolum balentag, okodém bí ruːlendokkébo méːségla léːtagai. 12 Ngolu séːkobulu Kiristokolo akasugotpoːla duːji, ngolukkolo Ruːnébí unjíkkaːlangkaǃ
13 Odokké édílo nolu nolum moturbinamdok tatpon lutaddok arodém tatton, nolusin Ruːnék taniːpé ikang. Nolu bím méngkésuto, odokké Ruːnébí bík pesula léːbinam Angunné Yalomé nolum binamki noluk tayéːlo bík muordém tubjedla ruːtumpé ikang. 14 Yalobí, édé séːkkoki Ruːnébí bík taniyém okkom pesula léːbitang édém paːyerung émna lusulaːnanédé, odokké odokki ngolu bím luyitsuyé.
Polké Kumnam
15 Odokké odok légaːpé, édílokké ngo Ruːtum Jisuké tayéːlo noluk méːtinsunamdém odokké appíng langunam tani légaːpé noluk aipé-méːnamdém tatpaːsuton, 16 Noluk légaːpé ngo Ruːnémé aipai bingasumang, ngo kumdom nolum méːpaːyartído. 17 Odokké ngoluk Ruːtum Jisu Kiristoké Ruːné, unjígné Abubí nolum bík yalodém bidopé kobidung, séːko nolum méːjoːmola nolum Ruːnémé léngkanbiyé, odo nolu bím kinyé. 18 Nolu bík píaːdém kaːpaːdopé noluk asiném mogebidopé ngo kumdung, odo nolu kinyé okodén édé akanamdé okodoːpé nolum goktang, bík taniyém bík pesubinamdé méngaksugédopé mirémgédopé binam ayangé, 19 odokké bík luyísulamaːnam kínggíné tornamdém ngolukképé bitag séːkobulu méngkésudang. Édé tornamdém odok torkamídémpé ngolukkolo agergerra dung 20 okodém bí Kiristomé sikolokké turmodokudodo odokké bím tayéng-amoːto bík lagbíkpé tedmododo léngkanto. 21 Kiristobí takam tayéng-migomkídíːdok, ilang-gílanékídíːdok, tornam kanékídíːdok odokké ruːtumkídíːdok tayéːlo Ruːtummé; séː moːpísok appíng aminnok tayéːpélang aːpéné ayírdok tayéːpé bík amindé bottéyaːné. 22 Ruːnébí Kiristoké alé kéígdo appíngém léːto odokké kumgodok appíːlok légaːpé bím Ruːtumpé tolíkto, 23 okodé bík adin-amíré, bík píːsíːnamdé séːko appíngém appíːloi píːsíːmodag.