Kiristokolo Turmokunam
2
Noluk agom-tadmaːnam légaːpélang paːb légaːpé lekkem nolu yalolo siladungngai. 2 Odo ayírdo nolu moːpísok aiman lambélo gímíndaggai; nolu do:mírtok ruːtum yalodok agomém-taddagai, suːpag édé yalodé séːkobulu Ruːnék agomém-tadmaːji bulum babodag. 3 Aropésin ngolu appíngé bulum gésudaggai odokké ngoluk adin-amírrok méːbonamno duːdungai, ngoluk adin-amíréla asiné oko okkom méːyumsudagan édém idagai. Noluk aíké séulo, appíngké pangkampé, Ruːnék aglíːdém paːpénammai.4 Émpigeːla Ruːnéké aséːdé airuːpé bojéla, odokké bík ayaːdé ngolukképé aipé bottébila, 5 édílo ngolu agom-tadmaːla yalolo sila dungngan Kiristok lédílo ngolum bí turmotoku. Édé Ruːnék aséːdokki nolu moturbinamém paːtag. 6 Kiristo Jisuké lédílo ngoluk lékonamdo bí ngolum bík lédílo tayéng-amoːto migom domíndopé turmotakku. 7 Aːpéné appíng ayírdok légaːpé bí ngolum Kiristo Jisukolo bík anguruːné bottén aséːdém ayaːdo ka:paːdopé bí sém léngkannaːdo. 8 Kapéné aséngki nolum méːjíglo moturbitag; sidé noluk aíkolokkémang, émpigeːla Ruːnéké binam amané. 9 Agerkimang, édémpila séːkosin pugdasulaːmang. 10 Ngolu séːkon édém Ruːnébí motag, ainé agerém gerdopé Kiristo Jisukolo ruːtag, oko agerdém gerdopé Ruːnébí lekeloːbo ngoluk légaːpé ménoːbitag.
Kiristokolo Lékkongé
11 Odok-légaːpé méːpaːlang nolum odannai Jiudiman taniːpé otagai odokké nolum "gatpugmaːnam" émna gogdagai séːkobulu aíém "gatpugnam taniyé" émsudaggai, (gatpugnamdém buluk adin-amírdok idagai). 12 Odo ayírdo nolum Kiristokolokké mopansutagai. Nolu bidekiːpé iladungngai odokké Ruːnék balennam taniːmangnngai. Luségdo nolu katémangngai, okodém Ruːnébí bík taniːkídíːdém pesubitag, odokké nolu séː moːpíso oko akangésin odokké Ruːnébí nolukkolo kamaːpé turadungngai. 13 Émpigeːla nolu séːkobulu lékonkém Kiristo Jisukolokké moːtéːpé dungngan suːpag nolum Kiristok iːdokki kéraːpé langatakku. 14 Kapéné bí aídéi ngolukképé ansíːdé, séːko ngolum Jiudiémna Jiudimaːném lékkomoto odokké bík adin-amírdo mirupé iladuːmoné édé mopansuné bareːdém démpakto. 15 Bí bík aíkolo opín baːnyidok anuné tani opínko ruːlenpé émna, bí Jiudilok luro lédílo odok lulígnamkídíːdémna ibomnamkídíːdém yogmoto, édémpé Jiudilogla Jiudiman tani pongkoglo bí lékomoto. 16 Kurusdo Kiristoké sibinamki bulum Ruːnékolo lékomotoku, odokké buluk mirupé iladuːnamdém laːpagbito. 17 Édémpila Jiudiman taniːkídínga nolu séːkobulu moːtéːpé dungngan odokké Jiudikídínga nolu séːkobulu kéraːpé dungngan Kiristobí gíla nolum asin-ansímoné tatpon lutaddém lugoːbika. 18 Kapéné bíkkoki ngoyi annyé Abukoloːpé Yalo akkodokki gíalaːdag.
19 Édémpila, nolu bidekiélang kinmaːnam taniːmaːbo; émpigeːla Ruːnék taniːlok lédílok taniyéla Ruːnék okum-éralok ommangébo.