Tatpon Lutaddok Kinpíːlaːmaːnamdém Léngkanbinam
3
Sidok légaːpé ngo Polbí, Jiudiman taniːkídínga noluk légaːpé ngo Kiristo Jisukképé makanaːlo tumna léːnamko.2 Noluk ainam légaːpé Ruːnébí bík aséːlo séː agersém ngom bitag édém nolu tatturuːpé. 3 Ruːnébí kinpíːmaːnam bík ipé-méːnamdém ngom léngkanbila édém kinmoto. Ngo édém andénggampé adlígbika 4 odokké ngo okkom attang édém nolu pomílo, Kiristoké tayéːlo kinpíːmap duːnamdém ngok kinnamdém nolu kinyé. 5 Poːpélo séː kinpíːmaːnamsém taniːyém lubimangai, émpigeːla Ruːnébí suːpag bík angunné mélígnamkídíːdémna lungor-lunékídíːdém bík Yalodokki léngkanbitag. 6 Édé kinpíːmaːnam agomdé sidéː séː tatpon lutatsokki Jiudiman-taniːkídíːdé Jiudikídíːdok lédílo Ruːnék ayangém paːmínyé; bulu lékkoné adin-amírdok légílaggíé, odokké Kiristo Jisukolo Ruːnék pesubinamdém paːmínné.
7 Ruːnéké agergerra duːné tornamki ngom binam aséng amandokki ngo séː tatpon lutatsok pagbopé ikang. 8 Ngo Ruːnék émmum-taniːkídíːdok appíngkémyang émmumpagyaːnédé, émgom Ruːnébí ngom Kiristokolo duːné sablasabamnaːmanam ompotidok tatpon lutaddém Jiudiman taniyém lugoːbidopé séː aséːsém bitag, 9 odokké Ruːnék ipé-méːnam kinpíːmaːnam agerdém appíng taniyé kindopé émna. Ruːné, séːkobí appíngém Ruːnédén, bík kinmomaːnam poːpéké dítag appíːdo séːkomsin kinmotomang. 10 Ru:nék méːnamdé sidé, suːpag kumgodokki Ruːnéké bangkí-bangkín méːjoːnamdém migomém, ilang-gílanékídíːdém tayéng-amoːto kinmoyé. 11 Ruːnébí bík duːyarpéné méːnamdok légaːpé ito, okodém bí ngoluk Ruːtum Kiristo Jisukokki iletto. 12 Bíkkoloːla bím méːjígnamki ngolu suːpag Ruːnék dungkodoːpé ang-pítala méːmokamaːpé gíalaːdag. 13 Édémpila ngo kumdanna ludung, noluk légaːpé ngok duːg donamsém nolu ajjikosin méːdíryok, kapilaːné séː nolukképé luyitsunamko.
Yalolo Kínggídopé Polké Kumbinam
14 Sidok légaːpé ngo Abukolo lébíːtumna kumdo, 15 séːkkolokkém tayéng-amoːtoːla moːpísok appíng okum-érangé buluk aro aminém paːdang. 16 Bík unjígné mité-mirémnamdokké bí nom bík Yaloki tornamno noluk arangké taniːdém kínggíːmokaːlangka émna ngo kumdo, 17 Kiristobí méːjígnamki noluk asinno dungkaːlangka. Odokké nolu ayaːlo léːpíré pargabla duːla édém kindopé émna ngo kumdo, 18 odo nolu Ruːnék tani appíːdok lédílo tornamé kala, Kiristoké ayaːdé éddíko araila pontadang, odokké éddíko oudla oːríːdang édém kinyé. 19 Arro édém édíloːsin kinbínna kinnamanggom, nolu bík ayaːdém kinyé odokké Ruːnékolok duːné sorit appíːdé nolukkolo píːsíyé.