Kiristoké Adin-Amírdo Lékonam
4
Édémpila ngo Ruːtumké légangé makanaːlo dung; odokké ngo nolum kumdanna ludung nolum okoloːpé goktuːji odo arré kala duːlang. 2 Loːdém ajjisula, kéíksula odokké oijosula duːlang. Akoné akoném oijosunamno noluk ayangém léngkannang. 3 Asin-ansínamki Yalolo lékola duːlaːdopé pagnam appíngém ilang. 4 Adin-amíré akkongko odokké Yallo akkongko, édémarpé akaːla duːnam akkongko okoloːpé Ruːnébí nolum goktag. 5 Ru:tummé akkongko, méːjígé akkongko, baptisé akkongko; 6 Ruːné akkongko, séːkobí appíngké Abbo, appíngké Ruːtumé, bí appíngkokki ager-gerdag odokké bí appíngkolo dung.7 Émpigeːla Kiristoké méːlígbikamdémpé ngolum appíngém ako akopé anguruːné amaném bitag. 8 Ruːnék-gomugdok lukampéː
"Édílo bí tayéːpé gísangkan,
bí bík lédílo tumna léːnamkídíːdém gísabokang;
odokké bí taniːyém amaném bito."
9 Bí tayéːtoːpé gísangka émnamdé okkon? Odok légíːdé bí moːpísok kéígarboːpé gítokpongka. 10 Édémpila séːko gítokkaːji, bíːíng édé taniːdé séːko tayéːtoːpélang tayéːtoksin tayéːyaːpé, moːpísok appíngém píːsímonam légaːpé gísangka. 11 Édé bíːai séːko akkem mélígnampé, akkem lungor-lunépé, akkem lugoːbinépé, akkem midumpé odokké akkem luyírnépé idopé amaném bitag. 12 Ruːnék appíng taniːyém bík agerém gerdopé bí sémbulum bitag, odo Kiristoké adin-amírdém okum kísapé aksaːbomyé. 13 Odokké édémpila ngolu appíngé ngoluk appíngké lékonam méːjígdoːla Ruːnék Aoːmé ngoluk méːjoːlo ngolu méːjubné taniːpé ila, Kiristokémpé iyé. 14 Odo ngolu ko:kapé iyarra duːmaːbo, siyadlo luːbomkosula, yadgon taniːlok luyírnamno ésarpé sarkupsarratkosula, séːkobulu akoném buluk aíké méːlennam luyírki méːmursunamnoːpé aːbodag. 15 Édémpimap, ayaːlo arodém lula, Kiristo, séːko ngoluk mittugdé, bíkkolo ngolu puːpojarbompé lagidag. 16 Bí adin-amír appíːdém kabodandopé koksetsumodag. Appíng légílaggídé bulu buluk aí aíké anguruːné agerém gersudag, odokké akondé akon légílaggídém aibomdopé idumsudag, édémpila adin-amír appíːdé aila puːpojarpola ayaːlo píːsídag.
Piaːlok Ommang Kísapé Duːlang
17 Édémpila ngo nolum, Ruːtumké aminno lupangko ludungː uiːkumnékídíːdémpé duːyaryobong, séːkobuluk méːnamsagnamkídíːdé arré kamang. 18 Bulu buluk asiném kémomoto odokké Ruːnék binam turnamdo bulu katémínmang, kapilaːné bulu kinnídanmang odokké buluk asiné tordag. 19 Anyingé émnamdé bulukkolo katomang. Bulu laːlíng-gílíngém méːdag odokké napínaréman appíngém ipé émna méːbodag.
20 Émpigeːla nolum édémpin luyírém Kiristok tayéːlo luyírbimangǃ 21 Bík doːyingém nolu aroruːpé tatkítag, odokké bíkkol gímínné kísapé nolum arodém luyírbitag okodé Jisukolo dun. 22 Édémpila noluk lekeké inam séukídíːdém mépaktobong, okodé nolum poːpéké noluk turkamdémpé turbodag odokké édé yadgola nolum momíkpakto. 23 Noluk asinémna méːlodém anuruːmokupénamé, 24 odokké nolu anu séuém galuk kísapé gélíksupénammé, okodém Ruːném gésudopé ruːtang odokké okodo arolok-duːnamélang angunammé dung.
25 Édémpila aromaːném lunamém mépaktok, nolu aí aíké kumrém arrom lulang, kapéné ngolu appíngé Kiristokolo adin-amír atérongko. 26 Aglíngé sanggom imurém iyok; nok aglíngém doːnyé oadoːpé duːbomyok. 27 Uiːyém gíanan lambém biyok. 28 Dopsongé dopsongasulang, odokké bík aíké alakki ainé agerko gerbomotok, odo bí opanném oːkaiko bidumsulaːyé. 29 Noluk nappa:dokké aiman agomé lenpé lagimang, émpigeːla agerrok aːné agomé lenpé lagidag, okodé amem puːpojarbodoji odokké laginammém bidumsudoji, odo noluk lunamdém tadnékídíːdokképé ainépé iyé. 30 Odokké Ruːnék Angunné Yalomé kabmoyok, séːkkoki nolum répídbikunam longédok légaːpé muor tubla léːtag. 31 Appíng tayumnamém, aglíng saːnamém, ammem jéːrídnamém, ammem aimap lunamém, odokké pamínsunamém nolu mépakpaːyé. 32 Émpigeːla akoné akoném asinang-olang odokké ayangkaːmínsulang, akoném méːyinsulang, kapé Ruːnébí Kiristokolo nolum méːyinsubitang.