Píaːlo Duːnam
5
Nolu Ruːnéké méːbomsunam ommangé, édémpila nolu bíkkémpé ilang. 2 Ayaːlo turbosulang, kapé Kiristobí ngolum ayaːla bík aíém namponé romnígnam kísapélang palígnam kísapé okodé Ruːnémé méːyumsumdagji bík aíké turnamdém ngoluk légaːpé bipaksuto.3 Nolu Ru:néké ommaːpé inamé, noluk araːlo laːmínsunam, naréman appíng agerém odokké kaːbonam édémbulum lulenpéi lagimang. 4 Yaːné-agom lunam, makkorném lumannam, odokké lumamanamé kapé lagimang, édémbulum nolu lujubmang. Édémpimap nolu Ruːnémé aipai bipénammé. 5 Kapéné nolu kindagéi, appíngé séːkobulu laːmínsudagji, narémaːji, odokké kaːbogoːdagji (kaːbonamdé moimang kumnamé), bulukké Kiristokélang Ruːnéké migomdokodo panggo kamang.
6 Makkorné agomki séːkosin nolum yatpélagimang; kapéné édémpin agom-tadmaːnékídíːdoːpé Ruːnék aglíngé aːdo. 7 Odok-légaːpé buluk lédílo okkomsin ijonsupénammé kamang. 8 Kapilaːné longéko nolu kémolo dungngai, émpigeːla su:pag nolu Ruːtumkolo píaːlo dung. Píaːlok ommang kísapé duːlang, 9 kapéné appíng ainamé, arolok-duːnamé odokké aronamdé píaːlok apíaːyé. 10 Okko Ruːtummé méːyumsumodang édém magablang. 11 Kémolok apíaːyé eːmaːné arékaman agerém gergoːyok, émpigeːla bulum píaːloːpé gíaːbolang. 12 Kapéné okkom agom-tadmaːnékídíːdé léːsila idang édémsin lupénamdém anyisukandag. 13 Émpigeːla édílo okkoméi píaːloːpé bomaːdoji, odo édém kaːpangamdag; 14 kapéné okkoméi kaːpaːdang édé píaːpé idag. Odok-légaːpé édém lutagː
"Yubngaksunékídínga kinsutobo,
sikolokké turtokuk,
odokké Kiristobí nolum píangém biyé."
15 Édémpila nolu kapé duːdoji édém ansulang. Kinsuman taniːkísapé duːyok, émpigeːla méːjoːn taniːkísapé duːlang. 16 Noluk paːnam ayírém ainé agerro líglang, kapilaːné longékídíːsé ainéma:bo. 17 Odok-légaːpé makkora duːyok, émpigeːla Ruːtumké méːnamdé okkon édém kinnang.
18 Apongém tíngursuyo, okodé nolum momíkpagyé; émpigeːla Yalolo píːsíla duːlang. 19 Akoné akoném niːtomno, kumnam niːtomno odokké yalolok niːtom-monamno luposulang. Noluk asinki niːtom mola méːpola Ruːtummé luyitsulang. 20 Ngoluk Ruːtum Jisu Kiristoké aminno, appíːlok légaːpé Ruːné Abumé loːdísém aipai bilang.
Yamnékídíːdéːlang Milbongkídíːdé
21 Kiristoké légaːpé akoné akoném pésola ajjisulang.
22 Yamnékídínga, Ru:tumkolo aíé ajjisukampé noluk milbongkídíːdo ajjisulang. 23 Kapéné milboːdé bík yamnédok tukkudé Kiristobí kapé kumgodok tukkon, odokké Kiristobí aídé bík adin-amírdok, bík kumgodok Moturbinédé. 24 Suːpag kumgodé kapé Kiristokolo ajjisudagji, édémíːpé yamnékídíːdé buluk milbongkídíːdo appíːlo ajjisupé lagidag.
25 Milbongkídínga, noluk yamnékídíːdém ayalang, kappar Kiristobí kumgodém aipé-méːla bík aíém kumgodok légaːpé bisuto. 26 Kumgodé angundopé, agomdokki írnam lédílo asiki narémotag. 27 Kumgodém bík aíké kanggaːdo unjígmopé odokké édé naréla tong-émdopé odokké nodjomanggom titsumnammé kamadopé émna bí narémotag. 28 Édémarpé milbongkídíːdé buluk aíké adin-amírém kapé moyegdoji édémíːpé buluk yamnékídíːdém ayaːpé lagidag. Taniːkoné séːko bík yamnédém ayaːdagji bí aíém aipé-méːsudag. 29 Séːkosin édíloːsin aíké adin-amírém tayummang, émpigeːla ainém domo-tíːmola bí édém kaːsíːdag, édémarpé Kiristobí kumgom kaːsíːdag, 30 kapilaːné ngolu bík adin-amírdok légílaggíngé. 31 "Odok-légaːpé taniːkoné bík ané-abbom mépagyé odokké bík yamnédok lédílo lékoyé, odokké bínyi annyidé amír akkongkopé iyé." 32 Sidé airuːpé bottén kinpíːmaːnam agomko, émpigeːla ngo Kiristokélang kumgolok tayéːlo ludung. 33 Kappéidaggom, nolu appíngé aíém aipé-méngkampé noluk yamném ayalang, odokké appíng yamné buluk milbongém ménggésaggépaːyé.