Ommangélang Ané-abu
6
Ommangkídínga, Ruːtumkolo noluk ané-abulok agomém-tadlang, kapilaːné édé kaboné ageré. 2 "Noluk ané-abbom ménggésulang" okodé pesubinamkolok lédílo lugotpoːla lunamko. 3 Nolu noluk ané-abbom ménggésumílo, "appíngé nolukkolo aibomna gíyé, odokké nolu moːpíso arai araipé turyé."4 Abukídínga, nolu noluk ommangém aglíːmoyok, émpigeːla Ruːtumké doːyíngém luyírbila moyinsula usalang.
Pagbokídíːdéːla Ruːtumkídíng
5 Pagbokídínga, noluk moːpísok ruːtumkídíːdém pésola jinna buluk agomém-tadlang; Kiristok agerém gerdung émna buluk agerém asinbila gerbilang. 6 Buluk ayang paːnam légangoːngé édílo buluk amikki kaːdon odo agom-tadnépé iyok, émpigeːla Kiristok pagbo kísapé, nolu asin arabokké Ruːnék méːnamdém ibilang. 7 Taniyém gerbimang, Ruːném gerbidung émna méːpodanna noluk agerém gerrang, 8 kapilaːné nolu kindagéi appíngé séːkoi ainé agerém gerdoji, bí pagbodaggom pagbomanggom Ruːtumbí bím amaném biyé émna.
9 Odokké ruːtumkídínga, noluk pagbokídíːdém édémíːpé aisulang odokké bulum morídyok. Méːpaːlang nokkélang nok pagbodok Ruːtumdé télé tayéːté dung, séːko appíngém séːkomsin kéyamaːpé kébangém baːdag.
Ruːnéké Binam Appíng Mimag Monané
10 Lutérso, Ruːtumkoloːla bík kínggíné tornamdo kínggílang. 11 Ruːnéké binam mimag monané appíːdém gélíksulang odo no uiːké aiman agerkídíːdok kekonpé dagrasulaːyé. 12 Kapéné ngoluk momínsula duːnamsé adinnogla íːlog kekonpémang, émpigeːla migomkídíːdok, ilang-gílangkaːnékídíːdok, séː kémoné moːpísok kínggínékídíːdok odokké tayéng-amoːtok aiman yalokídíːdok kekonpé momínsula dung. 13 Odok-légaːpé Ruːnéké binam mimag monané appíːdém gélíksulang, odo édílo aiman longékídíːdé aːyéji, odo nolu dagrasula duːlayépé, odokké appíngém morasunam lédupé nolu dagrasuyaryé.
14 Édémpila arodém ígído yeːréksula, arolok-duːnamdém angkéːdo gélíksulang, 15 odokké asin-ansíːné tatpon lutaddém lugoːbinam légaːpé juntém géla lennola duːlang. 16 Appíng ayírro méːtinsunamdok parasunanédém bomnang, okodokki nolu aimaːnédok dorné íːépug appíːdém momidlaːyé. 17 Moturbikunamdém kulong-tuːppi kísapé gélíksulang, odokké Yaloké yoksadém,okodé Ruːnéké gomugé édém bomnang. 18 Séː appíːsém kumnamno ibomnang, Ruːnébí kaːdumsubidopé kotok. Yaloké igurkampé appíng ayírro kumnang. Odok légaːpé larrang odokké édíloːsin larnamdém mépagyok; loːdém Ruːnék appíng taniːkídíːdok légaːpé kumbilang. 19 Ngok légaːpésin kumbilang, odo ngo édílo lupé émna iyeji odo Ruːnébí ngom agomko bidopé. Odokké édém ngo pésomaːpé lubila tatpon lutaddok kinpíːmaːnamdém kinmolaːyé. 20 Kapéné ngo makanaːlo dunggom, séː tatpon lutatsok ngo migom-baríkko. Ngo pésomaːpé séː tatpon lutatsém lubilaːdopé kumbilang.
Lutér Agom
21 Ngo kapé duːji odokké okkom ila duːji édé appíːdém nolu kindopé méːbomsunam odokké aroné bíro Taikikasbí nolum lubiye. 22 Sidogarké légaːpé ngo bím nolukkodoːpé mélígdung, odo nolu kinyé ngolu kapé ila duːji, odokké bí nolum agomki lusaːlígyépé.