Akoné Akoném Joːdumsulang
6
Ajonkídínga, séːkaimé imur iladuːdopé sogabmílo, nolu séːkobulu yalolo méːjubnén bím kéíksula kaboné lambédoːpé gíladbolangku. Émpigeːla nolu aíé totsulang, émmamílo nolumsin ankaːpéké. 2 Akoné akoném joːdumsulang, édémpé nolu Kiristok luroːdém ilet-gíledyé. 3 Séːkai akoné ngo pakkíné émna méːsumílo bí okkosinmang, bí aíémpag yatsudag. 4 Aíé aíké gerrodém ankaːsupé lagidag. Odo bí ammem luyisumap aíé bottép-lusulaːyé. 5 Kapéné aíé aíké joːpénamém joːsupaːyé.6 Séːkai agomno luyírnammém paːmílo bí appíng ainamém bím luyírnédok lédílo orsupé lagidag.
7 Yatkosuyok; séːkosin Ruːnémé yirkaːlaːmang. Okkom pidlígyéji édémíng taniːdé gatsíːyéku. 8 Kapéné séːko bík paːpkan asindok méːyumsunamém pidyéji, odok bí sinamém gadyeku; émpigeːla séːko yaloké méːyumsunamém pidyéji, yalodok turyarra turnamém gadyéku. 9 Ainé agerém gernamdo ngolu ngalatsupé lagimang, kapéné ngolu agerdém gerngasumap gertímílo, odok ayírrado ngolu gatsíːyéku. 10 Odok-légaːpé ngolu ainé ayírko paːdoso, takam taniːké légaːpé kajé ainék gerbilai, anguruːpé méngkésunékídíːdém kanggabgel gerboːyaːlai.
Polké Lutér Luyír
11 Kangkítok ngo éddík bottén abíkki ngok aíké alaksokki nolukkoloːpé adlígdun. 12 Édé aroman luyírnékídíːdé séːkobulu nolum bolbodapé gatpugmolíːdun bulu ruːyikédém léngkanna pugdasup méːsunékídíːdé. Kapila édémpé idang émmílo bulu Kiristok kurusdok légangé ipusirekosugemang émna. 13 Gatpugnékídíːdéːsin luroːdok lunamém tadmang, émgom bulu nolum gatpugmolíːdag, odo bulu noluk adin-amír tayéːdo pugdasulaːyé. 14 Jisu Kiristok kurusdok ruːyipé ngo édíloːsin pugdasupé lagimang, édé kurusdo moːpísé ngokképé sikabong, odokké ngoːsin moːpísok légaːpé. 15 Gatpugnamdéːla gatpugmaːnamdé okosinmang; okodém sabdang émmílo anupé ruːnamdémpag. 16 Séːkobulu séː lujíkkídíːsém ibomdagji, buluk tayéːlo asin-ansíngéla aséngé dungkaːlangka; odokké Israelké Ruːnék tayéːloːsin.a
17 Suːkkolokké séːkosin ngom duːgém biyobo, kapéné ngo ngok amírso Jisuk légaːpé bojérungko démjognammé paːtag.
18 Ajonkídínga, ngoluk Ruːtum Jisu Kiristoké aséːdé noluk appíngkolo dungkaːlangka. Amen.