Kiristobí Ngolum Mélennígbitag
5
Kapéné Kiristobí ngolum mélenníktakku; édémpila ngolu pagbomaːbo, odok-légaːpé dagrasula duːlang, odokké lékoda aíém pagbopé ikosuyok.2 Ngok agomém ménggablangǃ Ngo, Polbí, nolum ludung nolu aíém gatpukkosumílo, Kiristobí nolukképé agerkanépé imaːyé. 3 Ngo lékoda nolum lupaːdung séːkobí aíém gatpuksuyeji bí luroːdok adnam appíːdém ibomruːpaːdag. 4 Nolu séːko luroːdokki arolok-duːné émna léngkansupé méːsuduːji nolu Kiristokolokké angusukaːbo; nolu aséːlokké opagletkaːbo. 5 Kapéné méːjíksunamno Yalodokki, ngolu aíkídíːsé arolok-duːnamdok akaːla-duːnamdém tojunna toyaːladung. 6 Kapéné Kiristo Jisukolo gatpugnam odokké gatpugmaːnam séːkkésin arré kamang. Émpigeːla ayaːdokki méːjíksunamoːdé agergerdag.
7 Nolu airuːpé aipé dugdagai; séːko nolum arodém tadmaːdopé motumkan? 8 Ruːnébí séːko nolum gogladuːji, bí édém imang. 9 Kaːr ajjiːdéi pitang appíːdém mormolaːdag. 10 Émpigeːla suːpaksin ngo Ruːtumkolo noluk tayéːlo dakidanna lulaːdag nolu oːkaiko méːmaːyé. Séːko nolum méːmursumoduːji bí ajéngém bipaːyé, bí séːkoidaggom biparu:yé.
11 Ajonkídínga, ngo suːsin gatpugnamdém lugoːbidumílo, émpém kapila ngom suːsin ipusiredun? Édé aronamkaːmílo, ngok lugoːbinam Kiristoké kurusdé ngasodéi momayai. 12 Séːkobulu nolum ikisiyadla duːji bulu aíé appíːdém gatpaksutoka émna ngo méːdag.
13 Ngok ajonkídínga, nolum pagbopé idopé gogmang. Émpigeːla noluk ilaːnamdém imurém inayok; édémpimap ayaːlo akoné akonké agerém gerbilang. 14 Kapéné Luroːdok lulígnam appíːdém akkongkolo ileddagː "Nok aíkémpé nok kumrém ayaːlang."a 15 Émpigeːla nolu simínsirrompé akoné akoném réggabla régmíkaːmínsuduːmílo, odo totsulang, émmamílo nolu akoné akoném momígyé.
Yaloké Tornamno Duːlang
16 Édémpila ngo ludung, Yalodé nolum gígurkaːlangka. Odo nolu taniːlok méːbokaːbonamém méːyumsumopé ménggomaːyé. 17 Kapéné okkom tani:log asiné méːdagji édé Yalodok méːnamnok angudag, odokké Yalodé taniːlog asin kekonpé germolíːdag. Bulu akoné akoném momínsula duːdag, édémpila no okkom méːdoji édém no imang. 18 Émpigeːla Yalodokki nom gígéboduːmílo, no luroːdok pagbomang.
19 Su:pag adin-amírrok agerkídíːdém kaːbegdagː langgonam, napínarémaːnam, laːlínggonam,b 20 moimang-kumnam, morunam, kaːlímaːnam, geːmunsunam, némunsunam, aglíngsaːnam, aíoːngkém-méːsunam, dagríksunam, angunam, 21 nénam, tínguri, tíngursugeːla pamunsunam odokké édémí:pin ake paːpkídíng. Ngo lékoda lubidungku, poːpé ngo kapé lubikaːji, séːkoi édémbulumpé ila duːji bí Ruːnék migomdokodém paːmaːyé.
22 Émpigeːla Yaloké apíaːyédéː ayang, méːpo, asin-ansíng, oijosunam, asin-ainam, ainam, aronam, 23 ajjisunam, aíé-tejisunam. Sidogbuluk kekonpé luroːé kamangǃ 24 Odokké séːkobulu Kiristo Jisukén buluk laːlínggonamdémna méːbokaːbom adin-amírdok lédílo kurusdo pítkelíktag. 25 Yalodé ngolum turnamém bitag; bí ngoluk turnamsém kaːyikaːsaːrupésin lagidag. 26 Ngolu botténép-méːsupé lagimang odokké akoné akoném luagyok odokké akoné akoném némunsuyok.