4
Abudok ompotidém pangkonsupénédé édíloːpé koːka:la duːyéji, bí appíːdok ruːtumpé idaggom, bím pagbo kísapé sabgappoːdag. 2 Édílo bí ameːla duːdagji, bím kaːsíːpéné taniyé dung odokké bík ba:buké tolígnam ayírdé aːmaːdapé bík agerkídíːdém ibombidag. 3 Édémarpé, ngolu Jisu Kiristomé méngkésumaːdok poːpélo, ngolusin moːpísok ruːtum yalokídíːdok pagbopé iladungngai.a 4 Émpigeːla édílo ayírardé angkan, Ruːnébí bík Aoːmé mélíkto, séːkom mimékolo oto, luroːdok kéíglo bím otagai, 5 luro kéíglog duːné taniːkídíːdém mopídbidokupé, odo ngolu Ruːnéké ommaːpé ilaːyépé.6 Ngolu bík ommangé émna léngkannam légaːpé, Ruːnébí bík Aoːdok Yalodém ngoluk asin araːsoːpé mélíktag, oko yalodé "Abba, Abu" émna lubodag. 7 Édémpila no pagbokomaːbo, émpigeːla aoːkobo. Odokké no bík aoːpé inamé, Ruːnébí bík ommang légaːpé kanam appíngém nom biyé.
Galatia Taniːkídíːdok Légaːpé Polké Méːbinam
8 Lekkem édílo nolu Ruːném kinmangan, odo nolu moːpísok aroman ruːnékídíːdok pagbopé iladungngai. 9 Émpigeːla suːpag nolu Ruːnémé kindag, odokké ngo sémpé lupéi suːpag Ruːnébíːsin nolum kindag, kapila nolu siperenélang séː moːpísok agerkamaːné yalokídíːdoːpé lékoda gíladlangkula lékoda buluk pagbopé ilíːdungkun?
10 Nolu anguruːné longgém, poːlom, bírdugém odokké dítagém ibomdungǃ 11 Ngok gernam agerdé nolukkolo arrékamap ipéké émna, ngo noluk légaːpé pésobidungǃ
12 Ajonkídínga, ngo nolum kumdanna ludung, ngokkémpé ilang. Kapilaːné ngo nolukkémpé idag. Nolu ngom oːkai imurko imang. 13 Nolu kindag ngo molamaːnam légaːpé nolum tatpon lutaddém lugodbika.b 14 Ngok kinamdok légaːpé nolu ngom topaksuladaggaːsin, émgom nolu ngom méngkimérammaggom tayumtomang. Émpigeːla nolu ngom Ruːnék tayéng-yaːmekonémpé, odokké Kiristo Jisum aíém boríksukampé boríksuto. 15 Ngo aropé ludung nolu pagnamkaːmílo nolu noluk aíké amigém kurrensugeːla édémbulum ngom biyyai. Noluk appíngké méːpodé okko kapikan? 16 Nolum arodém lubila ngo suːpag noluk mirupéi ikan?
17 Édé aroman luyírnékídíːdé nolum anguruːpé angoːbomdag, émpigeːla buluk méːloddé ainémang. Nolu bulum jonsula duːyépé émna, bulu nolum ngokkolokké mopansupé méːdag. 18 Méːloddé aimílo, édé nolukképé kaboné agomé, ngo buluk lédílo duːdoːdémmang, émpigeːla loːdísém bulum édém imolang. 19 Ngok méːbomsunam ommangkídínga, lékoda, édíloːpé nolukkolo Kiristoké sorité kamaːyéji, odoloːpé kappar anékoné obo-aki kidoji édémarpé ngo noluk légaːpé kibiye. 20 Ngo noluk lédílo suːpag duːjonsupanamkaːmílo, ngo noluk lédílo agomsém angupé luposuyyai, noluk légaːpé ngo méngksuladungǃ
Agarméla Saramé Luyísunam
21 Nolu séːko luro kéíglo duːlíːdang ngom lukítei, luroːdé okko émna ludang édém ansumaːnei? 22 Kapéné sémpé adla léːtag Abraamké aoːannyiko dungngai, aːko pagnédokkai odokké akondé pagnémaːnédokkai.c 23 Pagnédokki onam bík aoːdém adin-amírro otagai, émpigeːla pagnémaːnédokki onam bík aoːdém Ruːnék pesubinamno otagai. 24 Sém luyisulabinampé sappayé, mimé annyidé lusék baːnyidé. Aːko Sinai Adiːdokké; ommangém pagbopé odung bí Agarbí. 25 Suːpag Agarbí Arobbo Sinai Adiːdé; bí suːpakké Jerusalemsém dakkansubidag; kapéné bí bík ommang lédílo pagbopé iladung. 26 Émpigeːla tayéngké Jerusalemdé pagnémang, odokké bí ngoluk anédé. 27 Kapéné édém adla léːtagː
"Banjiné miméno méːpotok,
séːko ommangém omaːji;
nolu séːkké obo aki kikimaːji
bottép méːpola jéːtokǃ
kapéné milbongkanédémpéyang méːpagnam mimédokké ommangé kayaːyé."d
28 Ajonkídínga, suːpag nolu, Isakkémpé pesubinamnok ommangé. 29 Odo ayírdo adin-amírrok onam aoːdé Ru:néké Yalolok onam aoːdém ipusireka; odokké suːpaksin édémíːpé iladung.e 30 Émpigeːla Ruːnék-gomugdé okko émdang? "Pagnédémnaː bík aoːdém ménpaktok, kapéné pagnédok aoːdé édíloːsin pagnémaːnédok aoːdok panggodém paːmínmaːyé."f 31 Odok-légaːpé, ajonkídínga, ngolu pagnédok ommaːmang, émpigeːla ngolu pagnémaːnédok ommangé.