Luroéi Méːtinsunaméi
3
Nolu makkorné Galatia taniːkídíngaǃ Séːko nolum muiton? Noluk amik kanggaːlo Jisu Kiristomé kurusdo pítkeka émna naréngoːpé léngkanbimangalangǃ 2 Ngo sémmong nolukkolok kinpé méːdungː Luroːdok luyírém ibomna nolu Yalodém paːtaga:nei, émmamílo nolum luyírbinamdém tadla édém méngkésula, paːton? 3 Nolu síddíkoi makkordangǃ Nolu Ru:néké Yalodokki isangka; suːpag nolu noluk aíké kinnamnoi ingappé méːdun? 4 Noluk donam duːg appíːdé émmumaːnei? Édé appíːdé aropésin émmumaːnei? 5 Nolu luroːdém ibomnam légaːpé Ruːnébí nolum bík Yalodémna bík méːpílaːmaːnam agerém nolum bitagnei, émmamílo nolu okkom tatton édém méngkésunamé bitang?6 Abraamé méngkaːbikítok, "Bí Ruːnémé méngkésuto odokké bím arolok-duːné taniːko émna sapto."a 7 Édémpila nolusin kinnang, séːkobulu méngkésuyéji bulu Abraamké aro ommangé. 8 Ruːnék-gomugdé lunoːla léːtag méːtinsunamki Jiudiman taniːyém Ruːnébí arolok-duːné émna sabyé, odokké ru:nék-gomugdé tatpon lutaddém Abraamé lunoːbikaː "Takam réngamé nokki ayangém paːyé."b 9 Abraambí méngkésula ayangém paːto; odok-légaːpé séːkobulu méngkésudang bulu appíngé Abraamkémpé ayangém paːdag.
10 Séːkobulu luro:lok ager tayéːlo méːtinsulduːji bulu penamkolok kéíglo dung. Kapéné Ruːnék-gomugdo adla léːtag, "Séːkobíi oko-okkom Luroːdo attang édémbulum loːdísém imaːji bí penamkolok kéíglo dung."c 11 Édémpila sém naréngo:pé kaːpaːdag, luroːdokki séːkomsin Ruːnék kanggaːlo arolok-duːné émna sabmang, kapilaːné ruːnék-gomugdé ludag, "Arolok-duːnébí méːtinsunamki turyé."d 12 Émpigeːla Luroːdé méːtinsunamdok lédílo oko agerésin kamang. Émgom, kapé ruːnék-gomugdé ludang, "Séːkobíi Luroːdok laginam appíːdém idagji bí turyé."e
13 Émpigeːla ngoluk légaːpé Kiristobí pelígnamkopé ibila luroːdok bombinam pelígnamdokké ngolum mopídbitag; kapéné ruːnék-gomugdé ludag, "Séːkoméi ísíng tayéngkolo raksaːdoji bí penam paːnéko."f 14 Abraammé binam peyuːdé Jiudiman taniːlo Kiristo Jisukokki aːyépé émna bí ngolum mopídbitag, édémpila méːtinsunamki ngolu Ruːnéké pesubila léːbinam Yalomé paːlaːyépé.
Musiːké Luro:déːla Pesubinamdé
15 Ajonkídínga, ngo taniːlok loːdíké ibomnamko luyisukípéː édílo ami annyiko lékola tarungkolok tayéːlo lusékko-ségmílo, édém séːkosin luyodlumadlaːma, odokké odo oːkaiko attémsinnaːmang. 16 Su:pag Ru:nébí bík pesubinamkídíːsém Abraaméla bík ommangém pesubitag. Ruːnék-gomugdé "Ommangkídíːdém " émna lumang, émpigeːla koːdém émtag, okodok légíːdé tani a:ko, édé Kiristobí.g 17 Ngo okkom ludun édé agomdé sidé Luro:dé Ruːnéké pesubinamdém angumolaːsinmang odokké katpaksinnamang okodém Ruːnébí luroːdém bimaːdag 430 dítak poːpéloːbo Abraammé pesubitag.h 18 Kapéné panggodém luroːdokki paːlaːmílo, édém pesunamnok tayeːlo paːyé émsulaːmang; émpigeːla Ruːnébí bík aséːlo édém Abraammé bitag.
19 Émpém luroːdok agerdé okkan? Ngolu paːbém idag émna léngkanbidopé édém bitagai. Émpigeːla Abraamké aoːdok gímangoːdapé séːko gíyépé émna pesubitungan odoloːpé luroːdé agergerra duːyé. Ruːnébí Musiːmé tayéng-yaːmeki luroːdém bitag, séːko Ruːnékélaː taniːkídíːdok pongkokédén. 20 Émpigeːla édílo agerdo tani atéroːdé aːdang odo pongkoké taniːko lagimang; odokké Ruːnébí atéroːngko.
Luroːdém Binam Légaːdé
21 Émpémílo luroːdé Ruːnék pesubinamdok kekonpéi agerém gerdang? Édíloːsin édémpé germangǃ Kapéné turnamém bilanan luroːko kanamkaːmílo, émpém arolok-duːnamdé aropésin luroːdokki gíiyai. 22 Émpigeːla Ruːnék-gomugdé ludag takam moːpísé paːblok kéíglo dung; édémpila Jisu Kiristom méːtinsunam tayéːlok pesubinam amandém bulum bitag séːkobulu méngkésudagji.
23 Émpigeːla édíloːpé ngolu méːtinsunamsém paːmangan odopé, Luroːdé ngolum appíngém makanaːlok léːnam kísapé etkabla léːtagai. 24 Méːtinsunamki ngolum arolok-duːné émna sabdopé luroːdé ngolum luyírra Kiristokodo:pé gígébola gítag. 25 Suːpag méːtinsunamdé gítagbo, édémpila ngolu luroːlok luyírnam kéíglo kamaːbo.
26 Nolu appíngé Kiristokolo méːtinsula Ruːnék ommangé, 27 kapéné nolu appíngé séːko Kiristokolo baptisém laːtuːji nolu aíé Kiristomé galuk kísapé gélíksutag. 28 Édémpila okkosin angumang Jiudi odokké Girik pongkogdo, pagbo odokké pagboman pongkogdo, milbong odokké néːng pongkogdo; nolu appíngé Kiristo Jisukolo atérongko. 29 Odokké nolu Kiristokémílo, nolu Abraamké ommangé, odokké Ruːnébí okkom pesubitagji édém nolu paːyé.