Polbí:la Mélígnam Akonkídíːdé
2
Yíːlaːpi dítak lédupé ngo ngok lédílo Taitasmé gíjonsula, Barnabaské lédílo Jerusalempé gílatkaku. 2 Ruːnébí ngom gípé lagiyé émna léngkanbito édémpila ngo gíka. Ngok poːpékélang suːpakké iladuːnam agersém arrékamaːnépé ngo imolíːmangai. Jiudiman taniːkídíːdém ngok lugoːbinam tatpon lutaddém ngo amikaːmaːpé gíkumsugeːla ménggésunam mirokídíːdém lusarbika. 3 Ngok gerjon Taitasbí Girik taniːdaggom, bím gatpukpé lagiyé émna bolbodatomang. 4 Jisu Kiristokolo ngoluk ilaːnamdém kinnam légaːpé ruːkkaːla kaːla ngolum buluk pagbopé imopé émna méngkésunné émna séumola duraːnékídíːdok légaːpé doːyíːsé lenkang. 5 Tatpon lutaddok arodé nolukkolo duːyardopé ngolu kontékosin bulukkolo ajjisutomang.6 Odokké séːkobulu mirokídíːdén- bulu séːkoidaggom ngokképé angunémang; Ruːnébí séːkomsin kéyaːmang-bulu ngok lugoːbinamdo okkomsin lusettomang.a 7 Odok kekonpé Pitormé kapé Jiudiém lugoːbidopé tolíktang, Ruːnébí ngom tatpon lutaddém Jiudiman taniyém lugoːbidopé tolíktag émna bulu kinto. 8 Kapéné Ruːnébí Pitorkolo mélígnam kísapé Jiudiːlo ager-gerka, édé Ruːní:bí Jiudiman taniːlo mélígnam kísapé ngokkolo ager-gerka. 9 Jems, Pitor odokké Jonbulu mirokídíːdé, Ruːnébí ngom aséngém bitag émna bulu kangkinto; édémpila bulu Barnabasmélaː ngom buluk ager-gerjon kísapé toríksuto. Bulu ngoyim Jiudiman taniːkídíːdém lugoːbiyardopé lusaːlíkto odokké bulu buluk agerém Jiudiːlo geryarto. 10 Bulu agomko luto ngolu opanném asinbo méːpaːpé lagidag, odokké édé agerrardém ngo asinbidanna ilídaggai.
Entiogdo Polbí Pitormé Ge:nam
11 Édílo Pitorbí Entiokpé gíkan, bím ngo amikanggaːpé luríksuto, kapilaːné bík inamdé lumurdaggai. 12 Kapéné Jemskolokké taniːékké gípíːmaːdapé bí Jiudiman taniːkídíːdém dojon-tíːjonsudagai. Émpigeːla édílo bulu gípíːton, bí bulukkolokké gíyodla bulum dojon-tíːjonsutokumang, kapilaːné gatpugnam opedém bí pésokang. 13 Bík séumonamdo Jiudi ékké imínténgkang, odokké buluk séumonamki Barnabasmésin gíyodbokang. 14 Bulu tatpon lutaddok arodok lédílo agerém ibommang émnamdém édílo ngo kaːton, buluk appíngké kanggaːlo ngo Pitormé luto, "No Jiudiːko, émgom no Jiudima:némpé iladung, no Jiudiémpé duːmadagma. Émpém édé kapiné agomén, no Jiudiman taniːkídíːdém bolbodapé Jiudiːlok ilot-gílodém imodun?
15 Aroruːpé, Jiudikídíːdok lukampé nolulang ngo odannai Jiudié, "Jiudiman tani:kídíːdé imurné" 16 émgom taniːkoné luroːdém ibomna duːnam légaːpé imur-kamang émna sabmang, émpigeːla Jisum méːtinsulapag sabdag. Édémpila ngolusin Kiristo Jisukolo méːtinsudung, luroːdém ibomnamkima émpigeːla méːtinsunamdokki ngolumsin imur-kamaːnép sabyépé, kapilaːné luroːdém ibomnamki séːkomsin imur-kamaːné émna sabmaːyé.b 17 Émpigeːla ngolu Kiristokokki Ruːnékolo imur-kamaːnépé sapkosupé méːdodém, ngolu aíém imurnép iladuːdop paːmílo, odo Kiristobí imurné agerém gernékoi? Édé aro agomaǃ 18 Ngo okkom momíkkan édém ngo moténkumílo, ngo luroːém ménggémaːnéko émna édé léngkandag. 19 Kapéné luroːdokki ngo luroːdokképé sikang, odo ngo Ruːnékolo turyékupé. 20 Kiristoké lédílo ngom kurusdo pítketagbo édémpila ngo turnémaːbo, émpigeːla Kiristobí ngokkolo turradung. Ngok adin-amírso okodé turraduːji, édé Ruːnék Aoːdém méːtinsula ngo turradung, séːko ngom aipé-méːla ngok légaːpé sibikang. 21 Ngo Ruːnék aséːdém arrékamaːnémpé lupagmang. Luroːdokki ngolum Ruːnékolo imur-kamaːnépé sabnamém paːnamkaːmílo, Kiristok sibinamdém émmumkangǃ