Galatia
Galatia Taniːkídíːdoːpé Polké Adnam Doːjíg
1
Séː doːjíksé Polkolokké séːkom mélígnampé goktang, odokké édé taniːlokkélang taniːlok mélígmang, émpigeːla Jisu Kiristokolokkéla Abu Ruːnékolokké, séːko Kiristomé sikolokkém turmotakku 2 odokké ngok lédílok duːmínné takam méngkésunélokké Galatia kumgoloːpé asin-aséngém séglígdung.3 Ngoluk Abu Ruːnékolokkéla Ruːtum Jisukolokké aséngéla asin-ansíngé nolukkolo dungkaːlangka,
4 séː aiman longékídíːsokké Kiristobí ngolum mopídbinam légaːpélang ngoluk paːb légaːpé bí aíém Ruːnék méngkampé bipaksuto. 5 Luyitsunamé loːdílongkípé Ruːnéké. Amen.
Tatpon Lutaddé Akkongko
6 Kiristobí séːko bík aséngki nolum goktag, bím nolu siddík lomna mépagla akon tatpon lutadloːpé noluk gínamsém ngo méngablaːmap idung. 7 Aroruːpé tatpon lutatkoda kamang. Émpigeːla taniːékké nolum yadmígdung odokké Kiristok tatpon lutaddokké nolum gíyodbopé méːdung. 8 Émpigeːla nolum ngoluk tatpon lutad lubinamdok ruːyipé ngolumanggom tayéng-yaːmekoné nolum lubigom, bí penamém paːyéǃ 9 Édém ngolu lubbéikabo, odokké ngo lékoda lubidungkuː Noluk toríksunam tatpon lutaddok ruːyipé séːkai nolum akon tatpon lutatkoda lugoːbimílo, bí penamém paːyéǃ
10 Ngo taniːlok tolígnamko madunei, Ruːnékolok tolígnamko madun? Ngo taniyémyé méːyumsumopé méːdun? Ngo taniyém méːyumsumopé méːduːmílo, ngo Kiristoké pagbokomang.a
Kapé Polbí Mélígnamkop Ikan
11 Ajonkídínga, ngok lugoːbinam tatpon lutaddé taniːlokké lennémang, ngo édém nolum kinmolíːdag. 12 Édém ngo taniːkolok paːmang; odokké séːkai ngom luyírsinbimang; émpigeːla, édém ngo Jisu Kiristok léngkanbinamno paːtag.
13 Ngo poːpé Jiudi yelamno duːdom, kapé ngo magramila Ruːnék kumgom ipusirela édém momíkpé émna ikan édém nolu tatkítuːpé.b 14 Ngok síːjon-ajonkídíːdémyang abayangko ngo Jiudi yelam agerro gíbadyaːdagai odokké ngoluk taːtobuluk ilot-gílotkídíːdém asin-bidanna ibomdungngai.c
15 Émpigeːla Ruːnébí séːko ngom omadoːboi bík agerém gerdopé languto odokké édílo bí ngom bík aséːlo gokton, 16 ngo bík aoːké tatpon lutaddém Jiudiman taniyém lugoːbidopé méːla bí bík Aoːmé ngom léngkanbinamdém méːyumsuto, ngo séːkkoloksin okkomsin tadyírsumang, 17 ngomyang poːpéloːbo mélígnampé iladuːnékídíːdémsin ríksukolo ngo Jerusalempé gímangai. Émpigeːla ngo bagémpé Arebiaːpé gíto odokké odok lédupé Demaskaspé gílatkaku. 18 Dítak aum lédupé ngo Pitormé kaːríksukolo Jerusalempé gíto, odokké bík lédílo yíːlaːngo longéko duːmínka. 19 Ruːtumké bíro Jemské ruːyipé ngo akon mélígnamkídíːdém kaːríksutomang.
20 Ngo nolukkoloːpé okkom adlígduːji édé arro, Ruːnébí arrom addung émnamdém kindag.
21 Odok lédupé ngo Siria odokké Silisia moːtag baːnyidoːpé gíto. 22 Odoloːpé Judiadok duːné Kiristom méngkésunékídíːdé ngom kinmangai. 23 Bulu tadlangoːdungngai, "Ngolum ipusirené taniːdé símsíro tatpon lutadém lugoːbila dung okodém lekkem bí momíkpé méngkíkaǃ" 24 Odokké ngok légaːpé bulu Ruːnémé luyitsuto.