Kiristoké Aropé Ajjisunamdém Kaːyisunam
2
Kiristobí nolum kínggímodung, odokké bík ayaːdé nolum luyinsudung. Nolu Yalolo kumbosuladung, édémpila akonké légaːpé nolukké ayaːpé-méːbinammélang asinang-onamé kadung. 2 Méːnamno lékola, akoné akoném lékoné ayangém léngkanna, yaloloːlang méːlodlo lékolang. Édémpépag nolu ngok méːpom píːsutsaːludmomaːyé. 3 Dígmunsuyok odokké pugdasuyok, émpigeːla ajjisulang odokké akoném nolu aíémyang aiyaːdag émna méːlang. 4 Nolu noluk aíongké légaːpé méːsuyok, amiké légaːpésin méːbilang. 5 Noluk méːnamdé Kiristok méːnamdém gésupé lagidag.6 Kiristobí arorupé Ruːnébí,
émpigeːla bí Ruːnéké lédílo bolbodapé lékola duːyarpé méːtomang.
7 Émpigeːla bí appíngém
mépagla pagbopé ibikang.
Bím taniːpé ola
taniːlok soritém bíkkolo kaːbekto.
8 Kiristobí ajjisula bí Ruːnék agomém-tadla
kurus tayéːdo sibikang.
9 Odok-légaːpé Ruːnébí bím tayéngaryaːto duːmoto
odokké bím appíngkémyang tayeyaːné aminém bito.
10 Édémpila Jisuké amindo tayéng-amoːto, moːpíso
odokké moːpísok kéígbok duːné,
appíngé lébíːtungaruːpaːyé.
11 Odokké Ruːné Abuké unjígdo,
Kiristobí Ruːtumdé émna appíngké nappangki ludesuyé.
Moːpíso Takar Kísapé Unnang
12 Ngok méːbomsunam ajonkídínga, ngo noluk lédílo duːdagdo, nolu loːdém ngok agomém-taddagai. Odok-légaːpé, ngo suːpag noluk lédílo kamanammé, nolu ngok agomém tadyaːngoːpénamé. Édémpila pésola jinna nolum moturbikunamdém gerrennang. 13 Kapilaːné Ruːnébí nolukkolo agergerra dung, nolum agerém gerrídopé méːmodung odokké okko bím méːyumsumodang édém gerdopé tornamém bidung.
14 Binbinaimaːpéla lukerkaːmínsumaːpé appíng agerém gerrang. 15 Odo nolu lugéːpénam kamaːnépélang narénépé ila, pakíríbnéla aimaːné taniːope araːlo imur-kamaːné Ruːnék ommaːpé iyépé. Nolu moːpíso takarémpé buluk araːlo unbipa:ye, 16 édílo nolu bulum turnamdok doːyídém lubidoji. Odo Kiristoké gíladdoku longédo ngo noluk tayéːlo bottépé lusulaːyé. Kapilaːné ngok ager gernamdé émmumpé itomang émna édé léngkabinyé.
17 Ruːtumkolo noluk méːjíksunamdéːla noluk agergernamdé bím palígla binam kísadag. Odokké ngok aíké iːyém édé palígnamdok lédílo pílenníkpaːbiyépé. Odokké édémpé ipénampé igom ngo noluk appíngké lédílo méːyumsula méːpomínyé. 18 Édémpila nolusin ngok lédílo méːyumsula méːpomínpaːyé.
Timotibíːlang Epaporditasbí
19 Timotimé nolukkodoːpé lomdanna mélíggorrabipé émna Ruːtum Jisukolo ngo akala dung, odokké édílo ngo noluk doːyíngém tatpaːsuyeji ngok asiné méːpoyé. 20 Ngokké Timotikémpin séːkai akonkoda kamang, séːko nolum asinang-odanna noluk laginammém kaːsíːmosíbiyé. 21 Kapéné appíngé aí aíké légangoːpé méːsudag, émpigeːla Jisu Kiristoké légaːpé okkomsin méːbimang. 22 Émpigeːla nolu kindag Timotibí kapin taniːkon. Aoːo abulok lédílo kapé agerém gerdoji bí ngok lédílo tatpon lutaddém lugoːbinam agerém édémpé gertag. 23 Odok-légaːpé ngokkolo okko kapiyeji, édém kinboːmílo, bím nolukkodoːpé mélíggorpé émna ngo akaːsula dung. 24 Odokké Ruːtumbí ngom lomdanna nolukkodoːpé gímoyé émna ngo Ruːtummé méːtinsula dung.
25 Ngok bíro, ngok agergejon odokké ngok mimag-mojon, Epaporditas, séːkobí ngom kaːsíːdopéla kaːdumsudopé nolu mélíktang, bím nolukkoloːpé méladlíkupé lagiyé émna ngo méːdung. 26 Bí nolum appíngém airuːpé kaːlí:langkula dung odokké bí airuːpé méːdírra dungngai, kapilaːné bí kiladungngai émna nolu tatto. 27 Aropésinéi bí airu:pé taːnka odokké sidagéiaːbo. Émpigeːla Ruːnébí bím ayaːto, bímmomang ngomsin ayaːtéːto, ngo méːdír tayéːlo méːdírmaːdopé Ruːnébí ngom ayaːto. 28 Odok-légaːpé ngo bím mélíggorríla dungku, édílo nolu bím kaːpa:suyékuji odo nolu lékoda méːpoyéku, odokké ngok méːdíré yogyé. 29 Ruːtumkolo kínggípé méːpola bím boríksulangku, odokké bíkkémpin taniːyém ménggésulang. 30 Kiristok agergerbikolo bí sidagéiaːbo, odokké nolu okkom ngom ibilaːtomang édém bí ngom ibinam légaːpé aíké sinam-turnamém méːsoitomang.