Pilipia
Pilipi Tani:kídíːdoːpé Polké Doːjík
1
Séː doːjíksé Kiristo Jisuké pagbo Polkolokkélang Timotikolokké.Pilipiːdok duːné Ruːnéké tani appíːdoːpé séːkobulu Kiristo Jisukén, odokké kumgodok miroélang idumsunékídíːdoːpé attag.
2 Ngoluk Abu Ruːnékolokkéla Ruːtum Jisu Kiristokolokké aséngélang asin-ansíngé nolukkolo dungkaːlangka.
Pilipi Kumgodok Légaːpé Polké Kumbinam
3 Nolum méːpaːdo ayír appíːdo ngo ngok Ruːnémé noluk légaːpé aipai bido; 4 odokké noluk appíngké légaːpé ngo loːdém méːpola kumbido 5 kapilaːné nolu ngom tatpon lutad lugoːbinam agerdo geraːdo longédokkébo siloloːpé kaːdumsula dung. 6 Odokké Ruːnébí nolukkolo ainé agerém gerroptag, odokké Jisu Kiristoké gíladdoku longédo édém gerredyé odokké gerredmaːdodopé bí gertiyé,ngo édém aroruːpé kindag. 7 Noluk appíngké légaːpé ngok séː méːbinamsé kabodag; kapilaːné nolu ngok asinso dung; ngo makanaːlo dunggom, lurasunam agomém luggom odokké tatpon lutaddém lukanbigom, nolu appíngé Ruːnék aséngém ngok lédílo paːjonsunné. 8 Kiristo Jisuké ayaːdo ngo nolum éddíko asinang-ola ka:líːla duːji, édém Ru:nébí lukanbilaːdag.
9 Odokké noluk ayaːdé méːjoːnamnoːla kinnamno bojé bojéla gíkaːlangka, édé noluk légaːpé ngok kumnamé, 10 odo okkardé aiyaːdang édém nolu balenkinye. Odokké édémpé Kiristok gílatkunam Longédok légaːpé arola lugépénamé kamaːpé duːyé. 11 Odokké arolok-duːnamdokki píːsíːla duːlang okodé Ruːnémé unjígmodopélang luyitsunadopé Jisu Kiristokolokké gílendang.
Tatpon Lutaddém Makanaːdo Lugoːbinam
12 Odokké ajonkídínga, okko ngokkolo kapikaːji, tatpon lutaddém kinmonam légaːpé édé aropé ikang, édém ngo nolum kinmolíːdung. 13 Kapéné rajbobondém kangabné appíːdéːlang odok duːnékídíːdé ngo Kiristok pagbopé inam légangé makanaːso dung émnamdém kinto. 14 Ngok makanaːdok duːnam légaːpé, bojérungko méngkésunné Ruːtumkolo kínggíyap méːtinsula angé-pítala pésomaːpé Ruːnék agomém lugo:ngobiyaːto.
15 Édésin arro, akke dígnamnoːla pamínsunamno Kiristomé lugoːbidung, émpigeːla akke ainé asiné kala lugoːbidung. 16 Bulu ngom aipé-méːla édém lugoːbidag, kapilaːné Ruːnébí ngom tatpon lutaddém lurasubiyé émna tolígnamdém bulu kindag. 17 Poːpékídíːdé aroné asiné géla lugoːbimang; émpigeːla aíké aki légaːpé lugoːbidag, ngo makanaːdo duːdodo ngom ngalatsumopé émna bulu méːdag.
18 Émpigeːla édé oko agomésin kamang. Laginam agomdé sidé, okkoidaggom, aroné asiné kagom aroman asiné kagom, Kiristomé lugoːbidung. Odokké odok légaːpé ngo méːpodag. Ngo aroruːpé méːpotíla duːyé, 19 kapilaːné noluk kumbinamkilang Jisu Kiristoké Yaloké idumsubinamki ngom makanaːsokké mélenníyeku. 20 Ngo kinsula akaːsula dung ngo édíloːsin anyisukanné agerém germaːyé. Ngo turgom ngo sigom, ngo suːpakké ang-pítanamsémpé loːdém kínggíːla duːlíːdag odokké Kiristomé luyitsumolíːdag. 21 Ngo turraduːmílo édé Kiristoké, odokké ngo simílo, édé ngokképé aiyyanammé. 22 Ngo turyarmílo ngo bojéko arékané agerém geryaːyé. Émgom okodém ngo bayen? Édém ngo kinmangǃ 23 Ngo séː baːnyisok pongkogdo pannadungː Ngo sokké gílenna Kiristok lédílo duːjonsulíːdag, kapilaːné édé ngokképé aipé aiyyadag. 24 Émpigeːla ngok turra duːnamdé nolukképé lagiyaːnamko. 25 Édém kinsugela, ngo kinkang ngo duːyarpoyé. Nolum puːpojarpomonam légaːpélang noluk méːtinsunamdo méːpomonam légaːpé ngo noluk lédílo duːmínpoːyé. 26 Édémpila édílo ngo lékoda nolum gíkala kaːyekuji, odo ngokkoki Kiristo Jisukolo nolukké bottép lusunam ainé lambéko kayé.
27 Odok-tayépé, amme Kiristok tatpon lutaddém ménggésudopé nolu duːladaglang. Odo ngo nolukkodoːpé gídaggom gímanggom, nolu appíngé lékola dung émnamdém ngo tatpaːsuyé. Odokké nolu lékkopé tatpon lutaddém akoné kintoka émna kínggípé ngalatsula duːnamdém ngo kinyé. 28 Noluk mirukídíːdém pésoyok, loːdém kínggíla duːlang. Kínggínamdé bulum momígyé émna bulukképé kanggotko, nolu bulum motabyé, kapilaːné motabnamdém nolum binédé Ruːnébí. 29 Kapéné Kiristom méngkoːsuddopémang, émpigeːla Kiristok légaːpé duːgémsin dodopé, nolum bík légaːpé aséngém bitag. 30 Ngo kapin duːgém dotagji édém nolu kaːtag odokké kapin duːgém dola duːji édém nolu tadla dung odokké édémíːpin duːgém nolusin doladung.a