Polké Kangordéːla Bík Adindok Tangdé
12
Okkomsin paːmanggom, ngo ngok aíké légaːpé luyartíyé. Suːpag ngo Ruːtumké kangorkídíːdémnaː léngkanamkídíːdém lubipé. 2 Ngo Jisukolo taniːko kindag séːkom yíːlaːpi dítag poːpé baumné tayéng-amoːtoːpé gísaːbokang, adin-amírroisong adin-amír kamapéisong édém ngo kinmang, Ruːnébí kindag. 3 Ngo kinto édé taniːdém témoːtoːpé busatto émna. Adin-amírroisong adin-amír kamapéisong édém ngo kinmang, Ruːnébí kindag. 4 Bík tadbeksunamkídíːdém agompé lubilangkuma odokké taniːyé édém lupaːsinkumang. 5 Édé taniːdokképé ila ngo pugdasuyé, émpigeːla ngok siperenamdok ruːyipé, ngo ngok aíké tayéːlo pugdasumaːyé. 6 Ngo pugdasulínggom, ngo makkornépé imaːyé, kapéné ngo arodém luyé. Émpigeːla odokké ngo moːtéːpé duːyé, odo séːkosin ngom bottéyaːné émna méːmaːyé; émpigeːla ngom kapé kaːpaːduːji odokké kapé ngom tatpaːduji édémíːpé méːmolang.7 Ngok bojéko méːpílaːmaːnam agerém kaːpaːnamdokki ngo pugdasupéké émna ngok adinso tangko bila léːtag, okodé Uiːké baríkko ngom kimotíla duːdag odokké pugdasukodokké ngom moːté:pé médag. 8 Sém laːpagbidopé ngo Ruːtumkoloːpé léumko kumka. 9 Émpigeːla bí ngom luto, "Ngok aséːdéi nokképé píːdag, kapéné édílo no siperedoji odo ngok tornamdé kínggíːyadag." Édémpila ngok siperenamdo ngo airuːpé méːpodung, odo Kiristoké tornamdé ngokkolo duːyé. 10 Odok-légaːpé, siperenamdo, anyisumonamdo, ipusiredo, ngasoddo, ngo méːpodo. Kapéné édílo ngo siperedon, odo ngo kínggíːdag.
Korin Taniːkídíːdok Légaːpé Polké Méːbinam
11 Ngo makkornépé ika, édém nolupag ngom imoto, kapéné nolu ngom luyítsupénammai. Ngo okkosinmanggom édé aiyapagné mélígnamkídíːdém kapésinéi ajjiːyaːnémang. 12 Aro-aron mélígnamdok kanggodém airuːpé oijosula noluk araːlo léngkanka, édébulu kanggodai, méːpílaːmaːnam agerrai, odokké kínggíːkínggín agerai. 13 Nolu kapé akon kumgokídíːdémyang ajjiːyangkan, odok ruːyípé, ngo édíloːsin nolum ngasodém bimangai? Séː imursok légaːpé ngom méːyinsubilangǃ
14 Suːkkésém luté:la séː léumnannébo ngo nolum kangkolo gíyé, odokké ngo nolukkolok okkomsin komayé, kapilaːné ngo noluk kanamdém lagimang nolumpag lagidag. Kapéné ommangé ané-abu légaːpé mékumsubimang, ané-abbopag ommang légaːpé mékumsubidag. 15 Édémpila ngo noluk légaːpé méːpodanna ngok kanam appíːdokki rébipé méːdung, ngo aíésin kopaksubiyé. Ngo nolum airuːpé aipé-ménggom, nolu ngom aipé-méːyélang?
16 Nolukkolok akke ludag ngo nolum ngasodmomangai. Émgom akedé suːsin méːdag ngo airuːpé pokírra nolum solki sogaptag émna. 17 Nolukkoloːpé mélígnam taniːkídíːdok araːdok séːkai akoné nolum yatkanei? 18 Ngo Taitasmé nolukkodoːpé gídopé mélíkka odokké ngo bík lédílo ngoluk bíroko métélíkka. Taitasbí nolum yatkanei? Kapéné ngolukkolo lékkoné yalodé dung odokké akonké lékorkorkodo kormíndo, lékkon agerém agerdo.
19 Ngolu aíém lurasupé émna nolum ludung émna nolu méːduːpé? Ruːnéké kanggaːlo ngolu Kiristokolo duːla sémbulum ludung, odokké ajonkídínga ngolu okkoméi igom édém nolum kínggímonam légangépag ido. 20 Ngo pésodung ngo odo:pé gídodo ngo nolum ngok méngkamdémpé paːmalaːdo, odokké noluk méngkamdémpé ngom paːmalaːdo. Sék kindang, odo pamínsunamé, dígnamé, aglíngé, aíongkém-méːsunamé, yadgonamé, lugégénamé, bottép-méːsunamé, urmurnamé noluk araːlo duːlaːdo. 21 Ngo lékoda gídodo ngok Ruːnébí ngom ajjiːsumolaːdo émna ngo pésodung, odokké séːkobulu paːbém poːpélo ikaji odokké séːkobulu aimaːnélokké, langgonamnokké méngkutsukumaji buluk légaːpé asin-kila kappayé.