Polbíːla Aroman Mélígnamkídíng
11
Ngo mé:dung nolu ajjiko ngok makkornamsém oijosubiyé émna, ayaːla ngom oijotéipén. 2 Ruːnék dígbinamdémpé ngo noluk légaːpé dígbido. Nolu naréné mímbírkonémpé idag séːkom ngo taniːkoném midapé bipé émna pesubitang, édé taniːdé Kiristobí. 3 Noluk asiném Kiristom asin-olígdanna kumnamdokké gíyodbopéké émna ngo pésodung, kapé Ibmé pokírné tabíːdé yatton.a 4 Séːkai gíla nolum ngoluk lubinam Jisumé lubimaːpé anguné Jisuko lubigom, odokké nolu ngolukkolok paːnam yalomélang tatpon lutaddokké anguné yalokolang tatpon lutatko paːdaggom, nolu méːpola duːdag.5 Ngo bulumyang "édé aiyapagné mélígnamkídíːdém" ajjiyaːnéko émna méːsumang. 6 Kígobínépé ngokké kíyírsunamé kamang, émgom ngo méːjoːngé kaman taniːkomang. Ngolu sémbulum nolum kindopé émna ngoluk pagnamno naréngoːpé léngkanbika.
7 Ngo édílo Ruːnéké tatpon lutaddém nolum lubikaːji odo ngo arrém laːmangai; nolum bottéyaːné taniːpé imopé émna ngo aíé ajjisuka. Ngok ajjisunamdé imurka:nei? 8 Buluk binam amandém toríksula, ngo akon kumgom rodbinampé ikang, kapéné odokki ngo nolukkodo ager-gerrato.b 9 Odokké édílo ngo noluk lédílo dungngan odok ngok píːramdodo, ngo séːkomsin ngasodmomangai, kapéné Mesodoniaːdokké gíné bírokídíːdé ngok laginammém kaːbika. Ngo nolum séːkomsin édíloːsin ngasodmomangai, odokké édíloːsin ngasdomomaːyé. 10 Kiristoké arodé ngokkolo duːnamé, ngok séː pugdasunamsok tayéːlo Akaya mongkédo séːkosin ngom lutumnamaːyé. 11 Odokké kapila? Kapilaːné ngo nolum aipé-méːmalai? Ngo nolum aipé-méːdag édém Ruːnébí kindagǃ
12 Ngok suːpakké iladuːnam agersém ngo iyartíyé. Odo aiyapagné "édé mélígnamkídíːdé" édé lékoné agerdok tayéːlo ngolu okkom idun pugdasulaːmaːyé. 13 Kapéné bulu aroman mélígnammé, bulu yadgon taniyé, bulu Kiristok mélígnammé émna séumogodag. 14 Édé méngaksupénam agommang, kapéné Uiːbí aídéi píaːlok baríkko émna séumogodag. 15 Édémpila édé anu doːyíːmang, bík agergerné arolok-duːné agergerné émna séuommomílo. Léddarpé buluk agerdé buluk paːpénammém paːmoyé.
Mélígnam Kísapé Polké Duːgdonam
16 Ngo lékoda ludungku, séːkosin ngom makkordag émna méːyok. Émpigeːla nolu méːmílo, nolu makkorné kísapé ngom toríksulang, édémpimílo ngo ajjiːko pugdouːsupé. 17 Suːpakké séː ngok sémpé lusunamsé Ruːtumké ilang-gílangki ngo lumang; sémpé pugdapé lunamso ngo aropé makkorné kísapé ludung. 18 Kapéné bojérungkoné moːpísok taniːkísapé pugdasudung, ngoːsin édémíːpé idung. 19 Nolu méːjoːné émna méːsudag, émpigeːla makkornékídíːdém méːpodanna oijosuladuːdag. 20 Séːkai nolum pagbopé imogom, nolum yadgom, nolukkolok solsugom, nolum bottépé lusugom, nolum migmodok pigom, nolu oijosuladuːdag. 21 Ngolu odok tayéːlo airuːpé rémagdag, ngo anyisudanna édém lusuduːbong.
Édílo taniyé agom-agomno pugdasudang, ngo makkorra lugom, émpém ngoːsin pugdasuyé.
22 Bulu Ibri taniːyéi? Ngoːsin Ibri taniyé. Bulu Israel taniːyéi? Ngoːsin Israel taniyé. Bulu Abraamké ommangéi? Ngoːsin Abraamké ommangé. 23 Bulu Kiristoké agergernei? Ngo simadnémpé ludung, émgom ngo bulumyang aiyaːné pagbokoǃ Ngo bulumyang asin-bila geryaːtag, makanaːlo bojéko tumkosutag, bojéko díngkosuyaːtag, sinamém bojéko gípaːsutag.c 24 Lémngoko Jiudilok alaglo yingumnaːnangko sabukki démoksutag. 25 Léumko yogírki díːtag, léko ílíngki gétag, léumko ollungé béntag, gaːnélo moːromotiːpé longgékolang yuméko dungkítag. 26 Ngok gíddom, gaːnélo pésonammé, rodgonélo pésonammé, ngok taniːkídíːdok alaglo pésonammé, Jiudiman taniːkídíːdok alaglo pésonammé, nogorro pésonammé, doːluːlo pésonammé, puːmilo pésonammé; odokké aroman bírrangkídíːdok alaglo pésonammé.d 27 Ngo airupé ngalatsula gertag, bojéko yummém yumapé, kénongélaː tíːlíngé, bojékopé apin domapé dungkítag; galuggasoré píːnamkopé kamap síkírra dungkítag. 28 Odok tayéːpésin, loːdísém kumgokídíːdok légaːpé méːnamdé ngom ngapinsumodaggai. 29 Édílo séːkai siperemílo, odo ngoːsin siperedopé méːsudag; édílo séːkaimé paːbloːpé gíbutsumodang, méːdírro ngo biːpogdag.
30 Ngo pugdasupé lagidagmílo, ngom siperedopé léngkanékídíːdo ngo pugdasupé. 31 Ruːnébíːla Ruːtum Jisuké Abubí, séːkom loːdílongkípé luyitsupénammén, ngo arrom ludung émna bí kindag. 32 Édílo ngo Damaskasdo dungngan, Migom Aretaské kéíglok amoːruːtumdé ngom sogappé émna Damaskas nogordém duːrimoka.e 33 Émpigeːla ngom gempakolo poka-baredém kuryaːla ledyilíkka, odo ngo bík alaglokké dukpítsuto.