Polbí Bík Agerdém Lurasunam
10
Ngo, Polbí, Kiristoké ajjisunamnoːla ayaːlo nolum kumdanna ludung, séːkom nolu noluk lédílo duːdom siperela ajjiːsudag émna méːdang, émpigeːla édílo nolukkolokké moːtéːpé duːdoji odo tordag. 2 Ngo nolum kumdanna ludung ngo édílo gíyéji odo ngom tormoyok; kapéné ngo kinsudag séːkobulu ludang ngolu moːpísok taniːémpé duːdag émna, ngo bulum torpé kaːríksuyé. 3 Ngolu séː moːpíso dunggom, ngolu moːpísok taniː kísapé séumomang. 4 Ngoluk abna-pananékídíːdé moːpísok abna-pananémang. Émpigeːla Ruːnék abna-pananéki mirulok kínggíːné dungkom momígnado. Ngolu aroman lukerkaːmínsom momígdo; 5 Ruːnék kinnamdok kekonpé dagrobné pugdasuné appíngém ngolu butabamdo. Buluk magyodné méːlodém ngolu sogabla Kiristoké agomém-tadmodo. 6 Nolum tadbíndanna agom-tadnépé paːnam lédupé, ngolu agom-tadmaːpé duːnékídíːdém mokemoramyé.7 Noluk kanggaːpé okko duːji édém kaːlang. Séːkai ngo Kiristokolo dung émna dakidanna lusumílo, bí aíém méːpangkupé lagidag bí kappar Kiristokéji, bíggíngkémpé ngolusin Kiristoké. 8 Ruːtumké ngolum binam ilang-gílaːdo ngo kínggípé pugdasupé. Kapilaːné ngoluk ilaːnamdé ngolum aiyaːmodag, nolum momígmaːoumpé. Édémpila ngo ngok ilang-gílaːsém anyisumaːyé. 9 Ngok doːjíkkídíːsokki ngo nolum lulommang. 10 Kapéné akedé ludag, "Bík doːjíkkídíːdé idgeːla kínggíːdag, émpigeːla bí duːmíndoém siperedag, odokké bík lunamkídíːdé arré kamang. 11 Édémpin taniːkídíːdé kinpé lagidag ngoluk kamaːdodo okko émna ngolu doːjígdo attagji, odokké noluk lédílo duːdodo angumang agerro édémarpé tordag.
12 Séːkobulu aíém botténé émna méːsudagji buluk lédílo saptéːla luyisuténan aːngé ngolukké kamang. Bulu éddík makkornénǃ Bulu buluk arangíːdo akoné akoném sabmínsula luyisinsudag. 13 Émpigeːla ngolukké okko kamaji odok tayéːlo ngolu pugdasumang, Ruːnébí ngolum binam aríg arangoːdok agerdo ngolu pugdasuyé, édé arígdo nolusin aːtédag. 14 Édílo ngolu noluk tayéːlo ilang-gílangém lusudoji odo ngolu nolukkodoːpé édíloːsin gíkímaːnémpé édé rísukídíːdém ngolu gíbadmang. Kapéné Kiristoké tatpon lutaddém nolum lugodbipoːnédé ngollai. 15 Ngolu séːkaiké inam ager tayéːdo pugdasumang odokké ngolu itag émnaːsin lusumang. Édémpimap, ngolu akala dung, noluk méːtinsunamdém kínggíbomna gídopé, odo noluk araːlo ngoluk gernam agerdé rísulo duːmaːpé gíbadbomyé.a 16 Odo ngolu nolukkodokké gíbadla moːtéːlo tatpon lutaddém lugoːbilaːyé. Kapéné ngolu amiké aríglok inam ager tayéːlo pugdasulíːmang.