Opanné Méːtinsunékídíːdém Bidumsunam
9
Ruːnék taniːkídíːdoːpé bidumsunam séː agersok tayéːlo nolukkoloːpé ngokké adlíkpénamé okkosin kamang. 2 Kapéné ngo kindag noluk ka:dumsulí:namdém, odokké édém ngo Mesodonia taniːkídíːdok tatkolo luyitsula dung. Ngo luka, nolu Akayaːdok méngkésunékídíːdé ményingkokkébo bidumsupé émna lennola dung. Noluk bidumsulíːnamdé Mesodoniaːdok méngkésunékídíːdok abayangém bilí:moto.a 3 Édémpila ngo séː bírrangkídíːsém nolukkodoːpé mélígnam légaːpé noluk tayéːlo ngoluk pugdapé lusunamdé aromapé ipélagimang. Émpigeːla ngo kapé lukaji, édémíːpé nolusin bidumsunamdo lennola duːlang. 4 Émpigeːla Mesodonia taniyé ngok lédílo gímínna nolu lennola duːmang émna kinmílo, noluk tayéːlo ngoluk méːtinsunamdo éddíko ngolu anyisupaːyén, noluk aíké anyisunamdém lumaːbo. 5 Édémpila séː bírrangkídíːsé ngomyang gíponoːla noluk bipé-lusunam amankídíːdém laːlennoːmopé lagiyé émna ngo ménoːlíktag. Odo édílo ngo gípíːyéji édébulu lennola duːyé, odokké édé nolum bimola bidung émnamang, émpigeːla nolu bilíːla bidung émnamdém léngkanyé. 6 Nolu sém méːpaːlangː Séːko ajjiːko pidlígyéji bí ajjiːko gatsíːyéku, odokké séːko bojéko pidlígyéji bí bojéko gatsíːyéku. 7 Asinbo éddíkopé bipé émna méːséktagji bí odokkídíngko bipé lagidag, bilíːmapélang bolbodapé bipé lagimang, kapéné méːpodanna binném Ruːnébí aipé-méːdag. 8 Odokké nok laginamdémyaːsin Ruːnébí bibadla bilaːnédé, édémpila loːdísém ainé agerém gernam légaːpé nok laginamdémyang nokké kayaːye. 9 Ruːnék-gomugdo adla léngkamdémpéːOpanném bulu paːsépaːyédopé buluk amaném bitag;
buluk ayangé duːyaryé."b
10 Odokké suːpag séːko aríg-inném amniyém bidang, dodopé dogangém bidang, bí nok laginam appíng amniém biyé, odokké édém nokkolo bojémola arolok-duːnamém gatsíːyeku. 11 Nolu loːdísém appíng ayírro bisebiyela bilaːdopé bí nolum mirém moyé, odo bojéko taniːyé noluk binam amaném ngolukkolok paːnam légaːpé Ruːnémé aipai biyé. 12 Noluk séː agersé Ruːnéké taniːoːlok laginamém bidung émnangoːmang, édé Ruːném asinbokké aipai binampésin idung. 13 Édé agerdokki nolu aíém arro émna léngkansunamé, taniyé Ruːnémé luyitsudung. Okodé Kiristoké tatpon lutaddo noluk ludésunamdo agom-tadnampé gítédag, odokké buluk lédíloːla appíngké lédílo noluk bilíːla bidumsunamdém kaːpaːdag. 14 Odokké noluk légaːpé buluk kumbinamdo buluk asiné duːtéːyé, kapéné Ruːnébí nolum méːpílanggémaːdopé aséngém léngkantag. 15 Agomki lupílaːman bík amansok légaːpé Ruːnémé aipai.